Kalata yoyamba yoyenda kwa Timoteyo 1:1-20
1 Ndine Paulo, ntumi wa Yesu Khrisitu molamuliwa na Mulungu yemwe ni Mpulumusi wathu komasoti molamuliwa na Yesu Khrisitu, yemwe ni chidikhiro chathu.
2 Ninkunembera iwepo Timoteyo,* mwana wangu chaiye mu chikhulupiriro kuti:
Mulungu Ababa wathu na Yesu Khrisitu Ambuya wathu akupase kukoma ntima kukulu, chifundo na ntendere.
3 Panidakhala pang’ono kuyenda ku Makedoniya, nidakukumbira kuti upitirize kukhala ku Efeso. Ninkukukumbira pomwe kuti upitirize kukhala kumuko na cholinga chakuti ulambize wanthu anango kuti osati ambapfunzise vosiyana na vomwe tipfunzisa,
4 komasoti kuti osati ambabvere nkhani zonama na kukumbana mibadwo ya azibereki. Vimwevi ni vosathandiza, koma vindoyambisa nkhani zilibe na umboni ndipo zipfunzisalini wanthu chilichose chochokera kwa Mulungu pankhani ya chikhulupiriro.
5 Cholinga cha malangizo* mwaya ni chakuti tikhale na chikondi chochokera muntima wochena, muchikumbuntima chabwino komasoti muchikhulupiriro chaicho.
6 Wanthu anango alamba kutewedza vimwevi ndipo asokeresewa nkuyamba kutewedza nkhani zilibe na basa.
7 Wanthu mwawa afuna kukhala apfunzisi wa chilamulo koma abvesalini vomwe ankunena panango mpfundo zomwe ankuzingingimira.
8 Tinkudziwa kuti Chilamulo ni chabwino peno munthu ankuchiphatisa basa bwino.
9 Ndipo lamulo iyikhiwalini ndawa ya munthu wolungama. Koma iyikhiwa ndawa ya wanthu osabvera malamulo, opanduka, osagopa Mulungu, ochimwa, osakhulupirika,* onyoza vinthu vopatulika, akupha ababa na amayi wawo, akupha wanthu,
10 achigololo,* amuna omwe agonana na amuna anzawo, akuba wanthu, abodza, olumbira monama komasoti wochita chilichose chosabverana na mpfundo chaizo* zomwe Mulungu apfunzisa.
11 Mpfundo zimwezi ni zobverana na ntontholo wabwino waulemerero wochokera kwa Mulungu wachimwemwe, womwe adauikha m’manja mwangu.
12 Ninkutembeja Yesu Khrisitu Ambuya wathu, womwe adanipasa mphanvu nkunipasa pomwe utumiki ndawa adawona kuti ndine wokhulupirika.
13 Adachita teno olo kuti kalekale nenze wonyoza Mulungu, wodzudza wanthu wake komasoti wachipiringu. Koma olo nteno, adanichitira chifundo ndawa nimbadziwalini panimbachita vimwevi komasoti nenze nilibe chikhulupiriro.
14 Koma nidatambira kukoma ntima kukulu kwa Mulungu Ambuya wathu. Nidatambira pomwe chikhulupiriro na chikondi cha Yesu Khrisitu.
15 Mawu yakuti Yesu Khrisitu adabwera m’dziko kudzapulumusa ochimwa, ni chaiyo komasoti ni yofunika kuyabvuma na ntima wose. Pa ochimwa mwawa, inepano ndine wochimwa maninge.
16 Koma olo nteno, nidachitiriwa chifundo kuti Yesu Khrisitu awonese kudekha kwake kupitira mwa inepano wochimwa maninge, kuti chikhale chitsanzo kwa omwe adzamukhulupirire na cholinga chakuti adzagumane moyo wosapera.
17 Kwa Mulungu yemwe ndiye yekha Mpfumu mpakana kalekale, yemwe akufalini na wosawoneka, kukhale ulemu na ulemerero mpakana kalekale. Ame.
18 Mwana wangu Timoteyo, nidakupasa malangizo* kuti umbachite vimwevi mobverana na maulosi yomwe yadaneneratu va iwepo, kuti mobverana na maulosi mwayo upitirize kumenya nkhondo yabwino.
19 Ukhale na chikhulupiriro komasoti chikumbuntima chabwino chomwe wanthu anango aleka kuchitewedza, mwakuti chikhulupiriro chawo chaphwanyika ninge barko.
20 Anango pa wanthu mwawa ni Hemenayo na Alekizanda, ndipo nawapereka kwa Satana kuti akalangiwa apfunzirepo kanthu nkuleka kunyoza Mulungu.
Mawu ya m’nyantsi
^ Kutanthauza “yemwe alemekeza Mulungu.”
^ Panango kuti: “malamulo.”
^ Panango kuti: “alibe chikondi.”
^ Onani matanthauzo ya mawu yanango.
^ Panango kuti: “zothandiza.”
^ Panango kuti: “malamulo.”
