Kalata yoyamba ya Petulo 2:1-25
2 Manje siyani voipa vose, viribe chilungamo, ntsanje komasoti khokolo ya khaindi iriyose.
2 Koma ninge wana omwe abadwa manjemanje, mumbafunisise nkaka wosasungunula womwe uli m’Mawu ya Mulungu. Mukambamwa nkaka muyo, ukuthandizeni kuti mukule nkukhala woyenerera kupulumusiwa.
3 Vimwevi vingakwanisike peno mungalawe nkuwona kuti Ambuya ni wabwino ntima.
4 Pomwe munkubwera kwa Ambuya, yemwe ni mwala wamoyo womwe wanthu adaulamba, koma womwe Mulungu adausankhula, womwe ni wofunika pomwe kwa Mulungu,
5 imwembo ninge minyala yamoyo mukumangiwa nkukhala nyumba yauzimu kuti mudzakhale antsembe ochena. Ninge antsembe ochena mumbadzapereke ntsembe zauzimu zobvumizika pamaso pa Mulungu kupitira mwa Yesu Khrisitu.
6 Pale Lemba inena kuti: “Inepano ninkuikha mwala wosankhuliwa mwapadera mu Ziyoni. Moyu ni mwala wapakhona ya fundasau, womwe ni wofunika maninge, ndipo aliyese wokhulupirira mwala muyo adzakhumudwelini.”
7 Ndipomwapa iye ni wofunika maninge kwa imwepo ndawa mumukhulupirira. Koma kwa omwe amukhulupiriralini, “mwala womwe womanga nyumba adaulamba, wakhala mwala wapakhona wofunika maninge.”
8 Wakhala pomwe “mwala wokhukhumudwisa na mwala ukulu wokalipisa.” Wanthu mwawa ankukhukhumudwa ndawa abveralini mawu, ndipo vimwevi ndivo vomwe vifunika kuwachitikira.
9 Koma imwepo ndimwe “dzinza yosankhuliwa mwapadera, antsembe wachifumu, ntundu wochena na wanthu wakuti adzakhale chuma chapadera. Mwasankhuliwa kuti mulengeze makhalidwe yabwino maninge” ya Mulungu yemwe adakuchemerani kuti muchoke mu mdima ndipo adakutambirani mu kugwerewera kwake kodabwisa.
10 Poyamba mwenzelini wanthu wa Mulungu, koma manjeuno ndimwe wanthu wake. Mulungu wenze akanati kukuchitirani chifundo, koma manjeuno wakuchitirani chifundo.
11 Abale apamoyo, pakuti ndimwe alendo komasoti wanthu osakhalisa mu dziko iyi, ninkukudandaulirani kuti mumbapewe kufunisisa vinthu voipa vomwe viri pankhondo yolimbana namwe.
12 Mukhale na khalidwe yabwino kwa wanthu wa mudziko iyi, kuti akambakunenani kuti muchita vinthu voipa, ambawone okha vochita vanu vabwino kuti patsogolo pake adzatamande Mulungu pantsiku yake yoyendeza.
13 Mumbachite vomwe Ambuya afuna pakubvera ulamuliro uliwose wokhazikisiwa na wanthu. Mumbabvere mpfumu ndawa inaudindo ukulu,
14 komasoti atumiki wa mpfumu ndawa atumiwa na mpfumu mwiyo kuti akalange wanthu omwe achita voipa na kutembeja omwe achita vabwino.
15 Mulungu afuna kuti mumbachite vabwino kuti muwafunge pakamwa wanthu omwe ayankhula mosowa nzeru ndawa ya ubulutu.
16 Muli na ufulu, koma osati mumbaphatise basa ufulu wanu muyo ninge pobishalira* pakuchita voipa, koma mumbauphatise basa pakutumikira Mulungu.
17 Mumbalemekeze wanthu wamakhaindi yose. Mumbakonde gulu yose ya abale, mumbagope Mulungu komasoti mumbalemekeze mpfumu.
18 Anyabasa ambabvere mabwana yawo ndipo ambawalemekeze maninge. Osati ambandochita vimwevi kwa mabwana yabwino na yomwe yabvako maganizo ya anango okha, koma ambachite pomwe vimwevi kwa mabwana yomwe ni yoshupa kuyakondweresa.
19 Peno munthu ankupirira pomwe ankudzudziwa komasoti kugumana na mabvuto* ndawa yobvera Mulungu, Mulungu akondwera naye.
20 Ko kupirira pomwe munkumenyewa ndawa yakuti mwachimwa kuli na phindu yanyi? Koma Mulungu akondwa mukambapirira mabvuto ndawa yakuti munkuchita vabwino.
21 Ndipo Mulungu adakuchemerani kuti mufambe munjira mweyi. Pale olo Khrisitu adabonera ndawa ya imwepo, ndipo adakusiyirani chitsanzo kuti mulondole mapazi yake mosamala maninge.
22 Iye alibe kuchita chimo ndipo alibe kunenako mawu yalibe chilungamo.
23 Pomwe wanthu ambamunena mawu yoipa,* alibe kubwezera. Pomwe angadzudziwa, alibe kuwagopsya wanthu omwe angamudzudza. Koma adasiya vose m’manja mwa Woweruza yemwe aweruza mwachilungamo.
24 Iye adatakula machimo yathu m’thupi yake pomwe adamukhomerera pamuti. Adachita vimwevi kuti tipulumusiwe ku uchimo nkumbachita vinthu vachilungamo. Ndipo “mudapolesewa na vilonda vake.”
25 Poyamba mwenze ninge nkhosa zosokera, koma manjeuno mwabwerera kwa nyakabusa wanu na wonyang’anira moyo wanu.
Mawu ya m’nyantsi
^ Panango kuti: “kudziikhira kumbuyo.”
^ Panango kuti: “vokwinyiririsa; vowawa.”
^ Panango kuti: “yonyoza.”
