Kalata yachiwiri yoyenda kwa Akorinto 11:1-33
11 Nidakakonda kuti munibvumize kuti nidzikwize pang’ono. Ndipo mwanibvumiza kale.
2 Ninkukuchitirani ntsanje, ninge yomwe Mulungu akuchitirani, pakuti ndine nidakuchitisani kupolomisiwa ukwati na mwamuna m’bodzi, Khrisitu, ndipo ninkufuna kukuperekani ninge namwali wochena kwa iye.
3 Ninge momwe nyoka idanamizira Hava mwakumupusisa, nkhawa yangu ni yakuti panango maganizo yanu yangasokonezewembo nkuleka kukhala wachilungamo na wochena. Koma munthu wa Khrisitu afunika kukhala wachilungamo na wochena.
4 Ndawa munango akabwera kwa imwepo nkulalikira va Yesu wosiyana na yemwe tidamulalikirira, panango akakubwereserani mzimu wosiyana na womwe mudatambira kale, panango ntontholo wabwino wosiyana na womwe mudautambira, imwepo mundomutambira munthu wateno.
5 Koma inepano ninkuwona kuti ninkuchepalini mwanjira iliyose polinganiza na atumi wanu wapadzulu mwawo.
6 Peno nilibe luso ya kuyankhula, sikuti ndine wosadziwa pomwe vinthu ndipo tidakuwonesani vimwevi munjira iliyose komasoti pa vinthu vose.
7 Panango ko nidaphonya panidadzichepesa kuti imwepo mukwiziwe, panthawe ire yomwe nidakulalikirani fovolo ntontholo wabwino wa Mulungu nili wokondwa?
8 Nidatambira thandizo kuchokera ku mipingo yanango ndipo venze ninge ninkuwabera na cholinga chakuti nitumikire* imwepo.
9 Koma panidasowa vofunika vinango nili kumuko kwanu, nilibe kukhala ntolo kwa munthu aliyese, pakuti abale omwe adachokera ku Makedoniya adanipasa vose vomwe nimbafunikira. Shuwa, nidayesesa kuti nileke kukhala ntolo munjira iliyose, ndipo nipitirize kuchita teno.
10 Ninkuyankhula chonadi cha Khrisitu, ndipomwapa nidzasiyelini kudzimekera m’madera ya ku Akaya.
11 Ko ninkuchita vimwevi ndawa chani? Ndawa yakuti nikukondanilini? Mulungu akudziwa kuti nikukondani.
12 Nipitirize kuchita vomwe ninkuchita, kuti nitchingirize wanthu womwe ankuyesesa kugumana chifukwa chonenera kuti ni wolingana na isepano pa vinthu vomwe adzimekera.
13 Wanthu mwawa ni atumi wabodza, anyabasa alibe chilungamo ndipo adzichitisa kuwoneka ninge atumi wa Khrisitu.
14 Vimwevi ni vosadabwisa, pakuti olo Satana adzichitisa kuwoneka ninge mngelo wa kugwerewera.
15 Ndipomwapa ni vosadabwisa peno atumiki wake nawombo adzichitisa kukhala ninge atumiki wachilungamo. Koma mapeto yawo yadzakhale yobverana na basa zawo.
16 Ninkubwerezera pomwe kunena kuti, munthu aliyese ayi kuti aniwone ninge nilibe nzeru. Koma peno munkuniwona kuti nilibe nzeru, mundobverana navo kuti ndimo mwanilili, kuti nanembo nimeke pang’ono.
17 Vomwe ninkuyankhula ivi, ninkuyankhulalini ninge munthu wotewedza chitsanzo cha Ambuya. Koma ninge munthu alibe nzeru komasoti womeka na wodzithemba maninge.
18 Pakuti wanthu azinji akumeka na vinthu va mudziko iyi, inembo nimeke.
19 Mushupikalini kuchita vinthu na wanthu alibe nzeru ndawa mudziwona kuti ndimwe anzeru maninge.
20 Ndipo mubvuma aliyese yemwe akuchitisani kukhala akapolo, wotenga vinthu vanu, wokuberani vinthu vamunavo, wodziwona kuti ni wapadzulu kuposha imwepo komasoti aliyese wokukwantsani mbama.
21 Ninkunena vimwevi modzinyoza tekha, pakuti tinkuwoneka ninge tachita vinthu mofoka.
Koma peno wanthu anango ankuchita vinthu molimba ntima, ninkuyankhula ninge nilibe nzeru, inembo nikuchita vinthu molimba ntima.
22 Ko iwo ni Aheberi? Inembo nchibodzibodzi. Ko ni Aizirayeli? Nanembo. Panango iwo ni mbadwa za Abulahamu? Inembo nchibodzibodzi.
23 Ko panango iwo ni atumiki wa Khrisitu? Ninkudawira ninge wofuntha, inepano ndine ntumiki wa Khrisitu woposha iwo. Nidachita vizinji kuposha iwo, nidamangiwa kazinjizinji, nidamenyewa maulendo yosawerengeka ndipo nidachita maulendo yazinji ninkupulumukira nkamwa mwa mbuzi.
24 Maulendo 5 Ayuda adanikwapula mishamu 39.
25 Maulendo yatatu adanimenya na kam’bada. Ulendo ubodzi adanitema na minyala. Barko idaniphwanyikirako maulendo yatatu. Ulendo ubodzi nidakhala panyanja usiku na masikati.
26 Nidafamba maulendo yazinji, nidagumana na vopasa mantha mu tukamadzi komasoti nidagumana na vigananga munsewu. Nidagumana pomwe na vopasa mantha kuchokera kwa wanthu wa khaindi yangu, wanthu wa makhaindi yanango, muthaundi, muchipululu, panyanja na pakati pa abale alibe chilungamo.
27 Nimbaphata basa zowawa komasoti zochosa kaluma. Nthawe zizinji nimbasowa tulo usiku, nimbakhala na njala komasoti nyota ndipo nthawe zizinji nimbandokhalambo ne kudya chinthu, nimbabonera na mphepo ndipo nenze na vovala ving’onong’ono.
28 Kuingizira pa vinthu vose vimwevi, pali pomwe chinthu chinango chomwe manjeuno nishupika nacho m’maganizo ntsiku na ntsiku. Nikhala na nkhawa na mipingo yose.
29 Nimbani angafoke, inembo osafoka? Nimbani angakalipisiwe, koma inepano osakalipa navo?
30 Peno ningafunike kumeka, nidzameke pa vinthu vomwe viwonesa kufoka kwangu.
31 Mulungu yemwe ni Ababa wa Ambuya Yesu, yemwe ni wofunika kutamandiwa mpaka kalekale, ankudziwa kuti ninkunamalini.
32 Ku Damasiko, governador wa mpfumu Areta adaikha magwarda pa misuwo ya thaundi ya Damasiko kuti aniphate.
33 Koma wanthu adaniyikha m’dengu nkunibulisira pa janela ya mpanda wa thaundi mwiyo ndipo nidapulumuka.
Mawu ya m’nyantsi
^ Panango kuti: “nithandize.”
