Kalata yoyamba ya Yohani 1:1-10
1 Tinkukunemberani va yemwe wenzepo kundoyambira pakuyamba, yemwe abweresa mawu yopasa moyo, yemwe tidamubva na kumuwona na maso yathu, yemwe tamunyang’anisisa mwachidwi komasoti kumugumirira na manja yathu.
2 (Isepano tawona ndipo tinkuchitira umboni na kukuuzani va moyo wosapera womwe udachokera kwa Ababa ndipo udawonesewa kwa isepano.)
3 Vomwe taviwona komasoti kuvibva, tinkukuuzani kuti imwembo mubverane nase. Ndipo ndise obverana na Ababa komasoti Mwana wake Yesu Khrisitu.
4 Ndipomwapa tinkunemba vimwevi kuti tikhale wokondwa maninge.
5 Isepano tabva ntontholo kuchokera kwa iye ndipo tinkuulengeza kwa imwepo. Ntontholo wake ni wakuti: Mulungu ndiye kugwerewera ndipo kwa iye kulibe mdima olo pang’ono.
6 Peno tinkunena kuti: “Ndise wobverana naye,” koma tinkupitiriza kufamba mumdima, ndiye kuti tinkunama ndipo tinkuchitalini vinthu mobverana na chonadi.
7 Koma peno tinkufamba mukugwerewera molingana na momwe iye aliri mukugwerewera, ndiye kuti ndise wobverana ndipo magazi ya Yesu, yemwe ni Mwana wake, yankutichenesa ku machimo yose.
8 Tikambanena kuti: “Tiribe uchimo,” ndiye kuti tinkudzinamiza ndipo muntima mwathu mulibe chonadi.
9 Mulungu ni wokhulupirika komasoti wolungama, ndipomwapa tikambabvuma kuti taphonyesa, adzatikhululukire na kutichenesa kubasa zose zoipa.
10 Tikambanena kuti: “Tiribe kuchimwa,” viri ninge tinkunena kuti Mulungu ni wabodza, ndipo muntima mwathu mulibe mawu yake.
