Kalata yachiwiri yoyenda kwa Akorinto 9:1-15
9 Pakunena va utumiki wothandiza wochena, ni vosafunika kuti nichite kukunemberani.
2 Ndawa ninkudziwa kuti munantima wofunisisa ndipo ninkunena vimwevi ndawa yokonda wanthu wa ku Makedoniya. Nakhala ninkuwauza kuti abale wa ku Akaya akhala wokonzeka kwa gole ibodzi manje, ndipo kudzipereka kwanu kwalimbikisa abale azinji kumuko.
3 Koma ninkutumiza abale kuti osati tindokutembejani papezi pankhani mweyi, koma kuti mukhaledi wokonzeka, mobverana na vomwe nawauza.
4 Ndawa nikadzafika kumuko na wanthu wa ku Makedoniya nkugumana kuti mukanati kukonzeka, isepano na imwepo, tose tidzachite manyazi ndawa timbakhulupirira kuti mukonzekere.
5 Ndipomwapa naona kuti viribwino kuti niuze abale kuti abwere kumuko isepano tikanati kufika, na cholinga chakuti adzakuthandizeni kukonzekereratu mphaso yomwe mudapolomisa kuti mudzapereke mosaumira. Vikateno, mphaso mweyi idzakhale kuti yakonzewa kale ndipo vidzaonekeretu kuti mukuipereka mosaumira, osati mochichimizika.
6 Pankhani mweyi, wobzala moumira adzakolole vochepa ndipo wobzala mosaumira adzakolole vizinji.
7 Aliyese achite mobverana na vomwe watsimikiza muntima mwake, osati modandaula panango mochichimizika, ndawa Mulungu akonda munthu yemwe apereka mokondwa.
8 Komasoti Mulungu angakuwoneseni kukoma ntima kwake kukulu kuti muleke kusowa vinthu vofunika pamoyo komasoti kuti mukhale na vinthu vizinji vokuthandizani kuphata basa iriyose yabwino.
9 (Mobverana na vomwe Malemba yanena kuti: “Iye wagawira mosaumira. Wapereka kwa wanthu wosauka, ndipo chilungamo chake chidzakhalepo mpakana kalekale.”
10 Manje omwe apereka mbewu mosaumira kwa wobzala komasoti chakudya kuti wanthu adye, adzakupaseni mosaumira mbewu zakuti mubzale. Adzaingizire pomwe vokolola va chilungamo chanu.)
11 Mulungu ankukudalisani pa chirichose kuti mukwanise kupereka mosaumira munjira zosiyanasiyana ndipo wanthu ankutembeja Mulungu muyo ndawa ya mphaso yanu yomwe isepano tinkupereka kwa wanthu anango.
12 Ndawa utumiki wothandiza wanthu moyu sikuti ukundothandiza kuti wochena mwawo agumane vinthu vomwe ankufunikira, koma unkuchitisa pomwe kuti wanthu azinji ambatembeje Mulungu m’mapemphero yawo.
13 Ndawa ya umboni womwe utumiki moyu unkupereka, iwo ankulemekeza Mulungu. Ankuchita teno ndawa imwepo mwabvera ntontholo wabwino wonena va Khrisitu womwe munkulengeza mosabisa komasoti mwapereka mosaumira kwa iwo na kwa wanthu wose.
14 Iwo akupemphererani mogwigwirira kwa Mulungu ndipo awonesa kuti akukondani ndawa ya kukoma ntima kukulu komwe Mulungu wakuwonesani.
15 Tinkutembeja Mulungu ndawa ya mphaso yake yafovolo, yomwe tingakwaniselini kuifotokoza.
