Kalata yoyamba ya Yohani 5:1-21
5 Aliyese yemwe akhulupirira kuti Yesu ni Khrisitu, ni mwana wa Mulungu. Ndipo wose omwe akonda Ababa akonda pomwe mwana wake.
2 Tikonda Mulungu komasoti kutewedza malamulo yake. Tikambachita vimwevi tidziwa kuti tinkukonda pomwe wana wa Mulungu.
3 Kukonda Mulungu kutanthauza kutewedza malamulo yake, ndipo malamulo yake mwayo ni yosashupa kuyatewedza.
4 Aliyese yemwe ni mwana wa Mulungu agonjesa dziko. Ndipo chikhulupiriro chathu chatithandiza kugonjesa dziko.
5 Ko ni mbani yemwe angagonjese dziko? Ko ni ulelini yemwe akhulupirira kuti Yesu ni Mwana wa Mulungu?
6 Pomwe Yesu Khrisitu ambabwera penze madzi komasoti magazi. Sikuti penze madzi yokha, koma penze pomwe magazi. Ndipo mzimu uchena unkuchitira umboni vimwevi, ndawa mzimu muyo ubweresa chonadi pachena.
7 Pali vinthu vitatu vomwe vitithandiza kumudziwa bwino Yesu Khrisitu.
8 Vinthu vake ni mzimu, madzi komasoti magazi, ndipo umboni wa vinthu vitatu vimwevi ni wobverana.
9 Nishuwadi kuti tikhulupirira umboni womwe wanthu apereka, koma umboni womwe Mulungu apereka ni woposha umboni muyo. Ndipomwapa tikhulupirira umboni womwe Mulungu apereka wonena va Mwana wake.
10 Munthu yemwe akhulupirira Mwana wa Mulungu adawikiza muntima mwake umboni womwe Mulungu wamupasa. Munthu yemwe akhulupiriralini Mulungu amuchitisa kuwoneka ninge wabodza, ndawa akhulupiriralini umboni womwe Mulungu adapereka wonena va Mwana wake.
11 Umboni womwe Mulungu adapereka ni wakuti, iye adatipasa moyo wosapera kupitira mwa Mwana wake.
12 Munthu yemwe wabvuma Mwana ndiye kuti ali naye moyo muyu. Ndipo yemwe alibe kubvuma Mwana wa Mulungu alibe moyo muyu.
13 Ninkukunemberani vimwevi kuti mudziwe kuti imwepo omwe mukhulupirira Mwana wa Mulungu mudzagumane moyo wosapera.
14 Ndipo isepano tikaikiralini* kuti chirichose chomwe tingamukumbire mobverana na vomwe afuna, atibvera.
15 Komasoti, pakuti tidziwa kuti atibvera tikakumbira chirichose, tikhala na chikhulupiriro kuti titambire vinthu vimwevo vomwe tamukumbira.
16 Peno munango waona m’bale wake ankuchita chimo yomwe ingabwereselini impfa, amupempherere ndipo Mulungu adzamupase moyo. Pamwapa nikunena va wanthu omwe achita chimo yomwe ingabwereselini impfa. Koma olo nteno, pali chimo yomwe ibweresa impfa ndipo ninkunenalini kuti apempherere munthu yemwe wachita chimo ninge mwiyi.
17 Kuchita chirichose chiribe chilungamo ni chimo. Koma pali chimo yomwe ingabwereselini impfa.
18 Tikudziwa kuti aliyese yemwe ni mwana wa Mulungu alibe chizolowezi chochita chimo, koma mwana* wa Mulungu amunyang’anira ndipo woipa muyo angamuphatelini.
19 Tinkudziwa kuti ndise wanthu wa Mulungu, koma dziko yose iri m’manja mwa woipa.*
20 Olo kuti viriteno, tikudziwa kuti Mwana wa Mulungu adabwera padziko ino ndipo adatipasa nzeru kuti tidziwe Mulungu chaiye. Kupitira mwa Mwana wake Yesu Khrisitu, ndise wobverana naye. Iye ni Mulungu chaiye ndipo apereka moyo wosapera.
21 Wana wangu wapamoyo, mumbapewe mafano.
Mawu ya m’nyantsi
^ Panango kuti: “titsimikiza.”
^ “Mwana” moyu ni Yesu Khrisitu.
^ Woipa muyu ni Satana.
