Kalata yachiwiri yoyenda kwa Akorinto 13:1-14
13 Aka ni kachitatu manje kukonza ulendo wobwera kumuko kwanu. “Mumbatsimikizire nkhani iliyose mukabva umboni wochokera kwa mboni ziwiri panango zitatu.”
2 Podiya kuti nililini kumuko, vili ninge nili namwe pabodzi kachiwiri. Ndipo ninkuchenjezeratu wanthu omwe adachimwa komasoti anango wose kuti nikandodzabwera kumuko nidzawalekererelini.
3 Ninkunena vimwevi ndawa munkufuna umboni wotsimikizira kuti Khrisitu yemwe ni wofokalini kwa imwepo koma ni wamphanvu, ankuyankhuladi pakuphatisa basa inepano.
4 Iye adaphewa pamuti ndawa ya kufoka, koma anamoyo ndawa ya mphanvu ya Mulungu. Ni shuwadi kuti isembo ndise ofoka pabodzi na iye, koma tidzakhale naye pabodzi ndawa ya mphanvu ya Mulungu yomwe inkuphata basa mwa imwepo.
5 Pitirizani kudziyesa kuti muone peno mudakali na chikhulupiriro cholimba. Pitirizani kudziyesa kuti mudziwe kuti ndimwe munthu wotani. Ko munkudziwalini kuti ndimwe obverana na Yesu Khrisitu? Mufunika kudziwa vimwevi, kuchosapo peno ndimwelini obvumizika.
6 Ninkukhulupirira kuti mudzazindikire kuti ndise obvumizika.
7 Manje tinkupemphera kwa Mulungu kuti osati muphonye chinthu. Cholinga chathu sikuti ni chakuti tioneke kuti ndise obvumizika. Koma kuti imwepo mumbachite vabwino, podiya kuti isepano tioneke ninge osabvumizika.
8 Ndawa tingachitelini chilichose chotsutsana na chonadi, koma vobverana na chonadi vokhavokha.
9 Tikondwa nthawe iliyose yomwe isepano tingakhake ofoka imwepo nkukhala wamphanvu. Ndipo chomwe tinkupempherera ni chakuti muchinje vinthu vomwe munkufunika kuchinja.
10 Ndipomwapa ninkunemba vinthu vimwevi nili kuno kuti nikadzabwera osati nidzaphatise basa ulamuliro wangu mwamphanvu, ndawa Ambuya adanipasa ulamuliro moyu kuti nimbakulimbikiseni, osati kukufokesani.
11 Pomalizira abale, pitirizani kukondwa, kuchinja maganizo, kulimbikisiwa, kukhala na maganizo yobverana komasoti kukhala mwantendere. Mukachita teno, Mulungu yemwe ni wachikondi na wantendere adzakhale namwe.
12 Mupasane moni mwachikondi.
13 Ochena wose ankukupasani moni.
14 Mose imwepo mukhale na kukoma ntima kukulu kwa Ambuya Yesu Khrisitu, chikondi cha Mulungu komasoti madaliso ya mzimu uchena.
