Kalata yoyamba yoyenda kwa Akorinto 4:1-21
4 Wanthu ambakwanise kuwona kuti ndise atumiki wa Khrisitu komasoti atumiki wa vintsintsi vopatulika va Mulungu.
2 Pankhani mweyi, chofunika kwa atumiki ni kukhala wokhulupirika.
3 Kwa inepano palibe bvuto kuweruziwa na imwepo panango tiribunali iriyose ya wanthu. Ndipo olo inepano nidziweruzalini nekha.
4 Muntima mwangu ninkudzitsutsalini pankhani iriyose. Koma vimwevi vinkutanthauzalini kuti ndine wolungama, ndawa Yahova* ndiye yekha yemwe adziwa peno vomwe ninkuchita ni vabwino panango voipa.
5 Ndipomwapa ayi kuthamangira kuweruza chirichose nthawe ikanati kukwana, mpakana Ambuya adzafike. Iye adzachitise kuti vintsintsi va mumdima viwonekere komasoti adzawonese pachena vomwe viri muntima. Ndipo aliyese payekha adzatembejewe na Mulungu.
6 Manje abale, nanena vinthu vimwevi pankhani ya inepano na Apolo kuti mubvese mpfundo yake na cholinga chakuti mupfunzire kwa ise lamulo yakuti: “Ayi kupitirira vinthu vomwe viri m’Malemba.” Tifunalini kuti aliyese wa imwepo akhale wodzikwiza nkumbachita vinthu mokondera.
7 Ko ankukuchitisa kuti ukhale wosiyana na anango nimbani? Ndipo unachani chomwe ulibe kuchita kutambira? Manje peno udachita kutambira vinthu vimwevo, ndawa chani ukudzikwiza ninge kuti ulibe kuchita kutambira?
8 Ko munkudziwona ninge muli navo kale vinthu vose? Mwalemera kale kani? Ko mwayamba kutonga ninge mafumu palibe isepano? Ninkuwona kuti vidakakhaladi bwino mudakayamba kutonga ninge mafumu, kuti isembo timbatonge namwe pabodzi ninge mafumu.
9 Ninkuwona ninge Mulungu waikha atumi ise kuti tiwonesewe pakumalizira ninge wanthu omwe ankutongewa kuti akaphewe, pamalo yochitira masenzeka ndipo tinkuonesewa kudziko, kwa angelo na kwa wanthu.
10 Takhala opusa ndawa ya Khrisitu, koma imwepo mwakhala wochenjera mwa Khrisitu. Ise ndise wofoka, imwepo ndimwe wamphanvu. Imwepo munkulemekezewa, koma isepano tinkunyozewa.
11 Mpaka pano tidakali na njala, na nyota ndipo tiri pa usiwa. Tinkupitiriza kumenyewa ndipo tikalibe kugumana pokhala.
12 Tikupitiriza kulimbikira kuphata basa na manja yathu. Wanthu akambatinamizira, tiwadalisa ndipo akambatidzudza, tipirira modekha.
13 Akambatinamizira voipa, tidawira modekha. Mpakana pano, tinkuwonewa ninge vinyaswa va dziko komasoti ninge vinthu vopasa nyantsi.
14 Sikuti ninkunemba vinthu vimwevi kuti nikuchitiseni manyazi neye, koma kuti nikulangizeni ninge wana wangu wapamoyo.
15 Podiya muchikhala na wanthu okunyang’anirani 10 000 mwa Khrisitu, munababa m’bodzi basi. Inepano ndine baba wanu mwa Yesu Khrisitu ndawa nidakubwereserani ntontholo wabwino.
16 Manje ninkukulimbikisani kuti mumbatewedzere inepano.
17 Ndipomwapa ninkukutumizirani Timoteyo, pakuti iye ni mwana wangu wapamoyo komasoti wokhulupirika kwa Ambuya. Iye adzakukumbuseni momwe nichitira vinthu pakutumikira Yesu Khrisitu komasoti momwe nipfunzisira kulikose, mumpingo uliwose.
18 Anango adzikwiza ninge kuti nidzabwerelini kumuko kwanu.
19 Koma Yahova* akabvuma nibwere manjemanje kumuko, ndipo nidzabveserelini mawu yawo yodzikwiza koma nifuna nidzaone mphanvu zawo.
20 Ndawa Ufumu wa Mulungu ni nkhanilini ya mawu, koma mphanvu.
21 Ko mungasankhule chani? Nibwere kwa imwepo na nshamu, panango nibwere mwachikondi komasoti mopfatsa?
