Kalata yoyamba yoyenda kwa Akorinto 8:1-13
8 Manje pakunena va vakudya voperekewa kwa mafano, tinkudziwa kuti tose ndise wodziwa vinthu. Kudziwa vinthu kuchitisa munthu kukhala wodzikwiza, koma chikondi chilimbikisa.
2 Peno munthu munango ankuganiza kuti panavinthu vinango vomwe avidziwa, akanati kuvidziwa bwinobwino.
3 Koma peno munthu akonda Mulungu, munthu muyo adziwika kwa Mulungu.
4 Manje pankhani ya kudya vakudya voperekewa kwa mafano, tidziwa kuti fano ni kanthulini nakuti kulibe Mulungu munango koma m’bodzi yekha.
5 Wanthu anena kuti kuli milungu yazinji, peno kudzulu panango padziko yapasi. Ndipomwapa kwa wanthu mwawo milungu yalikodi yazinji na ambuya azinji.
6 Koma kwa isepano Mulungu aliko m’bodzi yekha, yemwe ni Ababa. Vinthu vose vidachokera kwa iye, ndipo isepano ndise wake, pali pomwe Ambuya m’bodzi, Yesu Khrisitu, yemwe vinthu vose vidakhalako pakuphatisira basa iye, ndipo isembo tidakhalako kupitira mwa iye.
7 Koma ni woselini omwe adziwa vimwevi. Anango, ndawa yakuti pakuyamba ambatumikira mafano, akambadya chakudya choperekewa kwa mafano achiwona ninge choperekewadi kwa mafano. Patsogolo pake chikumbuntima chawo chiwashupa pakuti ni wofoka.
8 Koma chakudya chingatithandizelini kufenderera Mulungu. Peno tiribe kudya chakudya chimwicho, sikuti taphonya, ndipo peno tadya, sikuti ndise wabwino maninge kwa iye.
9 Koma mumbasamale kuti ufulu wanu muyo wosankhula osati ukhale chokhukhumudwisa kwa wanthu wofoka.
10 Peno munthu munango angawone iwepo wodziwa vinthu ukudya chakudya mukachisi wa mafano, ko chikumbuntima cha munthu wofoka muyo chidzamulimbikiselini kudya chakudya choperekewa kwa mafano?
11 Ndipomwapa kudziwa kwako vinthu kungachitise kuti udzonge munthu wofoka muyo, yemwe ni m’bale wako yemwe Khrisitu adamufera.
12 Koma imwepo mukambaphonyera abale wanu tene nkumbadzonga chikumbuntima chawo chofoka mwicho, munkuchimwira Khrisitu.
13 Ndipomwapa peno chakudya chinkukalipisa m’bale wangu, nidzadyelini pomwe nyama olo pang’ono, kuti osati nikalipise m’bale wangu.
