Kalata yoyamba yoyenda kwa Akorinto 6:1-20
6 Ko m’bodzi pagulu yanu akakhala na mulandu na munzake, alimba tani ntima nkuyenda ku tiribunali kwa wanthu omwe atumikiralini Mulungu, osati kwa ochena?*
2 Ko mukudziwalini kuti wochena mwawo adzaweruze dziko? Ndipo peno mudzaweruze dziko, ko mungakwaniselini kutonga milandu yang’onoyang’ono maninge ninge mwayo?
3 Ko munkudziwalini kuti tidzaweruze angelo? Manje tingakangire tani kutonga nkhani za nthawe ino?
4 Ndipomwapa, peno munankhani za nthawe ino zofunika kuweruza, ko mukupereka udindo woweruza kwa wanthu omwe mpingo ungawathembelini?
5 Ninkuyankhula vimwevi kuti nikuchitiseni manyazi. Ko pakati panu palibe wanzeru olo m’bodzi yemwe angaweruze milandu ya abale wake?
6 Ko m’bale ambayendese m’bale wake ku tiribunali, kwa wanthu omwe atumikiralini Mulungu?
7 Kunena shuwa, peno munkuyendesana ku tiribunali ndiye kuti palibe chomwe munkuchita. Tani kundobvuma kuphonyerewa? Tani kundobvuma kuberewa?
8 M’malo mochita vimwevi, imwepo muchita vophonyeka komasoti mubera anango ndipo muchitira vinthu vimwevi abale wanu.
9 Ko nishuwadi kuti imwepo mudziwalini kuti wanthu omwe achita vinthu viribe chilungamo adzangenelini mu Ufumu wa Mulungu? Ayi kunamiziwa. Mahule,* otumikira mafano, achigololo, amuna omwe abvuma kugonewa na amuna anzawo, amuna wogona amuna anzawo,
10 mbava, adyera, vidakwa, wopopota, panango wotengera vinthu anzawo, wose mwawo adzangenelini mu Ufumu wa Mulungu.
11 Ndipo anango imwe mwenzembo teno. Koma mwasambikiwa nkukhala wochena, mwapatuliwa, munkuonewa ninge wolungama mudzina ya Ambuya wanthu Yesu Khrisitu, komasoti na mzimu wa Mulungu wathu.
12 Vinthu vose nivobvumizika kwa ine, koma nivoselini vomwe ni vaphindu. Vinthu vose nivobvumizika kwa ine, koma nidzabvumelini kuti chinthu chinango chimbanitonge.
13 Chakudya ni chamimba, ndipo mimba ni yachakudya, koma Mulungu adzadzonge vose, mimba na chakudya. Thupi niyochitiralini uhule,* koma ni ya Ambuya ndipo Ambuya ni womwe apereka vomwe thupi ifuna.
14 Koma Mulungu adamukisa Ambuya ndipo adzamukisembo isepano pakuphatisira basa mphanvu zake.
15 Ko munkudziwalini kuti mathupi yanu ni vidzo va Khrisitu? Manje ko inepano nitenge vidzo va Khrisitu nkuvichitisa kukhala vidzo va hule? Nivosakwanisika vimwevo!
16 Ko imwepo munkudziwalini kuti yemwe wagonana na hule akhala thupi ibodzi na hule mwiyo? Ndawa adati: “Awiri mwawo adzakhale thupi ibodzi.”
17 Koma yemwe wabverana na Ambuya akhala naye pabodzi mumzimu.
18 Thawani chigololo. Chimo iriyose yomwe munthu angachite ni yakunja kwa thupi yake, koma yemwe achita chigololo achimwira thupi yake.
19 Ko imwepo munkudziwalini kuti thupi yanu ni kachisi wa mzimu uchena womwe uli mwa imwepo, womwe mudapasiwa na Mulungu? Ndipo munichiro wa imwepo ndimwelini,
20 ndawa mudaguliwa pa ntengo wodula. Mulimose momwe vingakhalire, lemekezani Mulungu na mathupi yanu.
Mawu ya m’nyantsi
^ Panango kuti: “osankhiwa na Mulungu.”
^ Onani matanthauzo ya mawu yanango.
^ Onani matanthauzo ya mawu yanango.
