Kalata yachiwiri yoyenda kwa Akorinto 1:1-24
1 Ine Paulo, ntumi wa Yesu Khrisitu mwa kufuna kwa Mulungu, pabodzi na Timoteyo m’bale wathu, ninkunembera mpingo wa Mulungu wa ku Korinto komasoti wochena wose omwe ali ku Akaya kuti:
2 Kukoma ntima kukulu na ntendere, vochokera kwa Mulungu Ababa wathu na Ambuya wathu Yesu Khrisitu, vikhale na imwepo.
3 Atamandike Mulungu na Ababa wa Ambuya wathu Yesu Khrisitu, Baba wachifundo chikulu komasoti Mulungu yemwe atinyamalisa pabvuto iriyose,
4 yemwe atinyamalisa* pomwe pamayesero yathu yose, kuti tikwanise kunyamalisa omwe ankugumana na mayesero ya khaindi iliyose, ndawa nasembo tanyamalisiwa na Mulungu.
5 Pakuti tinkugumana na mabvuto yazinji ndawa ya Khrisitu, tinkunyamalisiwambo maninge kupitira mwa Khrisitu.
6 Tikagumana na mayesero, imwepo munyamalisiwa komasoti kupulumusiwa. Tikanyamalisiwa, namwembo munyamalisiwa ndipo vimwevi vithandiza kuti mupirire mabvuto yomwe nasembo tinkugumana nayo.
7 Chidikhiro chathu pa imwepo chinkugunduzikalini, ndawa tinkudziwa kuti pakuti munkugumana na mabvuto yolingana na yomwe isepano tinkugumana nayo, namwembo mudzanyamalisiwe.
8 Abale, tinkufuna mumbadziwe mabvuto yomwe tidagumana nayo muchigawo cha Ásia. Tidagumana na mabvuto yakulu yoposha mphanvu zathu, mwakuti tenze tiribe chidikhiro chakuti tingakhale na moyo.
9 Ndipo timbandobva kuti tagemuliwa kuti tiphewe. Vimwevi venze tene kuti osati timbadzithembe koma timbathembe Mulungu yemwe amukisa akufa.
10 Iye adatipulumusa ku vinthu vomwe vidakakwanisa kutipha ndipo adzatipulumuse pomwe. Tinkukhulupirira kuti iye apitirize kutipulumusa.
11 Imwembo mungathandizirembo potipempherera mogwigwirira, kuti pakhale wanthu azinji omwe atiperekera mapemphero yotembeja thandizo yomwe Mulungu atipasa podawira mapemphero ya wanthu azinji.
12 Isembo tinachifukwa chodziwonera apadzulu, ndipo chikumbuntima chathu chikuchitirambo umboni, kuti mudziko iyi, makamaka pagulu yanu, tachita vinthu vabwino komasoti mobverana na chilungamo chochokera kwa Mulungu. Tachita vimwevi osati pakuthemba nzeru za dziko, koma pakuthemba kukoma ntima kukulu kwa Mulungu.
13 Ndawa vomwe ninkukunemberani ivi ni vinthu vakuti mungakwanise kuviwerenga na kuvibvesa. Ndipo ninkukhulupirira kuti mupitirize kuvibvesa bwino vinthu vimwevi.
14 Mukudziwa kale kuti isepano ndise chifukwa chakuti imwepo mumbadziwone apadzulu, ninge momwe imwembo mudzakhalire chifukwa chakuti isembo tidzadziwone apadzulu pantsiku ya Ambuya wathu Yesu.
15 Pakuti ninkukaikiralini vimwevi, nenze na cholinga chakuti chakuyamba nibwere kumuko kwanu, kuti mudzakhale pomwe na mwayi unango wokondwa.
16 Ndawa ninkufuna kuti nikambadzayenda ku Makedoniya nidzapite na kumuko kwanu kudzacheza namwe, ndipo nikadzachoka ku Makedoniya nidzabwere pomwe kwanu kumuko ndipo mudzaniperekeze pakuyenda ku Yudeya.
17 Pomwe nenze na cholinga chimwechi, ko nkhani mweyi nimbaiwona kuti ni ing’ono? Ko panango nenze na volinga vadyera kuti nikati: “Inde, inde” nthawe mwiyoletu nichinje ninene kuti: “Neye, neye”?
18 Koma khulupirirani Mulungu kuti vomwe tidakuuzani ni chaivo. Tingakuuzenilini kuti: Inde, patsogolo pake nkunena kuti Neye.
19 Pakuti Mwana wa Mulungu, Yesu Khrisitu, yemwe inepano, Silivano* na Timoteyo tidakulalikirani va iye, alibe kukhala “inde” patsogolo pake nkukhala “neye,” koma “inde” wapitiriza kukhala “inde.”
20 Ndipo mapolomisi ya Mulungu, peno yakhale yazinji tani, yakhala “inde” kupitira mwa iye. Ndipo kupitira pomwe mwa iye, “Ame” anenewa pomwe kwa Mulungu ndipo Mulungu atambira ulemerero kupitira mwa isepano.
21 Koma Mulungu ni yemwe atsimikizira kuti imwepo na isepano ndise wa Khrisitu komasoti ni yemwe adatidzodza.
22 Iye watidinda chidindo chake. Chidindo chimwechi ni mzimu uchena womwe uli m’mitima mwathu ndipo uli ninge madaliso ya mtsogolo.
23 Mulungu ni mboni yangu kuti chifukwa chomwe chanichitisa kuti nileke kubwerera ku Korinto muko mpakana pano nichakuti niribe kufuna kudzakuingizirani chisoni chanu.
24 Sikuti ndise wolamulira chikhulupiriro chanu, koma ndise anyabasa anzanu kuti mumbakondwe, pakuti ndimwe okhazikika ndawa ya chikhulupiriro chanu.
