Kalata yoyamba ya Yohani 2:1-29
2 Wana wangu wapamoyo, ninkukunemberani vinthu vimwevi kuti osati muchite chimo. Koma olo nteno, munango akachita chimo, tinaye wotithandiza wolungama, Yesu Khrisitu yemwe ali pabodzi na Ababa.
2 Iye adakhala ntsembe yobisa machimo yathu. Osati yathu yokha, komasoti ya dziko yose yapasi.
3 Tingawonese kuti tinkumudziwa peno tingapitirize kuphatisa basa malamulo yake.
4 Munthu yemwe anena kuti: “Inepano nikumudziwa,” koma nkumbakangira kuphatisa basa malamulo yake ni wabodza ndipo alibe chonadi muntima mwake.
5 Koma aliyese wophatisa basa mawu ya Yesu Khrisitu, awonesa kuti amukondadi Mulungu. Ndawa ya vimwevi, tidziwa kuti ndise wobverana naye.
6 Munthu yemwe anena kuti ni wobverana naye, afunika kupitiriza kufamba ninge momwe iye ambafambira.
7 Abale wapamoyo, ninkukunemberanilini lamulo inyowani. Koma ninkukunemberani lamulo yakalekale yomwe mwakhala nayo kundoyambira pakuyamba. Lamulo yakalekale mweyi ni mawu yomwe imwepo mudayabva.
8 Koma olo nteno, nikukunemberani lamulo inyowani yomwe Yesu angaitewedza, yomwe imwepo munkuitewedzambo, ndawa mdima unkuyenda ndipo kugwerewera chaiko kwayamba kale kuvunika.
9 Munthu yemwe anena kuti ali mukugwerewera koma azondana na m’bale wake, ndiye kuti adakali mumdima.
10 Yemwe akonda m’bale wake ndiye kuti ali mukugwerewera ndipo palibe chomwe chingachitise kuti akhukhumudwe.
11 Koma yemwe azondana na m’bale wake ali mumdima ndipo ankufamba mumdima mumo komasoti ankudziwalini komwe ankuyenda pakuti maso yake yankuwonalini ndawa ya mdima muyo.
12 Ninkunembera imwepo wana wangu wapamoyo, pakuti machimo yanu yakhululukiriwa ndawa ya dzina yake.
13 Ninkunembera imwepo ababa, ndawa munkumudziwa yemwe wakhala alipo kundoyambira pakuyamba. Ninkunembera pomwe imwepo alumbwana na atsikana ndawa mwagonjesa woipa. Ninkunembera imwepo wana wapamoyo ndawa mukuwadziwa Ababa.
14 Ninkunembera imwepo ababa ndawa mukumudziwa yemwe wakhala alipo kundoyambira pakuyamba. Ninkunembera imwepo alumbwana na atsikana ndawa mwakhala wolimba ndipo mukhulupirira mawu ya Mulungu komasoti mwagonjesa woipa.
15 Ayi kumbakonda dziko panango vinthu va mudziko. Peno munango ankukonda dziko, ndiye kuti akondalini Ababa.
16 Ndawa chirichose cha mudziko iyi, ninge vomwe thupi ifunisisa, vomwe maso yafunisisa komasoti kudziwonesera na vinthu vomwe munthu alinavo pamoyo wake, vichokeralini kwa Ababa koma mudziko iyi.
17 Kuingizira pamwapa, dziko iyi inkuyenda ndipo chirichose cha mudziko mweyi chomwe wanthu afunisisa chinkuyenda. Koma wochita vomwe Mulungu afuna adzakhaleko mpakana kalekale.
18 Wanamwe, ino ni nthawe yakumapeto. Mudabva kuti wolamba Khrisitu ankubwera, ndipo manjeuno azinji olamba Khrisitu awonekera. Ndawa ya vimwevi tinkudziwa kuti ino ni nthawe yakumapeto.
19 Amwawo adachoka pagulu yathu, koma enzelini mugulu yathu,* ndawa adakati enze mugulu yathu, adakapitiriza kukhala na isepano. Koma adachoka kuti vidziwike kuti ni woselini omwe ali mugulu yathu.
20 Imwepo mudadzodzewa na mzimu wa Mulungu yemwe ni wochena, ndipo mose imwepo mukudziwa chonadi.
21 Nakunemberani vimwevi, osati ndawa yakuti muchidziwalini chonadi koma ndawa yakuti mukuchidziwa komasoti ndawa yakuti palibe bodza iriyose yomwe ichokera mu chonadi.
22 Ko wabodza angakhale pomwe mbani kuposha yemwe atsutsa kuti Yesu ndiye Khrisitu? Umoyu ni wolamba Khrisitu, yemwe alamba Ababa komasoti Mwana.
23 Aliyese yemwe alamba Mwana angakhalelini pa ushamwali na Ababa. Koma yemwe abvuma Mwana akhala pomwe pa ushamwali na Ababa.
24 Koma imwepo, vomwe mudabva pakuyamba vipitirize kukhala muntima mwanu. Vimwivo vomwe mudabva vikapitiriza kukhala muntima mwanu, mudzapitirize pomwe kukhala wobverana na Mwana komasoti Ababa.
25 Ndipo pale iye adatipolomisa moyo wosapera.
26 Nakunemberani vinthu vimwevi vofotokoza wanthu omwe ankufuna kukusokeresani.
27 Koma imwepo, Mulungu adakudzozani na mzimu wake ndipo mzimu muyo udakali mwa imwepo, mwakuti mukufunikiralini munthu munango kuti ambakupfunziseni. Koma kudzozewa kumuko kukupfunzisani vinthu vose ndipo ni chaiko osati kwabodza. Ninge momwe kudzozewa kumuko kwakupfunzisirani, pitirizani kukhala wobverana naye.
28 Manje imwepo wana wangu wapamoyo, pitirizani kukhala wobverana naye kuti akadzawonekera, tidzakhale na ufulu wa kuyankhula. Komasoti kuti osati tidzachoke pamaso pake mwamanyazi panthawe ya kukhalapo kwake.
29 Peno munkudziwa kuti iye ni wolungama, ndiye kuti munkudziwa pomwe kuti aliyese wochita vinthu vabwino adabadwa kuchokera kwa Mulungu.
Mawu ya m’nyantsi
^ Panango kuti: “enzelini wathu.”
