Kalata yachiwiri yoyenda kwa Akorinto 12:1-21
12 Nifunika kumeka. Ndipomwapa niyankhule nkhani yofotokoza va masomphenya na ntontholo wochokera kwa Ambuya, olo kuti kumeka kulibe na basa.
2 Ninkudziwa munthu munango wobverana na Khrisitu. Magole 14 yapita aya, munthu moyu adatengewa nkuyenda naye kudzulu kwachitatu. Peno adatengewa na thupi yake chaiyo panango neye, inepano nikudziwalini. Akudziwa ni Mulungu.
3 Shuwadi, nikumudziwa munthu moyu. Peno adatengewa anathupi yake chaiyo panango neye, nikudziwalini. Akudziwa ni Mulungu.
4 Iye adatengewa nkuyenda naye mparadaiso, ndipo ali mparadaiso mumo adabva mawu yomwe munthu angayatomolelini komasoti ni yosabvumizika kuyanena.
5 Nimeke pankhani yonena va munthu moyu, koma nimekelini pankhani yonena va inepano, kuchosapo pa vofoka vangu.
6 Koma olo nichifuna kumeka, sikuti nikudzikwiza, ndawa nikhala nikunena chaivo. Koma nichitelini vimwevo, ndawa nifunalini kuti munango anitamande maninge kuposha pa vinthu vomwe akuwona panango kubva kwa ine,
7 ndawa yakuti nidawonesewa masomphenya yapadera.
Koma kuti nileke kudzikwiza monyanyira, nidapasiwa minga mthupi mwangu yomwe inilasa. Minga mwiyi ikhala ninge mngelo wa Satana ndipo ichitisa kuti nimbabve kuwawa nthawe zose, na cholinga chakuti osati nidzikwize monyanyira.
8 Nidagwigwirira Ambuya katatu pankhani mweyi kuti minga mweyi inichoke.
9 Koma adaniuza kuti: “Kukoma ntima kukulu komwe nakuwonesa nikokwana, ndawa mphanvu zangu ziwonekera bwino maninge iwepo ukakhala wofoka.” Ndipomwapa nimbameke mokondwa maninge ndawa ya vofoka vangu, kuti mphanvu za Khrisitu zipitirize kukhala pamsolo pangu ninge tenti.
10 Ndipomwapa nikondwa na kufoka, kunyozewa, kusowa vinthu vofunika pamoyo, kudzudziwa komasoti voshupa vinango ndawa ya Khrisitu. Ndawa paniri wofoka, ni pomwe nikhala wamphanvu.
11 Manje nakhala munthu wodzikwiza. Koma ndimwepo mwanichichimiza kuchita vimwevi, ndawa mumbafunika kunitembeja pa vabwino vomwe nachita. Inepano nikuchepalini mwanjira iriyose pakulinganiza na atumi wanu apadzulu mwawo, podiya kuti muniwona kuti niribe na basa.
12 Shuwa imwepo mudawona umboni wakuti ndine ntumi. Mudawona kuti nidapirira maninge, nidachita vizindikiro, vinthu vodabwisa na basa zamphanvu.
13 Ko pananjira inango pomwe yomwe tinganene kuti mwenze na mwayi wochepa pakulinganiza na mipingo yose, kuchosapo kuti inepano niribe kukhala ntolo wolemesa kwa imwepo? Pulizi nikhululukireni chimo mweyi yakuti nilibe kukhala ntolo wolemesa kwa imwepo.
14 Ndine wokonzeka kubwera kwa imwepo ndipo kano ni kachitatu manje kukhala wokonzeka. Koma ninkukhalalini ntolo wolemesa ndawa ninkufunalini vinthu vanu, koma ninkufuna imwepo. Pale ni udindolini wa wana kusunga chuma kuti chidzathandize azibereki wawo, koma azibereki ndiwo afunika kusungira chuma wana wawo.
15 Koma inepano nidzaphatise basa vinthu vangu vose komasoti nidzadzipereke na ntima wangu wose ndawa ya imwepo, ndipo nidzachite vimwevi niri wokondwa. Manje peno inepano nikukondani maninge tene, ko imwepo mufunika kumbanikonda pang’ono?
16 Koma mulimose mwevenzere, nilibe kukhala ntolo kwa imwepo. Koma olo nteno imwepo munena kuti, nidakupusisani komasoti nidachita vinthu viribe chilungamo.
17 Koma imwembo mukudziwa kuti niribe kukujererani pakuphatisa basa aliyese wa wanthu omwe nidawatumiza kwa imwepo.
18 Nidalimbikisa Tito kuti abwere kumuko ndipo nidamutumiza pabodzi na m’bale munango. Tito muyo alibe kukujererani olo pang’ono. Tidafamba na maganizo yabodzi ndipo tidachita vinthu molingana. Ntenolini?
19 Ko mwakhala munkuganiza kuti tinkudziikhira kumbuyo pamaso panu? Tinkuyankhula pamaso pa Mulungu mobverana na Khrisitu. Koma abale wathu wapamoyo, tinkuchita vose mwevi kuti tikulimbikiseni.
20 Ninkugopa kuti nikadzafika, panango nidzakugumanenilini momwe nikufunira ndipo panango inembo nidzakhalelini ninge momwe imwepo mukufunira. Panango vingachitike kuti padzakhale ndewo, ntsanje, kukalipisana, kugegedzana, khokolo, mabodza* kudzikwiza komasoti chipiringu.
21 Panango nikadzabwera pomwe, Mulungu wangu adzabvume kuti nichite manyazi pamaso panu. Ndipo panango nidzalilire wanthu azinji omwe adachimwa koma alibe kulapa pa khalidwe yawo yonyantsa, chigololo komasoti khalidwe yawo iribe manyazi yomwe akhala ankuichita.
Mawu ya m’nyantsi
^ Panango kuti: “magunkha.”
