Kalata yoyamba ya Petulo 5:1-14
5 Ndipomwapa, ine ninge nkulu munzanu, yemwe nidawona momwe Khrisitu adashupikira komasoti ninkudikhira kudzatambira nawo ulemerero womwe udzawonekere, nikukumbira akulu omwe ali pagulu yanu kuti:
2 Busani gulu ya nkhosa za Mulungu zomwe ziri m’manja mwanu. Ninge onyang’anira, mumbaphate basa yanu, osati mochichimizika koma mofunisisa ninge atumiki wa Mulungu. Mumbaiphate na moyo wose, osati ndawa yofuna kuphindulapo chinthu.
3 Ayi kumbachita vinthu ninge mafumu pagulu ya wanthu wa Mulungu, koma mumbawonese chitsanzo chabwino kwa gulu ya nkhosa.
4 Ndipo nyakabusa nkulu akadzawonekera, mudzatambire malipiro ya ulemerero yomwe yangadzongekelini.
5 Nchibodzibodzi pomwe imwepo alumbwana na atsikana, mumbabvere amuna achikulire.* Ndipo mose imwepo mumbachite vinthu modzichepesa,* ndawa Mulungu akondwalini na wanthu odzikwiza. Koma odzichepesa awawonesa kukoma ntima kwake kukulu.
6 Ndipomwapa dzichepeseni pamaso pa Mulungu wathu wamphanvu kuti adzakukwizeni nthawe yake ikadzakwana.
7 Mumbachite vimwevi pomwe munkumutulira nkhawa zanu zose, ndawa iye akuikhirani nzeru.
8 Pitirizani kukhala oganiza bwino ndipo khalani tcheru ndawa mzondi wanu Ndyerekezi ankufambafamba ninge mphondolo yobangula, kuti idye chinthu.
9 Ndipomwapa mukhale na chikhulupiriro cholimba ndipo mulimbane naye, pakudziwa kuti abale wanu padziko yose ankugumanambo na mabvuto ninge mwaya.
10 Mukashupika mu nthawe ing’ono, Mulungu yemwe awonesa kukoma ntima kose kukulu, yemwe adakuchemerani kuti mukhale obverana na Yesu Khrisitu komasoti kuti mutambire ulemerero wosapera, adzamalizise kukupfunzisani. Iye adzakupaseni mphanvu, adzakuthandizeni kuti mupitirize kukhala okhulupirika ndipo adzakulimbiseni.
11 Mphanvu ni zake mpakana kalekale. Ame.
12 Nakunemberani kalata yachigwato mweyi pophatisira basa Silivano,* m’bale yemwe ninkumuwona kuti ni wokhulupirika. Nakunemberani vimwevi kuti nikulimbikiseni na kukutsimikizirani kuti kukoma ntima kukulu kwa Mulungu ni kumoku, ndipo mukuphate mwamphanvu.
13 Mayi* yemwe ali ku Babulo, yemwe Mulungu adamusankhula mwapadera ninge imwepo, komasoti mwana wangu Maliko, ankupereka moni.
14 Pasanani moni mwachikondi.*
Imwepo mose omwe ndimwe obverana na Khrisitu, mukhale na ntendere.
Mawu ya m’nyantsi
^ Panango kuti: “akulu.”
^ Panango kuti: “na maganizo yodzichepesa.”
^ Yemwe achemerewa pomwe kuti: “Sila.”
^ Vingachitike kuti mawu mwaya yakuti “mayi,” yakutanthauza mpingo.
^ Panango kuti: “popasana bejo mwachikondi.”
