Kalata yoyamba yoyenda kwa Akorinto 13:1-13
-
Chikondi ni njira yapadzulu (1-13)
13 Peno niyankhula viyankhulo va wanthu na angelo koma nilibe chikondi, nili ninge bero panango ngoma yomwe indokhalira kusokosera.
2 Ndipo peno ninamphaso ya uneneri, yobvesa vintsintsi vose vopatulika komasoti yodziwa vinthu vose, ndipo ninachikhulupiriro cholimba mwakuti ningakwanise kufutusa mapiri, koma niribe chikondi, vomwe nichita viribe basa.
3 Olo nipereke vinthu vangu vose kuti nidyese anango, ndipo peno ningapereke thupi yangu kuti nidziwonesere, koma niribe chikondi, ningaphindulelini chirichose.
4 Chikondi ni chodekha na chabwino ntima. Chikondi chichitalini ntsanje, chidziwoneseralini, chidzikwizalini,
5 chichitalini voipa, chisamalalini vofuna vake vokha, chikalipalini ndipo chisungalini vifukwa.
6 Chikondwalini na vinthu viribe chilungamo, koma chikondwa na chonadi.
7 Chifuchira vinthu vose, chikhulupirira vinthu vose, chidikhira vinthu vose, komasoti chipirira vinthu vose.
8 Chikondi chimalalini. Koma peno panamphaso za uneneri, zidzamale. Peno ni kuyankhula viyankhulo vosiyanasiyana,* kudzamale. Olo mphaso yodziwa vinthu, idzamale.
9 Ndawa tinkudziwalini vose ndipo tinkunena vakutsogolo moperewera.
10 Koma tikadzadziwa vose, voperewera ivi vidzamale.
11 Penenze mwana, nimbayankhula ninge mwana, kuganiza ninge mwana na kuwona vinthu ninge mwana. Koma manje panakula, nasiya kuchita vinthu ninge mwana.
12 Manjeuno tinkuwonalini bwinobwino ndawa tinkuphatisira basa girazi yomwe inkuwonekalini bwinobwino, koma panthawe mwiyo tidzawone bwinobwino. Pakali pano nikudziwalini vose, koma panthawe mwiyo nidzadziwe vose* ninge momwe Mulungu akunidziwira inepano.
13 Koma manje pandosala vinthu vitatu ivi: Chikhulupiriro, chidikhiro na chikondi. Koma chikulu pa vinthu vose mwevi ni chikondi.
