Kalata yachiwiri yoyenda kwa Akorinto 3:1-18
3 Ko tinkuyamba pomwe kudzichitira umboni tekha? Panango ko nivofunika kuti isembo, molingana na wanthu anango, tikhale na makalata yochitira umboni yobwera kwa imwepo panango yochokera kwa imwepo?
2 Imwepo ndimwe kalata yathu, yonembewa m’mitima mwathu, yodziwika komasoti yowerengewa na wanthu wose.
3 Ndawa vinkuwonekeratu kuti ndimwe kalata yochokera kwa Khrisitu yonembewa na isepano atumiki wa Mulungu. Kalata mwiyo ni yonembewalini na tinta koma na mzimu wa Mulungu wamoyo. Niyonembewalini pa vonembapo va minyala koma m’mitima.
4 Kupitira mwa Khrisitu, tingafotokoze vimwevi molimba ntima pamaso pa Mulungu.
5 Tinganenelini kuti ndise woyenerera kuphata basa mweyi ndawa ya mphanvu zathu, koma ndise woyenerera kuphata basa mweyi ndawa ya Mulungu,
6 ndipo iye adatiwona kuti ndise woyenerera kukhala atumiki wa pangano inyowani, osati pophatisira basa malamulo yochita kunembewa, koma kupitira mwa mzimu. Malamulo yonembewa yaweruza wanthu kuti afe, koma mzimu upasa munthu moyo.
7 Malamulo yomwe yachitisa kuti munthu afe, yomwe yadanembewa pomwe paminyala, yadabwera na ulemerero ukulu maninge mwakuti Aizirayeli alibe kukwanisa kunyang’anisisa nkhope ya Mose ndawa idagaka na ulemerero womwe udamala paidapita nthawe.
8 Manje ko mzimu ufunalini kuperekewa na ulemerero ukulu kuposha pamwapa?
9 Peno malamulo yoweruza wanthu kuti alangiwe yaperekewa na ulemerero, chilungamo chifunika kuperekewa na ulemerero woposha pamwapo.
10 Nayombo malamulo yonembewa yomwe yadapasiwa ulemerero, yadachosewa ulemerero muyo ndawa ulemerero womwe wabwera patsogolo pake ni ukulu kuposha woyamba.
11 Peno malamulo yonembewa, yomwe yadamala paidapita nthawe, yadaperekewa na ulemerero, ndiye kuti malamulo yomwe yadzamalelini yadzakhale na ulemerero ukulu kuposha pamwapo.
12 Pakuti tiri na chidikhiro chimwechi, tiri na ufulu uzinji woyankhula,
13 osati ninge Mose yemwe ambabisa nkhope yake na nguwo, kuti Aizirayeli aleke kuwona kumala kwa ulemerero wosakhalisa.
14 Ndipo iwo maganizo yawo yalibe kuzindikira. Mpakana lero, nguwo mwiyo ikhala yofunikiza pa pangano yakale ikambawerengewa, ndawa ichosewa kupitira mwa Khrisitu basi.
15 Ndipo mpakana pano, vomwe Mose adanemba vikambawerengewa, mitima yawo yakhala yosazindikira.
16 Koma munthu akachinja nkuyamba kutumikira Yahova,* chinguwo chofunikiza mwicho chichosewa.
17 Yahova ni Mzimu ndipo pomwe pali mzimu wa Yahova,* pali ufulu.
18 Tose ise tiri na nkhope zosafunikiza ndipo tiri ninge magirazi yomwe yawonesa ulemerero wa Yahova.* Tikambawonesa ulemerero moyu, tichinja nkukhala ninge chifaniziro chake ndipo tiwonesa ulemerero woingizirikaingizirika molingana ndendende na momwe Yahova,* yemwe ni Mzimu, watichinjira.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
