Kalata yachiwiri yoyenda kwa Akorinto 10:1-18
10 Manje inepano Paulo, nikukudandaulirani motewedzera Khrisitu yemwe ni wopfatsa komasoti wokoma ntima, olo kuti niwoneka wofoka nikakhala namwe pabodzi, koma wolimba ntima nikambayankhula namwe niri kunango.
2 Nidakakonda kuti nikadzabwera kumuko ayi kuti nidzachite vinthu vikulu vomwe ninkudikhira kudzachita potsutsana na wanthu anango omwe ankuwona kuti isepano tidachita vinthu ninge wanthu wamudziko iyi.*
3 Olo kuti moyo wathu ni wolingana na wa wanthu wose, tinkumenyalini nkhondo motewedza maganizo ya wanthu wamudziko iyi.
4 Vitsulo vomwe tinkumenyera nkhondo mweyi sikuti ni va mudziko iyi, koma ni vitsulo vamphanvu vomwe Mulungu watipasa ndipo vikwanisa kugwesa vinthu volimba.
5 Ndawa tinkugubuduza maganizo komasoti chotikangisa chirichose chotsutsana na kudziwa Mulungu, ndipo tinkugonjesa maganizo yaliyose nkuyamanga ninge munthu ali kudjeri kuti yambabvere Khrisitu.
6 Komasoti ndise wokonzeka kupereka chilango kwa munthu aliyese wosabvera, imwepo mukadzawonesa kuti ndimwe wobvera pa chirichose.
7 Mukuwona vinthu pakutengera mawonekedwe yakunja. Peno aliyese akhulupirira muntima mwake kuti ni wotewera Khrisitu, aganizire pomwe kuti: Momwe viriri kuti iye atewera Khrisitu, isembo titewera Khrisitu.
8 Ambuya adatipasa ulamuliro kuti tikulimbikiseni, osati kukufokesani. Ndipo nichidzikwiza mopitirirako malire pankhani ya ulamuliro moyu, ningachitelini manyazi.
9 Ndawa ninkufunalini kuti muganize kuti cholinga cha makalata yangu nkukugopsyani.
10 Pakuti anango anena kuti: “Makalata yake yakhala na ntontholo wamphanvu, koma iye akabwera awoneka wofoka ndipo voyankhula vake vikhala vosafika pantima.”
11 Wanthu mwawo adziwe kuti vomwe tinkufotokoza m’makalata yathu tiri kunango, tidzachite vimwevo tikadzabwera.
12 Tidziwonalini ninge ndise wolingana na wanthu womwe adzikwiza komasoti tidzilinganizalini na wanthu mwawo. Koma wanthu mwawo akambapimana wokhawokha pophatisa basa mpfundo zawo nkumbadzilinganiza wokhawokha, abvesalini chilichose.
13 Koma isepano tidzadzikwizelini pa vinthu vomwe viri kunja kwa malire yomwe tapasiwa. Tidzadzikwize pa vinthu vomwe viri nkati mwa malire yomwe Mulungu watipimira, yomwe yadafika mpakana kwanu kumuko.
14 Ndipomwapa tinkupitiriralini malire ya gawo yathu, ninge kuti gawo mwiyo inkufikalini kwanu kumuko. Ndawa tidayamba ndisepano kufika kwanu kumuko pakulengeza ntontholo wabwino wonena va Khrisitu.
15 Sikuti tinkudzikwiza pomwe kunja kwa malire ya gawo yomwe tidapasiwa ndawa ya basa ya munthu munango. Koma tinkukhulupirira kuti chikhulupiriro chanu chikadzaingizirika, basa yathu idzakule pomwe mugawo yathu. Manje tidzakhale na vochita vizinji
16 na cholinga chakuti tilengeze ntontholo wabwino kumadziko yakutali kupitirira kumuko kwanu, kuti osati tidzikwize pa basa yomwe yaphatiwa kale mugawo ya munthu munango.
17 “Koma yemwe akudzikwiza, adzikwize ndawa ya Yahova.”*
18 Ndawa yemwe abvumiziwa ni ulelini yemwe adzikwiza, koma yemwe Yahova* wamubvumiza.
Mawu ya m’nyantsi
^ Panango kuti: “wanthu omwe atumikiralini Mulungu.”
^ Onani vakumapeto A5.
^ Onani vakumapeto A5.
