Kalata yoyamba yoyenda kwa Akorinto 7:1-40
7 Manje pankhani yomwe mudanemba ire, vingakhale bwino kuti mwamuna osati agumirire* nkazi.
2 Koma ndawa ya kuwanda kwa vigololo, mwamuna aliyese akhale na nkazi wakewake ndipo nkazi aliyese akhale na mwamuna wakewake.
3 Mwamuna ambapereke kwa nkazi wake vinthu vofunikira* m’banja, ndipo nkazimbo ambapereke kwa mwamuna wake vinthu vomwe iye afunikira.
4 Nkazi osati ambatonge thupi yake. Koma mwamuna ndiye afunika kumbatonga thupi ya nkazi wake. Mwamunambo osati ambatonge thupi yake, koma nkazi ndiye afunika kumbatonga thupi ya mwamuna wake.
5 Ayi kumbalambizana, pokhapokha peno mwapangana kuti muyambe mwaima kwakanthawe kang’onong’ono kuti muphatise basa nthawe mwiyo popemphera, patsogolo pake nkuyambira pomwe ninge nthawe zose, kuchitira kuti Satana angapitirize kukuyesani mukakangira kudziphata.
6 Ninkunenalini vimwevi ninge lamulo, koma kuti mudziwe vinthu vobvumizika.
7 Koma nidakakonda amuna wose adakakhala ninge inepano. Koma olo nteno aliyese anamphaso yomwe Mulungu adamupasa ndipo timutumikira munjira zosiyanasiyana.
8 Manje kwa omwe akanati kulowola na kwa akazi wamasiye ninkunena kuti, vingakhale bwino kuti apitirize kukhala ninge mwaniriri inepano.
9 Koma peno angakwaniselini kupirira, alowole, ndawa viribwino kulowola kusiyana na kushupika na chilakolako.
10 Kwa omwe ni olowola ninkupereka malangizo aya, kuti nkazi ayi kuti asiye mwamuna wake. Malangizo mwaya ni yochokera kwa Ambuya.
11 Koma peno angamusiye, akhale tenouyo osalowodwa. Apo neye, abwererane na mwamuna wake. Mwamunambo ayi kuti asiye nkazi wake.
12 Koma kwa anango awa, inepano, osati kwa Ambuya, ninkunena kuti: Peno m’bale anankazi yemwe atumikiralini Mulungu, ndipo nkazi muyo ankubvuma kukhala naye, ayi kuti amusiye.
13 Peno nkazi alimbo na mwamuna yemwe atumikiralini Mulungu, ndipo mwamuna muyo ankubvuma kukhala naye, ayi kuti amusiye.
14 Mwamuna yemwe atumikiralini Mulungu achenesewa ndawa ya nkazi wake, ndipo nkazi yemwe atumikiralini Mulungu achenesewa ndawa ya m’bale muyo, apo neye, wana wanu adakakhala wosachena, koma manje ni wochena.
15 Koma peno munthu yemwe atumikiralini Mulungu wasankhula kuchoka, achoke. Vikakhala teno m’bale panango mulongo akhalalini womangika, koma Mulungu wakuchemerani kuti mukhale mwantendere.
16 Nkazi iwe, ungadziwenyi, panango ukapitiriza kukhala na mwamuna wako ungamupulumuse! Panango iwepo mwamuna, ungadziwenyi, panango ukapitiriza kukhala na nkazi wako ungamupulumuse!
17 Olo kuti viriteno, munthu aliyese akhale ninge mwewenzere panthawe yomwe Yahova* Mulungu angamuchemera. Yamwaya ni malangizo yomwe nikuyapereka ku mipingo yose.
18 Ko pali mwamuna yemwe adachemerewa ali wochitiwa mdulidwe? Apitirize kukhala teno. Manje alipo yemwe adachemerewa ali wosachitiwa mdulidwe? Osati achitiwe mdulidwe.
19 Mdulidwe utanthauzalini chirichose ndipo kusachitiwa mdulidwe kutanthauzalini pomwe chirichose, koma kutewedza malamulo ya Mulungu ndiko kofunika.
20 Aliyese apitirize kukhala ninge mwewenzere panthawe yomwe ambachemerewa.
21 Ko udachemerewa uli kapolo? Ayi kuchita navo nkhawa vimwevo. Koma peno mwayi wakuti ukhale womasuka ulipo, uphatisire basa.
22 Aliyese yemwe adachemerewa mwa Ambuya ali kapolo, ni ntumiki wa Ambuya womasuka ndipo yemwe adachemerewa alilini kapolo, ni kapolo wa Khrisitu.
23 Mudaguliwa pa ntengo wodula, lekani kukhala akapolo wa wanthu.
24 Abale, aliyese apitirize kukhala ninge mwewenzere panthawe yomwe ambachemerewa na Mulungu.
25 Manje pakunena va omwe alilini pabanja, niribe lamulo iriyose ya Ambuya, koma ninkupereka maganizo yangu ninge munthu yemwe adawonesewa chifundo na Ambuya kuti nikhale wokhulupirika.
26 Ndawa ya mabvuto yomwe tinkugumana nayo, ninkuganiza kuti vingakhale bwino kuti mwamuna apitirize kukhala ninge momwe alili.
27 Ko unankazi? Leka kufagafaga njira yomasukira. Ko ulibe nkazi? Leka kufagafaga nkazi.
28 Koma podi uchiti walowola, sikuti wachimwa. Ndipo peno yemwe alilini m’banja wangena m’banja, sikuti wachimwa. Koma olo nteno, amwawo ongena m’banja adzagumane na mabvuto pamoyo wawo. Inepano nikundoyesesa kukutetezani.
29 Komasoti abale dziwani ivi: Nthawe yomwe yasala iyi yafupika. Kuyambira manjeuno, yemwe anankazi ambakhale ninge alibe
30 ndipo yemwe ankulira ambakhale ninge ankuliralini. Yemwe ankukondwa ambakhale ninge yemwe ankukondwalini, ndipo yemwe agula vinthu ambakhale ninge alibe chinthu.
31 Yemwe aphatisa basa dziko iyi ambakhale ninge yemwe aiphatisalini basa mokwana, ndawa vochitika pa dziko iyi vinkuchinja.
32 Ninkufuna kuti mukhale mulibe nkhawa. Mwamuna wosalowola akhala na nkhawa na vinthu va Ambuya, momwe angakondweresere Ambuya.
33 Koma mwamuna wolowola akhala na nkhawa na vinthu va m’dziko momwe angakondweresere nkazi wake
34 ndipo akhala wogawanika. Nayembo nkazi wosalowodwa komasoti namwali, akhala na nkhawa na vinthu va Ambuya, kuti akhale wochena mu thupi yake na maganizo yake. Koma nkazi wolowodwa akhala na nkhawa na vinthu va mudziko, momwe angakondweresere mwamuna wake.
35 Ninkunena vimwevi kuti nikuthandizeni, osati kuti nikupanikizeni, koma kuti nikulimbikiseni kuchita vabwino komasoti kutumikira Ambuya nthawe zose palibe vosokoneza.
36 Koma peno munthu yemwe alilini pabanja ankukangira kupirira, ndipo wapitirira pachimake pa ulumbwana, viribwino kuti alowole. Ankuchimwalini.
37 Koma peno munango watsimikiza muntima mwake kuti angakwanise kukhala wosalowola ndipo akukwanisa kulamulira maganizo yake komasoti wasankhula muntima mwake kupitiriza kukhala wosalowola, wachita bwino.
38 Yemwembo wasiyana na umoyo wokhala yekha nkungena m’banja wachita bwino, koma yemwe alibe kungena m’banja wachita bwino maninge.
39 Nkazi akhala womangika panthawe yomwe mwamuna wake ali moyo. Koma mwamuna wake akamwalira, nkazi muyo akhala womasuka kulowodwa na aliyese yemwe ankufuna, koma alowodwe mwa Ambuya.
40 Koma olo nteno ninkuwona kuti angakhale wokondwa maninge peno angapitirize kukhala momwe alili. Ndipo ninkukhulupirira kuti ninamzimu wa Mulungu.
Mawu ya m’nyantsi
^ Panango kuti: “kugonana na mkazi.”
^ Kutanthauza nkhani za kugonana.
^ Onani vakumapeto A5.
