Kalata yoyamba yoyenda kwa Akorinto 15:1-58
15 Manje abale, ninkukukumbusani va ntontholo wabwino womwe nidaulalikira kwa imwepo, womwe imwepo mudautambirambo na kuukhulupirira.
2 Munkupulumusiwa ninge mwaphata mwamphanvu ntontholo wabwino wanidalalikira. Koma peno mulibe kuuphata mwamphanvu ndiye kuti mudandokhulupirira palibe na phindu.
3 Pa vinthu voyambirira vomwe nidakupfunzisani, vomwe inepano nidatambirambo, penze vonena kuti, Khrisitu adafera machimo yathu, mobverana na Malemba.
4 Komasoti kuti adaikhiwa m’manda, patsogolo pake adamukisiwa pa ntsiku yachitatu, mobverana na Malemba.
5 Penze pomwe vakuti adawonekera kwa Kefa,* patsogolo pake kwa atumi 12 wale.
6 Ndipo adawonekera pomwe kwa abale woposha 500 panthawe ibodzi, ndipo azinji pa wanthu mwawa tidakali nawo, koma anango adamwalira kale.
7 Padateno adawonekera kwa Yakobo, patsogolo pake kwa atumi wose.
8 Koma pomalizira adawonekera kwa inepano, ninge kacheche yemwe wabadwa ntsiku zikanati kukwana.
9 Inepano ndine mng’ono maninge pa atumi wose ndipo ndinelini woyenerera kuchemerewa ntumi, ndawa nidadzudza mpingo wa Mulungu.
10 Koma ndawa ya kukoma ntima kukulu kwa Mulungu, niri ninge mwaniriliumu. Ndipo kukoma ntima kukulu komwe adaniwonesa kulibe kuyenda papezi, koma nidaphata basa mwakhama kuposha atumi anango wose. Koma olo nteno niribe kuchita vimwevo na mphanvu zangu zokha, koma ndawa ya kukoma ntima kukulu kwa Mulungu.
11 Koma peno mudapfunzisiwa na inepano panango iwo, ntontholo womwe tikulalikira ni moyu, womwembo imwepo mudaukhulupirira.
12 Manje peno tilalikira kuti Khrisitu adamukisiwa, ndawa chani anango wa imwepo akunena kuti akufa adzamukisiwelini?
13 Ndawa peno wakufa adzamukelini, ndiye kuti Khrisitu nayembo alibe kumukisiwa.
14 Komasoti peno Khrisitu alibe kumukisiwa, kulalikira kwathu kulibe na basa, ndipo chikhulupiriro chanu chiribe pomwe na basa.
15 Komasoti ndiye kuti ndise mboni zabodza za Mulungu, ndawa peno akufa adzamukisiwelini, tapereka umboni wonamizira Mulungu wakuti adamukisa Khrisitu koma alibe kumumukisa.
16 Ndawa peno akufa adzamukisiwelini, ndiye kuti Khrisitu nayembo alibe kumukisiwa.
17 Ndipo peno Khrisitu alibe kumukisiwa, chikhulupiriro chanu chiribe basa ndipo machimo yanu yalibe kukhululukiriwa.
18 Ndiye kuti olo wotewera Khrisitu omwe adafa, vawo vamalira pamwapo.
19 Peno chidikhiro chathu mwa Khrisitu ni chamoyo uno wokha, ndiye kuti ndise wochitisa chifundo kuposha wanthu anango wose.
20 Koma Khrisitu adamukisiwa nkukhala ninge chipaso choyambirira kwa womwe adamwalira.
21 Pakuti impfa idabwera kupitira mwa munthu m’bodzi, kumuka kwa akufa kudabwerambo kupitira mwa munthu m’bodzi.
22 Ninge mwaviriri kuti wanthu wose ankufa ndawa ya Adamu, wanthu wose adzapasiwe pomwe moyo kupitira mwa Khrisitu.
23 Koma aliyese panthawe yabwino: Chakuyamba Khrisitu, yemwe ni chipaso choyambirira, patsogolo pake wanthu wa Khrisitu panthawe ya kukhalapo kwake.
24 Manje vose vikadzamala, adzapereke Ufumu kwa Mulungu wake na Ababa wake, akadzati wamalisa maboma yose, ulamuliro wose na mphanvu zose.
25 Ndawa afunika kukhala mpfumu nkumbatonga mpakana Mulungu adzaikhe azondi wose pasi pa mapazi yake.
26 Nayombo impfa yomwe ni mzondi womalizira, idzadzongewe.
27 Mulungu “adaikha vinthu vose pasi pa mapazi yake.” Koma pomwe akunena kuti ‘waikha vinthu vose pasi pa mapazi yake,’ ni vodziwikiratu kuti akuphatanidzapolini Mulungu muyo, yemwe adaikha vinthu vose mwivo pasi pa Mwana wake.
28 Koma vinthu vose vikadzakhala pasi pake, Mwana nayembo adzawonese kuti ali pasi pa utongi wa Mulungu, kuti Mulungu akhale vinthu vose kwa aliyese.
29 Apo neye, ko omwe akubatiziwa kuti akhale akufa adzachite tani? Peno akufa adzamukisiwelini, ndawa chani wanthu mwawo akubatiziwa kuti akhale akufa?
30 Ndawa chanimbo isepano tinkuikha moyo wathu pangozi nthawe zose?
31 Ntsiku iriyose nikhala pangozi yakuti ningafe. Vimwevi nishuwadi ninge momwe viriri vazedi kuti nidumba namwe ndawa yakuti muli pa ushamwali na Yesu Khrisitu Ambuya wathu.
32 Peno nidamenyana na vilombo ku Efeso ninge momwe anango adachitira, nidagumana phindu yanyi? Peno akufa adzamukelini, “naboni tidye na kumwa ndawa mangwana tidzafe.”
33 Ayi kunamiziwa, kubverana na wanthu woipa kudzonga makhalidwe yabwino.
34 Yambani kuganiza mwanzeru nkumbachita vabwino ndipo ayi kumbachita chimo. Anango wa imwepo amudziwalini Mulungu. Ninkuyankhula vimwevi kuti nikuchitiseni manyazi.
35 Koma munango angabvunze kuti: “Ko akufa adzamukisiwe tani? Adzamuke na thupi yotani?”
36 Munthu ulibe nzeru iwe! Ukabzala chinthu chikhalalini na moyo pokhapokha chiyambe chafa.
37 Ndipo ukambabzala ubzalalini m’mera ukulu kale, koma mbewu chabe, peno ikhale ya tirigu panango mbewumbo inango.
38 Koma Mulungu aikulisa mobverana na momwe iye akufunira, ndipo mbewu iriyose ikambakula ilinganalini na inzake.
39 Vinthu vose vomwe vinam’nyompfu vikhalalini volingana. Wanthu, nyama, mbalani na ntsomba vinam’nyompfu, koma chirichose ni chosiyana na chinzake.
40 Palimbo mathupi yakudzulu na mathupi yapadziko yapasi, koma ulemerero wa mathupi yakudzulu ni wosiyana na ulemerero wa mathupi yapadziko yapasi.
41 Ulemerero wa dzuwa ni wosiyana na ulemerero wa mwezi panango pomwe wa nyenyezi. Ndipo ulemerero wa nyenyezi inango, usiyana pomwe na wa nyenyezi inango.
42 Virimbo teno na kumuka. Thupi yomwe ifuchiriwa ikhala kuti ingadzongeke, koma yomwe imukisiwa ikhala kuti ingadzongekelini.
43 Ifuchiriwa iri yonyozeka, koma imukisiwa iri na ulemerero. Ifuchiriwa iri yofoka, koma imukisiwa iri na mphanvu.
44 Ifuchiriwa iri na nyompfu, koma imukisiwa thupi yauzimu. Peno panathupi ya nyompfu, pali pomwe yauzimu.
45 Pale Malemba yanena kuti: “Adamu, yemwe wenze munthu woyambirira, adakhala munthu wamoyo.” Adamu womalizira adakhala mzimu wopasa moyo.
46 Koma, yemwe adayamba kubwera wenzelini munthu wauzimu. Munthu wokhala na nyompfu ndiye adayamba kubwera patsogolo pake nkudzabwera munthu wauzimu.
47 Munthu woyamba adachokera padziko yapasi ndipo adakonzewa na dothi.* Wachiwiri adachokera kudzulu.
48 Wanthu wokonzewa na dothi ali ninge munthu woyamba ule yemwe adakonzewa na dothi. Ndipo wakudzulu ali ninge ule adachokera kudzulu.
49 Ninge mwaviriri kuti manjeuno tinkulingana na wokonzewa na dothi ule, tidzalinganembo na yemwe adachokera kudzulu.
50 Koma abale, dziwani kuti nyompfu na magazi vingangenelini mu Ufumu wa Mulungu. Komasoti chinthu chomwe chingadzongeke chingakhalelini na mwayi wakuti chileke kudzongeka.
51 Tetekerani, nikuuzeni chintsintsi chopatulika: Sikuti tose tidzamwalire, koma tose tidzachinje,
52 mukanthawe kang’ono, nkupoira kwa diso, pa kulira kwa lupenga yomalizira. Ndawa lupenga idzalire, pamwapo akufa adzamukisiwe na mathupi yakuti yangadzongekelini ndipo tidzachinje.
53 Ndawa mathupi yakuti yangadzongeke yadzachinje nkukhala yakuti yangadzongekelini. Ndipo mathupi mwayo yomwe yangafe yadzachinje nkukhala yakuti yangafelini.
54 Koma mathupi mwaya yomwe yangadzongeke yakadzakhala yakuti yangadzongekelini komasoti mathupi mwayo yomwe yangafe yakadzachinja nkukhala yakuti yangafelini, vomwe Malemba yadanena vidzakwanirisiwe, vakuti: “Impfa yamezewa mpakana kalekale.”
55 “Iwe impfa, kuwina kwako kuli kuponi? Iwe impfa, yemwe uchitisa kuti wanthu ambabve ululu maninge, ko mphanvu yako iri kuponi?”
56 Mphanvu yomwe ibweresa impfa ni uchimo, koma Chilamulo ndicho chomwe chiwonesa mphanvu ya uchimo.
57 Koma tinkutembeja Mulungu ndawa aphatisa basa Ambuya wathu Yesu Khrisitu pakutithandiza kuti tiwine.
58 Ndipomwapa abale wangu wapamoyo, khalani wolimba komasoti wosagunduzika. Nthawe zose mumbakhale na vochita vizinji pabasa ya Ambuya, pakudziwa kuti vose vomwe munkuchita pa basa ya Ambuya vidzayendelini papezi.
