Kalata yoyamba yoyenda kwa Akorinto 2:1-16
2 Ndipomwapa abale, pomwe nidabwera kwa imwepo kudzalengeza va chintsintsi chopatulika cha Mulungu, nimbayankhulalini mwakundokomesera panango mowonesa kuti ninanzeru zodabwisa.
2 Pakuti penenze na imwepo nidasankhula kuti nileke kudziwa chirichose kupatulapo Yesu Khrisitu, yemwe adamanikiwa.
3 Panidabwera kwa imwepo nenze nilibe mphanvu ndipo ninganjenjemera na mantha.
4 Panimbayankhula komasoti kulalikira, mawu yangu yambapasalini chidwi panango kuwonesa nzeru, koma yambawonesa mzimu na mphanvu.
5 Nidachita vimwevi kuti muleke kumbakhulupirira nzeru za wanthu koma mumbakhulupirire mphanvu ya Mulungu.
6 Manje tinkuyankhula vanzeru kwa wanthu olimba mwauzimu, koma osati nzeru za nthawe ino* panango za olamulira wa nthawe ino omwe adzachenekewe.
7 Koma tinkunena va nzeru ya Mulungu yomwe ni nzeru yopatulika, yomwe idawonekera mu chintsintsi chopatulika. Mulungu adakonzeratu vimwevi kalekale, kuti tikhale na ulemerero.
8 Palibe wolamulira aliyese wanthawe ino* yemwe ambadziwa nzeru mweyi, ndawa sembe ambadziwa, adakaphalini* Ambuya wa ulemerero.
9 Koma vidachitika mobverana na vomwe Malemba yanena kuti: “Palibe munthu yemwe adaonako panango kubva panango pomwe kuganiza vomwe Mulungu wakonzera wanthu omwe amukonda.”
10 Mulungu adatiululira isepano vinthu vimwevi kupitira mwa mzimu wake, ndawa mzimu ufagafaga vinthu vose mpakana chintsintsi chobisika cha Mulungu.
11 Ko ni munthu mponi yemwe angakwanise kudziwa maganizo ya munthu munango? Aliyese andodziwa vomwe viri muntima mwake basi. Molingana na vimwevi, palibe yemwe ankudziwa maganizo ya Mulungu, kupatulapo mzimu wa Mulungu.
12 Isepano tilibe kutambira mzimu wadziko, koma mzimu wochokera kwa Mulungu, kuti tidziwe vinthu vomwe Mulungu watipasa mokoma ntima.
13 Tiyankhula pomwe vinthu vimwevi, osati na mawu yopfunzisiwa na nzeru za wanthu, koma na mawu yomwe mzimu utipfunzisa, pomwe tinkufotokoza* vinthu vauzimu na mawu yauzimu.
14 Koma munthu wokonda vinthu va m’dziko awonalini vinthu va mzimu wa Mulungu kuti ni vofunika, ndawa aviwona kuti ni vopusa ndipo angakwaniselini kuvidziwa, ndawa vifuna kuvifagafaga mwauzimu.
15 Komasoti munthu wauzimu afagafaga vinthu vose, koma iye aunguziwalini na munthu aliyese.
16 Viri ninge momwe Malemba yanenera kuti: “Nimbani ankudziwa malangizo ya Yahova* kuti amulangize?” Koma isepano tinamalangizo ya Khrisitu.
Mawu ya m’nyantsi
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “adakamanikalini pamuti.”
^ Panango kuti: “tinkubveranisa.”
^ Onani matanthauzo ya mawu yanango.
