Kalata yachiwiri yoyenda kwa Akorinto 2:1-17
2 Nasankhula kuti pobwera pomwe kwanu uko, ulendo wangu ayi kuti udzakhale wobvesa ntsisi.
2 Ndawa peno ningakuchitiseni kubva ntsisi, adzanikondwerese nimbani pakuti imwepo nakuchitisani kubva ntsisi?
3 Nidanemba mwavire kuti nikadzabwera kumuko, ayi kuti nidzakhale wantsisi ndawa ya wanthu omwe nifunika kukondwa nawo. Ndawa ninkukhulupirira kuti vomwe vinichitisa kukhala wokondwa, vichitisa pomwe mose kukondwa.
4 Inepano nidakunemberani kalata ire ninkushupika, nili na nkhawa maninge komasoti ninkulira, osati kuti mubve ntsisi, koma kuti mudziwe kuti nikukondani maninge.
5 Peno munango wachita vinthu vobvesa ntsisi, andobvesalini ntsisi inepano, koma wabvesa ntsisi mose imwepo. Koma olo nteno nikufunalini kuyankhula mwamphanvu pankhani mweyi.
6 Kutsuuliwa na wanthu azinji tene ni kokwanira kwa munthu moyu.
7 Manje mukhululukireni na ntima wose komasoti kumunyamalisa, kugopera kuti iye angakhale wokwinyirira maninge mpakana kutaya ntima.
8 Ndipomwapa nikukudandaulirani kuti mumutsimikizire kuti mumukonda.
9 Nidakunemberani na cholinga chakuti nidziwe peno mulidi wobvera pa vinthu vose.
10 Mukakhululukira munthu chirichose, inembo nimukhululukira. Ndipo chirichose chomwe inepano nakhululukira munthu (peno chiripo chomwe nakhululuka) nachita vimwevo ndawa ya imwepo, pamaso pa Khrisitu,
11 kuti Satana aleke kutichenjerera, ndawa tinkudziwa bwino viwembu vake.
12 Panidafika ku Torowa kukalengeza ntontholo wabwino wofotokoza va Khrisitu, ndipo mwayi wophata basa ya Ambuya paudanifungukira,
13 nilibe kubva bwino muntima mwangu ndawa nilibe kumugumana m’bale wangu Tito. Ndipomwapa nidalairana na abale kumuko nkuyenda ku Makedoniya.
14 Koma tinkutembeja Mulungu yemwe nthawe zose atitsogolera pabodzi na Khrisitu ninge kuti tinkuthamanga pachiwonesero chosekerera kuwina. Ndipo kupitira mwa ise kapfungo konunkhira bwino kodziwa Mulungu kakufalikira palipose.
15 Ndawa kwa Mulungu ndise kapfungo konunkhira bwino konena va ntontholo wabwino wa Khrisitu, komwe kankubveka na wanthu omwe akupulumusiwa komasoti omwe ankukadzongewa.
16 Kwa amwawo omwe ankuyenda kukadzongewa ndise pfungo ya impfa kuyenda ku impfa, koma kwa omwe ankuyenda kukapulumusiwa ndise kapfungo kabwino ka moyo kuyenda kumoyo. Ndipo nimbani ali woyenerera kuphata basa mweyi?
17 Ise ndise woyenerera. Ndawa mawu ya Mulungu tigulisalini* ninge momwe azinji achitira, koma tilalikira mwachilungamo mobverana na vomwe wopfunzira wa Khrisitu afunika kuchita. Tatumiwa na Mulungu ndipo tichita vimwevi pamaso pa Mulungu muyo.
Mawu ya m’nyantsi
^ Panango kuti: “tichitanayolini malonda.”
