Kalata yoyamba yoyenda kwa Atesalonika 1:1-10
1 Ine Paulo niri pabodzi na Silivano* komasoti Timoteyo ndipo ninkunembera mpingo wa ku Atesalonika, womwe ni wobverana na Mulungu Ababa komasoti Ambuya Yesu Khrisitu kuti:
Kukoma ntima kukulu na ntendere vikhale namwe.
2 Nthawe zose titembeja Mulungu tikambakutomolani mose imwepo m’mapemphero yathu.
3 Tichita vimwevi ndawa nthawe zose tikumbukira basa zanu zachikhulupiriro, basa zanu zachikondi komasoti kupirira kwanu ndawa ya chidikhiro chomwe munacho mwa Ambuya wathu Yesu Khrisitu, pamaso pa Mulungu yemwe ni Ababa wathu.
4 Ndawa tikudziwa imwepo abale wokondewa na Mulungu, kuti iye ndiye yemwe adakusankhulani.
5 Tinkunena teno ndawa pomwe timbalalikira ntontholo wabwino kwa imwepo, sikuti timbandoyankhula basi, koma ntontholo muyo wenze wamphanvu, udabwera na mzimu uchena komasoti tidalalikira motsimikiza ntima maninge. Imwembo mukudziwa vomwe tidakuchitirani pakufuna kukuthandizani.
6 Mudatambira mawu mwayo mwachimwemwe chomwe mzimu uchena upereka podiya kuti mwenze pamabvuto yakulu. Pamwapa mudatewedzera isepano komasoti mudatewedzera Ambuya,
7 mwakuti mudakhala chitsanzo kwa atumiki wose wa Mulungu wa ku Makedoniya na ku Akaya.
8 Sikuti mawu ya Yahova* yochokera kwa imwepo yandobveka ku Makedoniya na ku Akaya kokha, koma kulikose wanthu ankudziwa kuti mukhulupirira Mulungu, ndipo ise tinkufunikalini kuyankhulapo chinthu.
9 Ndawa iwo ankupitiriza kunena va momwe isepano tidagumanirana na imwepo koyamba komasoti momwe imwepo mudasiyira mafano yanu nkuchungunukira kwa Mulungu, kuti mumbatumikire Mulungu chaiye wamoyo.
10 Mudachungunukira pomwe kwa Mulungu kuti mumbadikhire mwana wake kuchokera kudzulu, yemwe adamukisiwa kwa akufa. Mwana muyo ni Yesu, yemwe ankutipulumusa ku ukali womwe unkubwera.
