Kalata yachiwiri yoyenda kwa Akorinto 5:1-21
5 Tikudziwa kuti nyumba yathu yapadziko yapasi pano panango kuti tenti ino, ikadzapasuka, tidzatambire nyumba yochokera kwa Mulungu. Imwiyo idzakhale nyumba osati yomangiwa na manja, koma yokhalapo mpaka kalekale ndipo idzakhale kudzulu.
2 Ndawa m’nyumba yomwe tinkukhala iyi tinkubuula ndipo tinkufunisisa kuvala nyumba yathu yakudzulu,*
3 ndipo tikadzaivala, tidzagumanikelini kuti tiri pezi.
4 Ndipo, isepano omwe tiri mu tenti ino tinkubuula komasoti kulemerewa, osati ndawa yofuna kuivula, koma kuti tivale nyumba inango iyo, na cholinga chakuti thupi mwiyi yomwe ingafe ingenewe m’malo na moyo.
5 Yemwe adatikonzekeresa kuti titambire vimwevi ni Mulungu. Iye ni yemwe adatipasa pomwe mzimu kuti ukhale ninge chitsimikizo cha vinthu vakutsogolo.
6 Ndipomwapa nthawe zose tikhala wolimba ntima ndipo tikudziwa kuti pomwe nyumba yathu iri mthupi iyi, tiri kutali na Ambuya.
7 Ndawa tinkufamba motsogolerewa na chikhulupiriro, osati motsogolerewa na vowoneka na maso.
8 Koma tikulimba ntima ndipo ndise wokondwa kukakhala na Ambuya, m’malo mokhala m’thupi iyi.
9 Ndipomwapa peno tikhale naye pafupi panango tikhale naye kutali, cholinga chathu ni chakuti tikhale wobvumizika kwa iye.
10 Ndawa aliyese wa isepano adzawonekere ku mpando wotongera milandu wa Khrisitu, kuti atambire malipiro yake mobverana na vomwe adachita ali m’thupi, peno vabwino panango voipa.
11 Ndipomwapa pakuti tigopa Ambuya, tipitiriza kuchitisa wanthu kukhulupirira vomwe tiwapfunzisa ndipo Mulungu akudziwa bwino volinga vathu. Koma ninkukhulupirira kuti imwembo, chikumbuntima chanu chikudziwa bwino volinga vathu.
12 Sikuti tayambasoti kudzichitira umboni tekha kwa imwepo. Koma tinkukupasani lazau yodziwona kuti ndimwe apadzulu ndawa ya isepano, kuti muwadawire omwe adziwona kuti ni apadzulu pakutengera mawonekedwe yakunja, osati vomwe viri muntima.
13 Koma peno tidapenga,* tidapengera Mulungu. Koma peno tiri wolongosoka,* ni vothandiza kwa imwepo.
14 Chikondi chomwe Khrisitu ali nacho chitikakamiza,* ndawa tatsimikiza kuti munthu m’bodzi adafera wanthu wose, ndawa wose mwawo enze adafa kale.
15 Iye adafera wanthu wose kuti omwe ali na moyo osati akhale na moyo wodzikondweresa wokha, koma akhale na moyo wokondweresa yemwe adawafera nkumukisiwa.
16 Kuyambira manjeuno tiwonalini munthu mwakuthupi. Podiya kuti tikhale kuti Khrisitu tidamuwona pomwe mwakuthupi, manjeuno tinkumuwonalini pomwe tene.
17 Manje peno aliyese ni wobverana na Khrisitu, ndiye kuti ni cholengewa chinyowani. Vinthu vakalekale vidamala, ndipo pali vinyowani.
18 Koma vinthu vose ni vochokera kwa Mulungu, yemwe atithandiza kuti tibverane naye kupitira mwa Khrisitu, ndipo adatipasa utumiki wothandiza kuti wanthu abverane pomwe na Mulungu.
19 Utumiki wake ni wakuti tilengeze kuti Mulungu angabveranisa dziko na iye kupitira mwa Khrisitu, mwakuti awapasalini mulandu ndawa ya vophonya vawo, ndipo watipasa isepano basa yolalikira ntontholo wothandiza wanthu kubverana pomwe na Mulungu.
20 Ndipomwapa ndise woimira* m’malo mwa Khrisitu, ninge kuti Mulungu ankugwigwirira wanthu pakuphatisa basa isepano. Ninge wanthu omwe ankuphata basa m’malo mwa Khrisitu tinkukumbira kuti: “Bveranani pomwe na Mulungu.”
21 Yemwe wenze alibe uchimo muyo, Mulungu adamuchitisa kukhala uchimo* ndawa ya isepano, kuti kupitira mwa iye Mulungu ambatiwone kuti ndise wolungama.
Mawu ya m’nyantsi
^ Panango kuti: “malo yathu yokhala yakudzulu.”
^ Panango kuti: “tidafuntha.”
^ Panango kuti: “wokonkholoka.”
^ Panango kuti: “chitichichimiza.”
^ Woyimira moyu ni munthu yemwe anyang’anira wanthu wa dziko yake koma kudziko inango, yemwe achemerewa pomwe kuti embashador panango kuti kazembe.
^ Panango kuti: “ntsembe yobisa machimo.”
