Kalata yoyamba yoyenda kwa Timoteyo 2:1-15
2 Chakuyamba ninkulimbikisa wanthu wose kuti ambapemphere, kupereka mapemphero yogwigwirira, kupemphererana komasoti kupereka mapemphero yotembeja Mulungu m’malo mwa wanthu osiyanasiyana.
2 Komasoti m’malo mwa mafumu na wanthu wose waudindo wapadzulu, kuti tipitirize kukhala odekha, wantendere komasoti odzipereka maninge kwa Mulungu na oganiza bwino.
3 Vimwevi ni vabwino na vobvumizika kwa Mulungu, yemwe ni Mpulumusi wathu,
4 yemwe afuna kuti wanthu osiyanasiyana apulumuke nkukhala odziwa chonadi bwinobwino.
5 Ndawa pali Mulungu m’bodzi komasoti mkhalapakati m’bodzi pakati pa Mulungu na wanthu. Mkhalapakati moyu ni Yesu Khrisitu, munthu
6 yemwe adadzipereka kuti akhale malipiro ya wanthu wose yokwanira ndendende. Vimwevi ndivo vati vidzachitiriwe umboni pa nthawe yake.
7 Ndawa ya umboni moyu, inepano nidasankhuliwa kuti nikhale mlaliki na ntumi. Ninkunena vazedi, ninkunamalini neye. Nidasankhuliwa kuti nimbapfunzise wanthu wamakhaindi yanango va chikhulupiriro na chonadi.
8 Ndipomwapa, ninkufuna kuti kulikose amuna apitirize kupemphera. Ambakwize manja m’dzulu mokhulupirika kwa Mulungu, palibe kukalipa na kutsutsana.
9 Nawombo akazi afunika kudzikhuzisa na vovala voyenera,* pakuvala mwaulemu komasoti mwanzeru, osati kumbandodzikhuzisa na madeko* yomangira tsitsi, golide, minyala yodula na vovala vodula maninge.
10 Koma ambadzikhuzise mobverana na momwe akazi odzipereka kwa Mulungu afunika kudzikhuzisira. Ambadzikhuzise na basa zabwino.
11 Pakupfunzira, nkazi ambakhale chete* ndipo ambabvere na moyo wose.
12 Ninkubvumidzalini kuti nkazi ambapfunzise panango kutonga mwamuna, koma ambakhale chete.*
13 Ndawa Adamu ndiye adayamba kukonzewa nkubwera bwino Hava.
14 Ndipo Adamu alibe kupumpsiwa, koma nkazi ndiye adapumpsiwa ndipo adachimwa.
15 Koma olo nteno, nkazi adzatetezeke akabereka wana peno ankupitiriza kukhala na chikhulupiriro, chikondi komasoti kukhala wochena na woganiza bwino.
Mawu ya m’nyantsi
^ Panango kuti: “vopasa ulemu.”
^ Panango kuti: “mafasho.”
^ Panango kuti: “zii.”
^ Panango kuti: “zii.”
