Kalata yoyamba yoyenda kwa Akorinto 9:1-27
9 Ko niribe ufulu kuchita vomwe ninkufuna? Ko ndinelini ntumi? Ko nilibe kuwona Yesu Ambuya wathu? Ko imwepo ndimwelini basa yangu mwa Ambuya?
2 Peno kwa anango ndinelini ntumi, mosakaikira ndine ntumi kwa imwepo, ndawa ndimwe chidindo chotsimikizira kuti ndine ntumi mwa Ambuya.
3 N’dawiro wangu kwa omwe anikaikira ni wakuti:
4 Ko tilibe ufulu wakudya komasoti kumwa?
5 Ko tilibe ufulu wofamba pabodzi na akazi* wathu omwe atumikira Mulungu ninge momwe achitira atumi anango wose, abale wawo wa Ambuya komasoti Kefa?*
6 Ko panango inepano na Baranaba ndise tekha tiribe ufulu wosiya kuphata basa kuti timbagumane vofunika pamoyo?
7 Ko alipo nsocha yemwe atumikira, koma nkumbadzilipira yekha? Nimbani yemwe alima munda wa uva koma osadya vipaso vake? Panango nimbani yemwe asunga viweto* koma osamwa nkaka wake?
8 Ko vomwe ninkuyankhula ivi ni maganizo ya wanthu basi? Ko Chilamulo chinenambolini vimwevi?
9 Chilamulo cha Mose chinena kuti: “Ayi kumbamanga ng’ombe pakamwa panthawe yomwe iyo inkupuntha mbewu.” Ko Mulungu andoikhira nzeru ng’ombe zokha?
10 Panango adanena mawu mwaya poganizira isepano? Mawu mwaya yadanembewadi poganizira isepano, ndawa wolima na wopuntha mbewu afunika kuphata basa achimbadikhira kuti adzaphindulepo.
11 Peno tidakupasani vinthu vauzimu, ko nkuphonya kutambira vinthu vofunika pamoyo kuchokera kwa imwepo?
12 Peno wanthu anango adikhira kuti muwachitire vimwevi, kuli tani isepano? Manje isepano tilibe kuphatisa basa ufulu muyo. Koma tipirira vinthu vose kuti osati tikangise anango kubva ntontholo wabwino wonena va Khrisitu.
13 Ko munkudziwalini kuti wanthu omwe aphata basa zopatulika akudya va nkachisi, ndipo omwe atumikira ku guwa yantsembe nthawe zose atambira vinthu vinango voperekewa paguwa yantsembe mwiyo?
14 Komasoti Ambuya adalamula kuti wanthu omwe alalikira ntontholo wabwino ambagumane vofunika pamoyo pakuphatisa basa ntontholo wabwino.
15 Koma niribe kuphatisirako basa ufulu moyu. Ndipo sikuti nanemba vimwevi kuti niyambe kuphatisira basa ufulu moyu, ndawa vingakhale bwino kuti inepano nife, kusiyana nakuti . . . palibe munthu yemwe anganitengere vifukwa vomwe vikunichitisa kuti nidzikwize!
16 Peno nikulalikira ntontholo wabwino, chimwechi ni chifukwalini chakuti nidzikwize, ndawa nidalamuliwa kuchita vimwevi. Tsoka kwa inepano peno nilalikiralini ntontholo wabwino.
17 Nikambachita vimwevi mwakufuna kwangu, nidzatambire malipiro. Koma peno nichite mochichimizika, ndine wonyang’anira basi mobverana na udindo womwe nidapasiwa.
18 Manje malipiro yangu ni chani? Niyakuti nikambalalikira ntontholo wabwino nimbaulalikire fovolo, kuti osati niphatise basa mophonyeka ufulu wangu pa vinthu vobverana na ntontholo wabwino.
19 Podiya kuti ninaufulu, nadzichitisa kukhala kapolo wa wanthu wose, kuti nithandize wanthu azinji.
20 Kwa Ayuda nidakhala ninge Muyuda, kuti nithandize Ayuda. Kwa wanthu wotewedza Chilamulo, nidakhala ninge wotewedza Chilamulo kuti nithandize wanthu wotewedza Chilamulo, podiya kuti nitewedzalini Chilamulo.
21 Kwa wanthu omwe aphatisalini basa Chilamulo, nidakhala ninge wosaphatisa basa Chilamulo, kuti nithandize wanthu omwe aphatisalini basa Chilamulo. Nidachita vimwevi olo kuti nitewedza malamulo ya Mulungu komasoti lamulo ya Khrisitu.
22 Kwa wofoka nidakhala wofoka, kuti nithandize wofoka. Nakhala vinthu vose kwa wanthu wosiyanasiyana, kuti niyesese momwe ningakwanisire kupulumusa anango.
23 Nichita vinthu vose ndawa ya ntontholo wabwino, kuti nilalikire ntontholo moyu kwa wanthu anango.
24 Ko munkudziwalini kuti wochita mpikisano wothamanga athamanga wose, koma yemwe atambira malipiro ni m’bodzi basi? Mumbathamange munjira yakuti mukatambire malipiro mwayo.
25 Munthu aliyese yemwe achita nawo mpikisano akhala wopirira pa vinthu vose. Wanthu achita vimwevi kuti akatambire nkhata ya kumsolo yomwe idzongeka, koma isepano, tichita vimwevo kuti tikagumane nkhata ya kumsolo yomwe ingadzongekelini.
26 Ndipomwapa sikuti nikundothamanga osadziwa komwe ninkuyenda. Mwaninkuthusira mafaiti yangu, sikuti nikundomenya mphepo neye.
27 Koma ninkumenya thupi yangu nkuichitisa kukhala kapolo, kuti nikalalikira kwa anango, inepano osati nigumaniwe na chifukwa chonichitisa kukhala wosayenerera.
Mawu ya m’nyantsi
^ Panango kuti: “alongo.”
^ Wodziwika pomwe kuti Petulo.
^ Panango kuti: “vipfuwo.”
