Kalata yachiwiri yoyenda kwa Akorinto 8:1-24
8 Manje abale, tinkufuna kukudziwisani va kukoma ntima kukulu komwe Mulungu wawonesa mipingu ya ku Makedoniya.
2 Pomwe iwo ambagumana na viyeso vikulu ndawa ya mabvuto, ambakondwa maninge ndipo adapereka mosaumira podiya kuti enze pa umphawi maninge.
3 Iwo adachita mobverana na vomwe adakakwanisa, komasoti nikuwachitira umboni kuti adachita mpakana voposha pamwapa,
4 ndipo adayamba wokha kutikumbira kuchokera pasi pa ntima kuti tiwapase mwayi woperekambo mphaso kuti achite nawo utumiki wothandiza wochena mwawo.
5 Ndipo sikuti adandochita vomwe timbadikhira vokha, koma adayamba ayesesa na ntima wose kutumikira Ambuya ndipo adatithandiza isepano mobverana na vomwe Mulungu afuna.
6 Ndipomwapa tidalimbikisa Tito kuti, pakuti iye ni yemwe adayambisa basa yotengatenga vopereka vanu, iye amalizise pomwe kuunganiza vinthu vomwe mudapereka.
7 Imwepo munkuchita bwino pa chirichose. Chikhulupiriro chanu ni cholimba, munaluso yoyankhula, mudziwa vinthu vizinji, muchita vinthu vose mwakhama komasoti mukonda anango ninge momwe isepano tikukonderani. Ndipomwapa pitirizani kukhala pomwe na ntima wofuna kupereka.
8 Sikuti ninkuchita kukulamulani, koma ninkuyankhula vimwevi kuti mudziwe vomwe anango achita mwakhama komasoti kuti niwone peno chikondi chanu ni chaichodi.
9 Ndawa munkudziwa bwino kukoma ntima kukulu kwa Ambuya wathu Yesu Khrisitu. Podiya kuti iye wenze wolemera, adakhala wosauka ndawa ya imwepo, kuti imwepo mulemere ndawa ya kusauka kwake.
10 Niperekeko maganizo yangu pamwapa. Mungachite bwino kumalizisa basa mweyi yochita vopereka, ndawa mudaiyamba gole yamala ndipo mudawonesa ntima wofunisisa kuchita vimwevi.
11 Manje malizisani basa yomwe mudaiyamba. Pakuti mumbafunisisa kuchita vimwevi, malizisani pomwe kuvichita mobverana na vomwe munavo.
12 Mphaso yochokera pasi pa ntima ni yomwe Mulungu akondwera nayo ndawa Mulungu afuna kuti munthu ambapereke vomwe angakwanise, osati vomwe angakwaniselini.
13 Ninkufunalini kuti kwa anango vikhale vosashupa, koma kwa imwepo nkukhala voshupa.
14 Koma ninkufuna kuti vinthu vizinji vomwe muli navo vithandize pa vomwe iwo alibe, ndipo vizinji vomwe iwo ali navo vithandize pa vomwe imwepo mulibe, kuti pakhale kulingana.
15 Mobverana na vomwe Malemba yanena kuti: “Munthu yemwe wenze na vizinji wenzelini na vopitirira mpimo, ndipo munthu yemwe wenze na ving’onong’ono wenzelini na voperewera.”
16 Tinkutembeja Mulungu ndawa yothandiza Tito kuti ambakuganizireni maninge ninge momwe isepano tichitira.
17 Iye wabveradi vomwe tidamulimbikisa kuti achite, ndipo pakuti ambafunisisa kuthandiza, akubwera kumuko mwakufuna kwake.
18 Komasoti tinkumutumiza pabodzi na m’bale munango yemwe ankutamandiwa m’mipingo yose ndawa ya vomwe ankuchita pankhani ya ntontholo wabwino.
19 Ndivolini vokha, koma adasankhuliwa pomwe na mipingo kuti ambafambe nase pomwe tikubweresa mphaso zimwezi. Tinkupereka mphaso zimwezi kuti Ambuya atambire ulemerero komasoti kuti tiwonese kuti tinkufunisisa kuthandiza wanthu anango.
20 Ndipomwapa tinkufunalini kuti munthu aliyese atigumane na mulandu pa vopereka vomwe tinkubweresa ivi vomwe wanthu apereka mwakufuna kwawo.
21 Ndawa ‘tisamalira vinthu vose mwachilungamo, osati pamaso pa Yahova* pokha, komasoti pamaso pa wanthu.’
22 Abale mwawa tinkuwatumiza pomwe pabodzi na m’bale wathu yemwe tamuyesa mobwerezabwereza ndipo tawona kuti ni wakhama pa vinthu vizinji. Manjeuno waonesa pomwe kuti ni wakhama maninge ndawa ankukukhulupirirani maninge.
23 Koma peno pali vomwe mumukaikira Tito, ninkufuna nikuuzeni kuti iye ni munzangu komasoti ninkuphata naye basa pabodzi pakukuthandizani imwepo. Panango peno pali vomwe muwakaikira abale wathu mwawa, dziwani kuti iwo ni atumi wa mipingo ndipo abweresa ulemerero kwa Khrisitu.
24 Ndipomwapa awoneseni kuti muwakonda komasoti muwonese mipingo chomwe chitichitisa kuti timbakukondeni maninge.
Mawu ya m’nyantsi
^ Onani matanthauzo ya mawu yanango.
