Kalata yoyamba ya Petulo 3:1-22
3 Molingana na vimwevi, imwepo akazi mumbabvere amuna wanu kuti peno afunalini kubvera Mawu ya Mulungu, atengeke na khalidwe yanu, osati na mawu yanu yokha,
2 koma ndawa yakuti awona khalidwe yanu yabwino komasoti ulemu wanu ukulu.
3 Kudzikhuzisa kwanu osati kukhale kwa kunja kokha ninge kumanga tsitsi, kuvala vodzikhuzisira vagolide panango vovala vodula.
4 Koma kukhale pomwe kwa munthu wobisika muntima, ali vale vovala vosadzongeka, vomwe ni ntima wodekha komasoti wopfatsa womwe ni wofunika maninge pamaso pa Mulungu.
5 Ni momwembo ambadzikhuzisira akazi okhulupirika wakalekale, omwe ambadikhira Mulungu. Akazi mwawa ambabvera amuna wawo.
6 Mwakulinganiza, Sara ambabvera Abulahamu ndipo ambamuchemera kuti “mbuya wangu.” Manje imwepo mwakhala wana wake, ndipo mupitirize kukhala wana wake mukambachita vabwino komasoti peno mukugopalini chirichose.
7 Imwembo amuna, pitirizani kuwadziwa* bwino akazi wanu. Mumbawapase ulemu ndawa akazi ali ninge chombo chomwe chidizalini kuphwanyika. Mumbachite vimwevi kuti mapemphero yanu osati yafungiwe, ndawa mudzatambire nawo pabodzi moyo womwe Mulungu adzakupaseni ndawa ya kukoma ntima kwake kukulu.
8 Pomalizira, mose imwepo mukhale na maganizo yabodzi,* mumbabverane ntsisi, mumbakonde abale, mukhale na chifundo chikulu komasoti mukhale odzichepesa.
9 Munthu akakuchitirani choipa ayi kubwezera na choipa, akakuchitirani chipiringu ayi kubwezera chipiringu. Koma mumbawachitire vabwino ndawa Mulungu adakusankhulani kuti mumbadalise anango kuti nayembo adzakudaliseni.
10 Munthu “yemwe akonda moyo wake komasoti afuna kukhala na moyo wabwino, afunika kusamala kuti osati ambayankhule voipa na lilimi yake komasoti kuti osati ambayankhule vinthu viribe chilungamo na milomo yake.
11 Afunika kusiya kuchita voipa nkumbachita vabwino. Afunika pomwe kuyesesa kumbakhala mwantendere na anango komasoti kuulimbikisa.
12 Maso ya Yahova* yali pa wanthu omwe achita vinthu mwachilungamo, ndipo matu yake yakubva mapemphero yawo yogwigwirira, koma Yahova* akalipa na wanthu omwe achita voipa.”
13 Shuwadi, ko ni mbani angakuchitireni voipa mukambayesesa kuchita vabwino?
14 Koma olo mubonere ndawa yochita vinthu mwachilungamo, mupitiriza kukhala okondwa. Ayi kumbagopa vomwe iwo agopa* ndipo ayi kumbakhala na nkhawa ndawa ya vimwevo.
15 Koma mutsimikizire muntima mwanu kuti Khrisitu ni Ambuya komasoti kuti ni wochena. Nthawe zose mumbakhale okonzeka kudawira aliyese yemwe wakubvunzani va chidikhiro chanu, koma mumbawadawire modekha na mwaulemu maninge.
16 Mumbakhale na chikumbuntima chabwino, kuti peno wanthu akukunenerani vinthu voipa, omwe akukunenerani voipa mwawo adzachite manyazi ndawa ya khalidwe yanu yabwino ninge wanthu omwe mutewera Khrisitu.
17 Viribwino kubonera ndawa yochita vabwino, peno Mulungu wabvuma kuti vimwevo vichitike, kusiyana na kubonera ndawa yochita vinthu voipa.
18 Pale olo Khrisitu adafa kabodzi kokha kuti achose uchimo. Ndipo munthu wolungama muyo adafera wanthu osalungama kuti akubveraniseni na Mulungu. Iye adaphewa ninge munthu, koma adamukisiwa ninge mzimu.
19 Patsogolo pake adayenda kukalengeza ntontholo wachiweruzo kwa mizimu yomwe yenze mudjeri.
20 Mizimu mwayo yalibe kubvera Mulungu panthawe yomwe ambawonesa kudekha muntsiku za Nowa. Panthawe mwiyo, Nowa angakonza chingalawa chomwe chidapulumusa pamadzi wanthu ang’onong’ono, okwana 8 basi.
21 Manje ubatizo, womwe unkulingana na chingalawa, unkupulumusa pomwe imwepo (osati kundochosa shuju* ya m’thupi, koma kukumbira Mulungu kuti akupaseni chikumbuntima chabwino) ndawa mukhulupirira Yesu Khrisitu yemwe adamukisiwa.
22 Iye adayenda kudzulu ndipo ali kudjanja yamakulu ya Mulungu mwakuti adamukwiza kuti maulamuliro, mphanvu komasoti angelo vimbatongewe na iye.
Mawu ya m’nyantsi
^ Panango kuti: “kuwaganizira; kuwabvesa.”
^ Panango kuti: “yobverana.”
^ Onani vakumapeto A5.
^ Onani vakumapeto A5.
^ Mabaibolo yanango yanena kuti: “ayi kumbagopa akambakugopsyani.”
^ Panango kuti: “lusa.”
