Kalata yoyamba yoyenda kwa Akorinto 16:1-24
16 Pankhani ya vopereka voyenda kwa wochena mwawo, mungatewedze malangizo yomwe nidapereka ku mipingo ya ku Galatiya.
2 Ntsiku yoyambirira ya sondo iriyose, aliyese ambasungeko kanthu pambali kumuyi kwake mobverana na vomwe angakwanise, kuti vopereka ayi kuti vidzaperekewe nikadzafika.
3 Koma nikadzafika kumuko, nidzatume amuna omwe mudzawabvumize m’makalata, kuti adzayendese mphaso yanu ku Yerusalemu.
4 Koma peno padzafunike kuti inepano nidzayende nawo, nidzayende nawo pabodzi.
5 Nidzabwere kumuko pakuchokera ku Makedoniya, ndawa nidzagwate na ku Makedoniya.
6 Nidzakhale namwe kumuko, panango nthawe yose yozizira, kuti mudzaniperekeze komwe nidzayende.
7 Nikufunalini kudzakuwonani na mapita njira chabe neye, koma ninkufuna kudzakuwonani na nthawe yokwana, Yahova* akabvuma.
8 Koma nipitirize kukhala kuno ku Efeso mpakana pa Chikondwerero cha Pentekosite,
9 ndawa nsuwo ukulu wa utumiki wanifungukira, koma pali wotsutsa azinji.
10 Timoteyo akadzafika mudzawonesese kuti osati adzakhale na mantha pakati panu, ndawa iye ankuphata basa ya Yahova,* ninge momwe inepano ninkuchitira.
11 Ndipomwapa ayi kuti padzagumanike munthu womuderera. Mudzamuperekeze mwantendere kuti adzabwere kuno, ndawa inepano ninkumudikhirira pabodzi na abale.
12 Pakunena va m’bale wathu Apolo, nidamugwigwirira maninge kuti abwere kumuko pabodzi na abale. Chenzelini cholinga chake kuti abwere manjeuno, koma adzabwere akadzagumana mpata.
13 Khalani maso, khalani na chikhulupiriro cholimba, khalani olimba ntima ndipo khalani amphanvu.
14 Vose vomwe munkuchita, mumbavichite mwachikondi.
15 Abale, mukudziwa kuti wanthu wa m’banja ya Sitefana ndiwo enze woyamba kutumikira Mulungu ku Akaya ndipo adadzipereka kutumikira wochena. Ndipomwapa nikukulimbikisani kuti,
16 imwembo pitirizani kukhala wogonjera kwa wanthu ninge mwawo, na kwa aliyese yemwe ankuphata nawo basa mweyi mwakhama.
17 Koma ninkukondwa kuti Sitefana, Futunato na Akayiko niri nawo kuno, ndawa angena m’malo mwanu.
18 Wanthu mwawa anilimbikisa maninge inepano ndipo alimbikisa pomwe imwepo. Ndipomwapa wanthu watene mumbawalemekeze.
19 Mipingo ya ku Ásia yakupereka moni. Akula na Purisika komasoti mpingo womwe unkusonkhana m’nyumba mwawo, akupereka moni wochokera pasi pa ntima kwa mose imwepo, mwa Ambuya.
20 Abale wose akupereka moni. Mupasane moni mwachikondi.
21 Manje tambirani moni wangu, wa inepano Paulo, wonemba nekha na djanja yangu.
22 Aliyese yemwe akondalini Ambuya, atembererewe. Bwerani Ambuya wathu!
23 Kukoma ntima kukulu kwa Ambuya Yesu kukhale na imwepo.
24 Ninkukutsimikizirani kuti nikukondani maninge imwepo wopfunzira wa Yesu Khrisitu.
