Kalata yoyamba ya Petulo 4:1-19
4 Pakuti Khrisitu adabonera pa nthawe yomwe wenze munthu, namwembo konzekerani pakukhala na maganizo yolingana na yomwe Khrisitu wenze nayo. Viriteno ndawa munthu yemwe akubonera ndiye kuti adasiya kuchita machimo.
2 Adachita vimwevi kuti pa nthawe yose yomwe anamoyo osati ambachite vofuna va wanthu koma va Mulungu.
3 M’mambuyo umu mumbandokhalira kuchita vofuna va wanthu wa mudziko iyi. Pa nthawe mweyo mumbachita khalidwe yochitisa manyazi, mumbafunisisa voipa, mumbamwa maninge vinyu, mumbakonda mafesta* yoipa,* mumbachita mipikisano yakumwa mowa na kutumikira mafano, komwe kwenze kusabvera malamulo.
4 Ndawa yakuti mudasiya kuthamanga nawo pabodzi mu vimatika vopasa nyantsi va makhalidwe yoipa, wanthu wamudziko iyi akubvesanilini, ndipomwapa akunyozani.
5 Koma wanthu mwawa adzadawire mulandu kwa Khrisitu yemwe adzaweruze wanthu amoyo na akufa.
6 Ndipomwapa ntontholo wabwino udalengezewa pomwe kwa akufa, kuti olo akuweruziwa molingana na momwe akuwonekera, mobverana na kuwona kwa wanthu, akhale na moyo mwa mzimu mobverana na kuwona kwa Mulungu.
7 Koma mapeto ya vinthu vose yafendera. Ndipomwapa khalani oganiza bwino,* ndipo khalani maso kuti osati munyalanyaze kupemphera.
8 Kuposha vose, mumbakondane maninge ndawa chikondi chifuchira machimo yazinji.
9 Mumbatambirane bwino ndipo ayi kumbadandaula pakuchita vimwevi.
10 Aliyese pagulu yanu adatambira mphaso, ndipomwapa mumbaphatise basa mphaso zanu mwizo pakutumikirana. Mumbachite vimwevi ninge atumiki omwe athandiza anango kuti aphindule na kukoma ntima kukulu kwa Mulungu, komwe akuwonesa munjira zosiyanasiyana.
11 Peno munango anamphaso ya kuyankhula, ambayankhule mobverana na mawu yopatulika ya Mulungu. Peno munango akutumikira anango, ambawatumikire mothemba mphanvu yomwe Mulungu apereka. Ambachite vimwevi kuti Mulungu alemekezeke mu vinthu vose kupitira mwa Yesu Khrisitu. Ulemerero na mphanvu ni vake mpakana kalekale. Ame.
12 Abale wapamoyo, ayi kudabwa na mayesero yogaka moto yomwe munkugumana nayo ninge kuti munkugumana na chinthu chachilendo.
13 Koma mumbakondwe ndawa munkugumana na mayesero yolingana na yomwe Khrisitu adagumana nayo kuti mudzakondwembo maninge pa nthawe yomwe ulemerero wake udzawonekere.
14 Ndimwe okondwa peno wanthu ankukunyozani* ndawa ya dzina ya Khrisitu, ndawa vimwevi vikuwonesa kuti mzimu uchena wa Mulungu na ulemerero wake viri na imwepo.
15 Koma nikufunalini kuti pagulu yanu pagumanike munthu yemwe akubonera ndawa yakuti wayamba kuba, kupha wanthu, kuchita voipa panango ndawa yakuti akungenerera nkhani za anango.
16 Koma peno munango akubonera ndawa yakuti ni Mkhrisitu, ayi kuti achite manyazi, koma apitirize kulemekeza Mulungu ndipo achite vimwevi akupitiriza kudziwika ninge Mkhrisitu.
17 Ino ndiyo nthawe yomwe Mulungu adasankhuliratu kuti apereke chiweruzo, ndipo chiyambire panyumba yake. Koma peno chikuyambira pa isepano, manje ko wanthu osabvera ntontholo wabwino wa Mulungu vidzawamalire tani?
18 “Manje peno munthu wolungama angadzapulumuke moshupikira, ko chidzachitike nchani kwa munthu wosagopa Mulungu na kwa wochimwa?”
19 Ndipomwapa omwe akushupika ndawa yakuti akuchita vinthu vomwe Mulungu afuna, apereke moyo wake kwa Mulengi wathu yemwe ni wokhulupirika nkumbapitiriza kuchita vabwino.
Mawu ya m’nyantsi
^ Panango kuti: “maphwando.”
^ Panango kuti: “yazungo.”
^ Panango kuti: “tcheru.”
^ Panango kuti: “kukufumulani.”
