Kalata yoyamba ya Petulo 1:1-25
1 Inepano Petulo, ntumi wa Yesu Khrisitu, ninkunembera imwepo osankhuliwa na Mulungu, omwe ndimwe alendo mu dziko iyi, ndipo mwamwazika ku Ponto, Galatiya, Kapadokiya, Ásia na Bituniya.
2 Ninkunembera imwepo omwe Mulungu Ababa adadziwiratu va imwepo. Iye adakupasani mzimu wake kuti mukhale ochena. Adachita vimwevi kuti mukhale obvera nakuti akucheneseni na magazi ya Yesu Khrisitu.
Ninkukumbira Mulungu kuti akuwoneseni chifundo chake chikulu nakuti mukhale na ntendere.
3 Atamandike Mulungu wa Ambuya wathu Yesu Khrisitu, yemwe ni Ababa wake pomwe. Mulungu adatiwonesa chifundo chikulu pomwe adachitisa kuti tibadwepomwe nkukhala na chidikhiro chothembeka. Vimwevi vidakwanisika ndawa ya kumukisiwa kwa Yesu Khrisitu.
4 Adachitisa kuti tibadwepomwe kuti titambire vinthu vomwe tidasungiriwa vosadzongeka, vosapsyipiziwa komasoti vosasukuluka. Vinthu vimwevi adakusungirani kudzulu.
5 Adasungira imwepo omwe Mulungu akukutetezani na mphanvu yake ndawa muli na chikhulupiriro. Mulungu akutetezeni kuti mudzapulumusiwe, ndipo chipulumuso chimwechi chidzawonekere mu nthawe yamapeto.
6 Ndipomwapa, munkukondwa maninge podiya kuti manjeuno ni vofunika kuti mubonere kwa kanthawe ndawa ya mayesero yosiyanasiyana yomwe munkugumana nayo.
7 Vimwevi vinkukuchitikirani kuti chikhulupiriro chanu chidzachitise kuti mutamandiwe komasoti kutambira ulemerero na ulemu, Yesu Khrisitu akadzawonekera. Chikhulupiriro chanu mwicho chayesewa ndipo ni chofunika maninge kuposha golide yemwe adzongeka basi podiya kuti udapita pamoto.
8 Podiya kuti imwepo mukanati mwamuwonako Khrisitu, mumukonda. Olo kuti munkumuwonalini manjeuno, mumukhulupirira ndipo munkukondwa maninge,
9 ndawa ndimwe otsimikiza kuti chikhulupiriro chanu chidzachitise kuti mupulumuke.
10 Aneneri omwe adaneneratu va kukoma ntima kukulu komwe Mulungu adakuwonesani, adafagafaga va chipulumuso chimwechi mwakhama na mosamala maninge.
11 Mzimu uchena wenze udaneneratu kuti Khrisitu adzabonere ndipo patsogolo pake adzatambire ulemerero. Aneneri ambafagafaga vizindikiro vomwe mzimu uchena udawawonesa pankhani ya nthawe chaiyo yomwe vimwevi vidzachitike.
12 Mulungu adauza aneneri mwawo kuti ambadzitumikiralini okha, koma ambatumikira imwepo. Manje vinthu vimwevi vaululiwa na wanthu omwe ankulengeza ntontholo wabwino kwa imwepo mothandiziwa na mzimu uchena wochokera kudzulu. Angelo afunisisa kubvesa vinthu vimwevi.
13 Ndipomwapa konzekeresani maganizo yanu kuti muphate basa mwamphanvu. Mupitirize kukhala oganiza bwino ndipo mumbadikhire na ntima wose kukoma ntima kukulu komwe adzakuwoneseni Yesu Khrisitu akadzawonekera.
14 Ninge wana obvera, lekani kuchita vinthu motewedza vomwe mumbafunisisa mukanati kudziwa Mulungu.
15 Koma molingana na Wochena yemwe adakuchemerani, imwembo khalani ochena mu makhalidwe yanu yose,
16 ndawa Malemba yanena kuti: “Mukhale ochena, ndawa inepano ndine wochena.”
17 Ndipo peno munkukumbira vinthu kwa Ababa, womwe aweruza mosakondera mobverana na vomwe aliyese achita, mumbachite vinthu vowonesa kuti mugopa Mulungu pomwe munkukhala mu dziko iyi ninge alendo.
18 Imwepo munkudziwa kuti vinthu vomwe vidakumasulani ku moyo wanu ulibe phindu womwe mudatengera kwa azibereki wanu, venzelini vinthu vakuti vingadzongeke ninge siliva panango golide.
19 Koma mudamasuliwa na magazi ya Khrisitu yodula maninge, yomwe ni yolingana na magazi ya nkhosa iri bwinobwino na yosapunduka.
20 Shuwadi, Mulungu adasankhuliratu Khrisitu wanthu akanati kuyamba kubalana padziko yapasi, koma adawonekera panthawe yamapeto ndawa ya imwepo.
21 Kupitira mwa iye, munkukhulupirira Mulungu yemwe adamukisa Yesu kwa akufa na kumupasa ulemerero, na cholinga chakuti chikhulupiriro komasoti chidikhiro chanu vikhale mwa Mulungu.
22 Pakuti mwadzichenesa pakukhala obvera chonadi cha m’Mawu ya Mulungu ndipo manjeuno mukonda abale mwachilungamo, mumbakondane maninge kuchokera pasi pamoyo.
23 Imwepo mwabadwa pomwe kupitira mu mawu ya Mulungu wamoyo yemwe wakhalako mpakana kalekale. Mulibe kubadwa kuchokera mu mbewu yomwe ingadzongeke, koma mu mbewu yomwe ingadzongekelini.
24 Pakuti “wanthu wose ali ninge uswa, ndipo ulemerero wawo wose uli ninge fololi yakuthengo. Uswa ufota ndipo fololi ithodoka,
25 koma mawu ya Yahova* yadzakhaleko mpaka kalekale.” “Mawu” mwaya ni ntontholo wabwino womwe udalengezewa kwa imwepo.
Mawu ya m’nyantsi
^ Onani vakumapeto A5.
