Kalata yoyamba yoyenda kwa Akorinto 3:1-23
3 Ndipomwapa abale, nilibe kukwanisa kuyankhula namwe ninge wanthu wotsogolerewa na mzimu wa Mulungu, koma ninge wanthu wokonda vinthu va mudziko iyi, ninge wana mwa Khrisitu.
2 Nidakupasani nkaka osati chakudya chotampfuna, ndawa mwenze mukanati mwalimba mokwanira. Ndipo mpakana pano mukalibe mwalimba,
3 ndawa munkuganiza ninge wanthu wakudziko. Manje peno munkuchitirana ntsanje komasoti kugegedzana mwekhamwekha, ko sikuti ndimwe wanthu wakuthupi ndipo munkuchita vinthu ninge wanthu wakudziko?
4 Peno munango ankunena kuti: “Ine ndine wa Paulo,” ndipo munango ankunena kuti: “Ine ndine wa Apolo,” ko mukulinganalini na wanthu wose?
5 Ko Apolo ni mbani? Ndipo Paulo ni mbani? Ise tandokhala atumiki omwe tidakuthandizani kukhala wokhulupirira, mobverana na basa yomwe Ambuya adatipasa.
6 Inepano nidabzala ndipo Apolo adathiriza, koma Mulungu ndiye adakulisa.
7 Ndipomwapa, wofunika maninge ni ulelini yemwe adabzala panango yemwe adathiriza, koma Mulungu yemwe akulisa.
8 Wobzala na wothiriza aphata basa na cholinga chibodzi, koma aliyese adzatambire malipiro mobverana na basa yake.
9 Ndawa ndise anyabasa anzake wa Mulungu. Imwepo ndimwe munda wa Mulungu womwe unkulimiwa, nyumba ya Mulungu.
10 Mobverana na kukoma ntima kukulu komwe Mulungu adaniwonesa, nidakonza fundasau ninge momwe achitira munthu wabuya pa basa zomangamanga. Koma yemwe ankumanga pa fundasau mwiyo ni munthu munango. Ndipomwapa aliyese asamale na momwe ankumangira.
11 Ndawa palibe munthu munango yemwe angakonze fundasau inango kupatulapo yomwe idakonzewa kale, yomwe ni Yesu Khrisitu.
12 Manje peno munthu ankumanga pa fundasau mwiyo na golide, siliva, minyala yodula, miti, uswa na viputu,
13 basa ya aliyese idzadziwike kuti ni yotani. Ntsiku inango basa mwiyo idzadziwike momwe iliri, ndawa moto ni womwe udzaonese vimwevo pachena. Moto muyo udzaonese kuti basa ya munthu aliyese ni yotani.
14 Peno vomwe munthu wamanga pa fundasau mwiyo vidzapitirize kukhalapo, iye adzatambire malipiro.
15 Peno vomwe munthu wamanga vidzapse na moto, ndiye kuti basa zake zadzongeka, olo nteno iye adzapulumuke. Koma adzakhale ninge wapulumuka pamoto.
16 Ko imwepo munkudziwalini kuti ndimwe kachisi wa Mulungu ndipo mzimu wa Mulungu ukuphata basa nkati mwanu?
17 Peno munthu munango wadzonga kachisi wa Mulungu, Mulungu adzamudzonge munthu muyo, ndawa kachisi wa Mulungu ni wochena, ndipo kachisi muyo ndimwepo.
18 Munthu ayi kuti ambadzinamize. Peno aliyese wa imwepo ankuganiza kuti ni wanzeru nthawe ino,* akhale wopusa kuti akhale wanzeru.
19 Pakuti kwa Mulungu nzeru za dziko iyi ni zopusa, ndawa Malemba yanena kuti: “Iye achitisa kuti anzeru agwere m’misampha yawo.”
20 Yanena pomwe kuti: “Yahova* adziwa kuti maganizo ya wanthu anzeru yalibe phindu.”
21 Ndipomwapa ayi kuti pagumanike munthu wodzikwiza ndawa ya wanthu, pakuti vinthu vose ni vanu,
22 peno Paulo, Apolo, Kefa,* dziko, moyo, impfa, vinthu vomwe viripo panango vinkubwera, vose ni vanu.
23 Imwepo ndimwe wa Khrisitu ndipo Khrisitu ni wa Mulungu.
Mawu ya m’nyantsi
^ Onani matanthauzo ya mawu yanango.
^ Onani matanthauzo ya mawu yanango.
^ Wodziwika pomwe kuti Petulo.
