Kalata yoyamba yoyenda kwa Atesalonika 3:1-13
3 Manje patidakangira pomwe kupirira, tidawona kuti viri bwino kuti tipitirize kukhala ku Atene.
2 Pamwapo tidatumiza Timoteyo m’bale wathu, yemwe ni ntumiki* wa Mulungu yemwe ankulengeza ntontholo wabwino wonena va Khrisitu. Tidamutumiza kuti adzakulimbikiseni na kukunyamalisani na cholinga chakuti chikhulupiriro chanu chikhale cholimba.
3 Tidachita vimwevi kuti osati pagumanike aliyese yemwe chikhulupiriro chake chafoka na masautso mwaya. Ndawa imwepo munkudziwa kuti tingapewelini kugumana na mabvuto ninge mwaya.
4 Ndawa petenze namwe pabodzi timbakuuzirantoni kuti tidzagumane na mabvuto ndipo ninge momwe mukudziwira, vomwe timbakuuzani ndivo vomwe vachitikadi.
5 Ndipomwapa panidakangira kupirira, nidatuma Timoteyo kwa imwepo kuti nidziwe va kukhulupirika kwanu. Nenze na nkhawa kuti panango Woyesa ule adakuyesani ndipo vingachitike kuti basa yomwe tidaiphata mwakhama idandoyenda papezi.
6 Koma Timoteyo wandofika manjemanje kuno kuchokera muko ndipo watiuza nkhani yabwino yonena va kukhulupirika kwanu na chikondi chanu. Watiuza kuti munkupitiriza kutikumbukira ndipo mutikonda komasoti munkufunisisa kutiwona ninge momwe isepanombo tinkufunisisira kukuwonani.
7 Ndipomwapa abale, m’mabvuto yathu yose komasoti m’masautso yathu yose tanyamalisiwa ndawa ya imwepo komasoti ndawa ya kukhulupirika komwe mukuonesa.
8 Ndawa isepano tigumana mphanvu imwepo mukakhala olimba mwa Ambuya.
9 Ko Mulungu tingamutembeje tani kuti timubwezere ndawa ya chimwemwe chikulu chomwe tinacho pamaso pa Mulungu wathu ndawa ya imwepo?
10 Usiku na masikati tipemphera mogwigwirira kuchokera pasi pa moyo kuti tidzakuwoneni maso na maso nkukupasani vomwe vikufunika kuti chikhulupiriro chanu chikhale cholimba.
11 Manje Mulungu yemwe ni Ababa wathu komasoti Ambuya wathu Yesu atithandize kuti vikwanisike kubwera kwa imwepo.
12 Komasoti Ambuya akuthandizeni kuti mumbakondane maninge nakuti mumbakonde wanthu anango ninge momwe isepano tikukonderani.
13 Achite vimwevi kuti alimbise mitima yanu kuti mukhale mulibe chophonya, koma mukhale ochena pamaso pa Mulungu Ababa wathu pa nthawe ya kukhalapo kwa Ambuya wathu Yesu, pabodzi na ochena wake wose.
Mawu ya m’nyantsi
^ Panango kuti: “nyabasa munzake.”
