Kalata yachiwiri yoyenda kwa Akorinto 7:1-16
7 Abale wathu wapamoyo, pakuti tapolomisiwa vinthu vimwevi, naboni tidzichenese ndipo tichose chinthu chirichose choipisa thupi na mzimu, kuti tikhale wochena pomwe tinkugopa Mulungu.
2 Tikondeni.* Isepano tiribe kuphonyera aliyese, tiribe kuipisa aliyese ndipo tiribe kujerera aliyese.
3 Pakunena vimwevi sikuti nakugumanani na mulandu. Pale nanena kale kuti imwepo muli m’mitima yathu, kuti tifere pabodzi panango tikhale na moyo pabodzi.
4 Niyankhula namwe momasuka maninge komasoti nimeka namwe. Nalimbikisiwa maninge ndipo nikukondwa maninge pa mabvuto yose yomwe tinkugumana nayo.
5 Patidafika ku Makedoniya tiribe kupumula koma tidapitiriza kugumana na mabvuto yosiyanasiyana. Wanthu anango ambatitsutsa ndipo timbachita nkhawa na mipingo.
6 Koma Mulungu, yemwe alimbikisa wanthu omwe ali na nkhawa, adatilimbikisa na kubwera kwa Tito.
7 Koma osati ndawa yakuti tenze na Tito basi, koma ndawa pomwe ya momwe imwepo mudamulimbikisira. Iye adatibweresera pomwe ntontholo wakuti munkufunisisa kuniwona, munkubva ntsisi maninge komasoti munkuchita nane nkhawa. Panidabva vimwevi nidakondwa pomwe maninge.
8 Ndipomwapa olo kuti nidakuchitisani kubva ntsisi na kalata yangu, nikudandaulalini. (Nikuwona kuti kalata mweyo idakuchitisani kubva ntsisi, koma kwanthawe yochepa.) Manje olo kuti pakuyamba mwapo nidadandaula,
9 manjeuno ninkukondwa. Sikuti ninkukondwa ndawa yakuti mudabva ntsisi, koma ndawa yakuti ntsisi mwizo zidakuchitisani kulapa. Pakuti mudabva ntsisi mobverana na vomwe Mulungu afuna, vomwe tidanemba viribe kukudzongani.
10 Kubva ntsisi mobverana na vomwe Mulungu afuna kuchitisa munthu kulapa nkupulumuka ndipo munthu angadandaulelini navo. Koma kubva ntsisi ninge wanthu omwe atumikiralini Mulungu kubweresa impfa.
11 Ndipo onani momwe ntsisi zobverana na vomwe Mulungu afuna zakuthandizirani. Zakuthandizani kukhala wakhama maninge, zakuchitisani kudzichenesa, kuipidwa na choipa, kukhala na mantha, kufunisisa kulapa, kukhala wodzipereka komasoti kukonza vophonyeka. Mwawonesa kuti ndimwe wochena* pambali zose pankhani mweyi.
12 Podiya kuti nidakunemberani, niribe kuchita vimwevo ndawa ya muyo wophonya panango wophonyerewa muyo neye, koma kuti vidziwike pamaso pa Mulungu kuti mukufunisisa kubvera mawu yathu.
13 Ndipomwapa talimbikisiwa.
Koma kuingizira pakulimbikisiwa, tidakondwa pomwe maninge patidawona kuti Tito ankukondwa, ndawa imwepo mose mudamulimbikisa.
14 Nidayankhula na iye mowonesa kuti nikutembejani ndipo mulibe kunichitisa manyazi. Koma vomwe tidayankhula na Tito pokutembejani ni vazedi, ninge momwe viriri vinthu vose vomwe tidakuuzani.
15 Ndipo iye akukondani maninge imwepo mose akakumbukira kubvera kwanu, komasoti momwe mudamutambirira mwaulemu maninge.
16 Ninkukondwa maninge ndawa yakuti munilimbikisa pavinthu vose vomwe muchita.
