Kalata yoyamba yoyenda kwa Timoteyo 4:1-16
4 Koma mawu youziriwa yanena mobveka bwino kuti nthawe inango kutsogolo, chikhulupiriro cha wanthu anango chidzamale ndawa yobvesera mawu youziriwa yomwe ni yosokeresa, komasoti vinthu vomwe viwanda vipfunzisa.
2 Vimwevi vidzachitike pomwe ndawa ya kusowa chilungamo kwa wanthu oyankhula mabodza omwe chikumbuntima chawo chiri ninge chipsanga chobwera ndawa ya kupsa na chisimbi cha moto.
3 Wanthu mwawa alambiza kulowola, ndipo alamula wanthu kuti ambadzimane vakudya vomwe Mulungu adavilenga kuti wanthu omwe anachikhulupiriro komasoti odziwa bwino chonadi ambadye na kutembeja Mulungu.
4 Ndawa chirichose cholengewa na Mulungu ni chabwino, ndipo palibe chomwe chifunika kulambiwa peno munthu wayamika kwa Mulungu pakudya,
5 pakuti chichenesewa na mawu ya Mulungu komasoti pemphero.
6 Ukambapereka malangizo mwaya kwa abale, udzakhale ntumiki wabwino wa Yesu Khrisitu ndipo udzakule bwino na mawu ya chikhulupiriro na chipfunziso chabwino chomwe wachitewedza mosamala.
7 Koma umbapewe nkhani zonama zosalemekeza Mulungu ninge zomwe amayi anango okalamba akamba. Koma, umbadzipfunzise na cholinga chakuti upitirize kukhala wodzipereka kwa Mulungu.
8 Ndawa kuchita masenzeka yolimbisa thupi ni kothandiza pang’ono, koma kukhala wodzipereka kwa Mulungu ni kothandiza pa vinthu vose, ndawa kuphatanidzapo polomisi ya moyo wathu manjeuno na moyo womwe unkubwera.
9 Mawu mwaya ni yazedi ndipo ni yofunika kuyabvuma na moyo wose.
10 Ndipomwapa, tinkuphata basa mwakhama komasoti mwamphanvu, ndawa chidikhiro chathu chili mwa Mulungu wamoyo, yemwe ni Mpulumusi wa wanthu wose, koma makamaka omwe ni okhulupirika.
11 Pitiriza kuwapfunzisa na kuwalamula kuti ambachite vimwevi.
12 Ayi kubvuma kuti munthu aliyese akuderere pakuwona kuti ndiwe mng’ono. Koma, ukhale chitsanzo kwa okhulupirika pa vomwe uyankhula, makhalidwe yako, chikondi, chikhulupiriro na khalidwe yochena.*
13 Pomwe unkunidikhirira, pitiriza kukhala wodzipereka powerenga pagulu, polimbikisa wanthu komasoti popfunzisa.
14 Ayi kumbanyalanyaza mphaso yomwe Mulungu adachita kuneneratu kuti udzakhale nayo panthawe yomwe bungwe ya akulu idakudalisa.
15 Umbaganizire mwamphanvu* vinthu vimwevi ndipo umbavichite modzipereka kuti wanthu wose awone kuti unkupita patsogolo.
16 Nthawe zose umbasamale na vomwe uchita komasoti vomwe upfunzisa. Pitiriza kuchita vimwevi, ndawa ukachita teno udzadzipulumuse wekha komasoti wanthu okubvera.
