Kalata yoyamba yoyenda kwa Akorinto 5:1-13
5 Vabveka kuti kumuko kunkuchitika chigololo ndipo chigololo chake nichakuti olo wanthu wa makhaindi yanango achitalini. Ati mwamuna munango watengana* na nkazi wa ababa wake.
2 Ko munkukomedzewa navo vimwevi m’malo mwakuti mukwinyirire, kuti munthu yemwe wachita vimwevi achosewe pakati panu?
3 Podiya kuti nirilini kumuko, mumzimu nili kumuko, ndipo namuweruza kale munthu yemwe wachita vimwevi, ninge kuti nili namwe pabodzi kumuko.
4 Mukasonkhana mudzina ya Ambuya wathu Yesu, mudziwe kuti nili namwe pabodzi mumzimu komasoti mu mphanvu ya Ambuya wathu Yesu.
5 Ndipomwapa mupereke munthu muyo kwa Satana kuti thupi mwiyo idzongewe, na cholinga chakuti mzimu muyo upulumusiwe muntsiku ya Ambuya.
6 Kudzikwiza kwanu ni kwabwinolini. Ko mukudziwalini kuti vofufumisa* ving’onon’gono vifufumisa ufa wose wokanyakanya?
7 Chosani vofufumisa vakale mwivo, kuti mukhale ufa unyowani wokanyakanya, pakuti mulibe vofufumisa. Ndawa Khrisitu waperekewa ninge ntsembe yathu ya Pasika.
8 Ndipomwapa naboni tichite chikondwerero cha Pasika chimwechi, osati na vofufumisa vakalekale, panango vofufumisa voimira voipa na uchimo, koma na mkate ulibe vofufumisa woimira chilungamo na chonadi.
9 Mukalata yangu, nidakunemberani kuti muleke kubverana na wanthu achigololo.
10 Ninkutanthauzalini kuti mumbapeweretu wanthu achigololo wamudziko iyi panango wadyera, wotengera vinthu anzawo na wotumikira mafano. Kuti muchite vimwevo, ndiye kuti mungafunike kubulamo mudziko mweyi.
11 Koma manje ninkukunemberani kuti muleke kubverana na m’bale aliyese yemwe ni wachigololo, wadyera, wotumikira mafano, wopopota, chidakwa komasoti wotengera vinthu anzake, ndipo olo kudya naye munthu watene mufunikalini.
12 Manje ko ni udindo wangu kuweruza wanthu omwe ali kunja? Ko sipale muweruza wanthu omwe ali mkati,
13 ndipo Mulungu aweruza omwe ali kunja? “Muchoseni munthu woipa muyo pakati panu.”
