Kalata yoyamba yoyenda kwa Atesalonika 4:1-18
4 Pomalizira abale, tidakupasani malangizo ya momwe mufunika kuchitira vinthu kuti mumbakondwerese Mulungu ndipo mukuchitadi vimwevo. Manje tikukukumbirani komasoti kukugwigwirirani mu dzina ya Ambuya Yesu kuti mupitirize kuchita vimwevi kuposha momwe munkuchitira.
2 Ndawa munkudziwa malangizo* yomwe tidakupasani mu dzina ya Ambuya Yesu.
3 Mulungu akufuna kuti mukhale wochena komasoti mumbapewe chigololo.*
4 Aliyese wa imwepo ambadziwe kulamulira thupi yake kuti ikhale yochena komasoti yolemekezeka pamaso pa Mulungu.
5 Ayi kukhala ninge wanthu wamakhaindi yanango omwe adziwalini Mulungu komasoti omwe anachilakolako chomwe chilamulirikalini cha kugonana ndipo akhutirisiwalini.
6 Ayi kuti pagumanike aliyese wopweteka m’bale wake pa nkhani mweyi nkumubweresera mabvuto, ndawa Yahova* adzapereke chilango kwa munthu aliyese yemwe ankuchita vinthu vimwevi, ninge momwe tidakuuzirani kale na kukuchenjezani mwamphanvu.
7 Ndawa Mulungu alibe kutichemera kuti timbachite makhalidwe yopsyipiza, koma adatichemera kuti tikhale wochena.
8 Ndipomwapa munthu yemwe ankunyalanyaza machenjezo mwaya ankunyalanyazalini munthu, koma Mulungu yemwe akupasani mzimu wake uchena.
9 Koma pankhani ya kukonda abale, ni vosafunika kuti tichite kukunemberani ndawa imwepo, Mulungu akupfunzisani kuti mumbakondane.
10 Ndipo mukuchita kale vimwevi kwa abale wose ku Makedoniya kose. Koma tinkukulimbikisani abale kuti mupitirize kuchita vimwevi kuposha momwe munkuchitira.
11 Mumbayesese kukhala mwantendere, ayi kumbangenerera nkhani za anango ndipo mumbaphate basa na manja yanu mobverana na malangizo yomwe tidakupasani.
12 Mumbachite vimwevi kuti mukhale na makhalidwe yomwe yangachitise kuti wanthu omwe atumikiralini Mulungu ambakulemekezeni nakuti osati mumbasowe chinthu.
13 Komasoti abale, tinkufunalini kuti mukhale osadziwa pankhani ya wanthu omwe ankugona mu impfa, kuti osati mukhale na chisoni cholingana na cha wanthu omwe alibe chidikhiro.
14 Ndawa peno tikhulupirira kuti Yesu adafa nkumukisiwa, ndiye kuti Mulungu adzamukise pomwe omwe ankugona mu impfa pophatisira basa Yesu, kuti akhale naye pabodzi.
15 Vomwe tinkukuuzani mobverana na mawu ya Yahova* ni vakuti, ise omwe tikupitiriza kukhala na moyo mpakana pa nthawe ya kukhalapo kwa Ambuya, tidzakhalelini patsogolo pa omwe ankugona mu impfa.
16 Ndawa Ambuya mwawo adzabuluke kuchokera kudzulu na mawu yokuwa yolamula. Mawu yawo yadzabveke kuti ni ya nkulu wa angelo ndipo adzanyamule lupenga ya Mulungu mu djanja yawo. Ndipo omwe adafa akukhulupirira Khrisitu adzakhale oyambirira kumuka.
17 Patsogolo pake ise omwe tidzakhale tidakali na moyo, pabodzi na iwo, tidzatengewe nkuyenda m’mitambo nkukagumana na Ambuya munlengalenga ndipo timbadzakhale na Ambuya nthawe zose.
18 Ndipomwapa pitirizani kulimbikisana na mawu mwaya.
Mawu ya m’nyantsi
^ Panango kuti: “malamulo.”
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
