Kalata yachiwiri yoyenda kwa Akorinto 4:1-18
4 Ndipomwapa pakuti tiri na utumiki moyu mobverana na chifundo chomwe tidawonesewa, tinkutayalini ntima.
2 Koma tasiya vinthu vochitisa manyazi vochitikira kumbali, ndipo tinkuyendalini mosowa chilungamo panango kuphonyesa mawu ya Mulungu. Koma pakuchitisa chonadi kuti chidziwike, takhala chitsanzo chabwino kwa munthu aliyese pamaso pa Mulungu.
3 Peno ntontholo wabwino womwe tinkulalikira uli wobisika, ni wobisika kwa wanthu omwe ankuyenda kukadzongewa,
4 wanthu wosakhulupirira omwe mulungu wanthawe ino* wachitisa maganizo yawo kuti yaleke kuzindikira kuti aleke kuwona kugwerewera* kwa ntontholo wabwino wa ulemerero wonena va Khrisitu, yemwe ni chifaniziro cha Mulungu.
5 Ndawa tinkulalikiralini va isepano koma va Yesu Khrisitu, kuti iye ni Ambuya ndipo isepano ndise akapolo wanu ndawa ya Yesu muyo.
6 Pakuti Mulungu ni yemwe adati: “Kugwerewera kuchokera mumdima,” ndipo pakuphatisa basa nkhope ya Khrisitu, wavunika mitima yathu kuti igwerewere na ulemerero wodziwa Mulungu.
7 Koma olo ntene, tiri na chuma chimwechi mu vombo va dothi, kuti mphanvu yoposha yachibadwa ichokere kwa Mulungu, osati kwa isepano.
8 Tipanikiziwa munjira zosiyanasiyana, koma osati mpakana kukangira kuchokapo. Nzeru zitimalira, koma osati mpakana kusoweratu kothawira.*
9 Tidzudziwa, koma Mulungu atisiyalini. Tigwesewa pasi, koma tidzongekalini.
10 Nthawe zose tipirira tikambadzudziwa ninge momwe Yesu adachitira ndipo tichita vimwevi kuti moyo wa Yesu uwonekere pomwe kwa isepano.
11 Wamoyo ise nthawe zose tikhala pangozi yakuti tingaphewe ndawa ya Yesu, kuti moyo wa Yesu uwonekere pomwe m’mathupi yathu mwaya yomwe yangafe.
12 Ndipomwapa olo kuti moyo wathu ukhala pangozi, vimwevi vinkubweresa moyo kwa imwepo.
13 Ise tinachikhulupiriro molingana na vomwe vidanembewa kuti: “Nenze na chikhulupiriro, ndipomwapa nidayankhula. Ndipomwapa isembo tinachikhulupiriro, ndipo tikuyankhula,
14 pakudziwa kuti yemwe adamukisa Yesu adzamukisembo isepano ninge momwe adamukisira Yesu, ndipo adzatipereke kwa Yesu muyo pabodzi na imwepo.
15 Ndawa vose vachitika kuti vikuthandizeni imwepo. Komasoti vachitika kuti kukoma ntima kukulu komwe kudaingizirika kuwande ndawa wanthu azinji akupereka mapemphero yotembeja ndipo vimwevi vikuchitisa kuti Mulungu atambire ulemerero.
16 Ndipomwapa tinkuchitalini nkhawa. Koma olo umunthu wathu wakunja unkumala, umunthu wathu wankati ukuchitisiwa kukhala unyowani ntsiku na ntsiku.
17 Ndawa olo kuti mabvuto* yomwe tinkugumana nayo ni yakanthawe komasoti yang’ono, yakuchitisa kuti titambire ulemerero womwe unkukulirakulira komasoti womwe ni wosapera,
18 pomwe tinkuganizira maninge vinthu vosawoneka, osati vowoneka. Ndawa vowoneka ni vakanthawe, koma vosawoneka ni vosapera.
Mawu ya m’nyantsi
^ Onani matanthauzo ya mawu yanango.
^ Panango kuti: “kuvunika.”
^ Panango kuti: “chochita.”
^ Panango kuti: “mayesero.”
