Kalata yachiwiri yoyenda kwa Atesalonika 1:1-12
1 Inepano Paulo niri pabodzi na Silivano* komasoti Timoteyo ndipo ninkunembera mpingo wa wanthu wa ku Tesalonika, womwe ni wobverana na Mulungu Ababa wathu komasoti Ambuya Yesu Khrisitu kuti:
2 Kukoma ntima kukulu komasoti ntendere wochokera kwa Mulungu Ababa na Ambuya Yesu Khrisitu, vikhale namwe.
3 Tifunika kumbatembeja Mulungu nthawe zose ndawa ya imwepo abale. Vimwevi ni vofunika ndawa chikhulupiriro chanu chikukula maninge ndipo chikondi chomwe aliyese awonesa kwa munzake chikuingizirika.
4 Ndipomwapa isepano timeka tikambanena va imwepo ku mipingo ya Mulungu ndawa ya kupirira kwanu na chikhulupiriro chomwe muwonesa mukambadzudziwa komasoti kugwebana na mabvuto yomwe munkugumana nayo.
5 Umoyu ni umboni wakuti Mulungu aweruza mwachilungamo ndipo ndawa ya vimwevi mwawonewa kuti ndimwe woyenerera Ufumu wa Mulungu, womwe munkuubonerera.
6 Pakuti Mulungu ni wolungama, iye adzalange omwe achitisa kuti mumbabonere.
7 Koma imwepo omwe munkubonera mudzapumule pabodzi na isepano pa nthawe yomwe Ambuya Yesu adzawonekere kuchokera kudzulu pabodzi na angelo wake wamphanvu
8 m’moto wawiriwiri. Panthawe mwiyo adzabwezere pakulanga wanthu omwe adziwalini Mulungu komasoti wanthu omwe abveralini ntontholo wabwino wonena va Ambuya wathu Yesu.
9 Wanthu mwawa adzawaweruze kuti alangiwe na kuwadzongeratu ndipo adzachosewe pamaso pa Ambuya mwakuti adzawonelini pomwe mphanvu zake zaulemerero.
10 Vimwevi vidzachitike pa nthawe yomwe adzabwere kudzatambira ulemerero pabodzi na ochena wake. Pantsiku mwiyo, wose omwe adamukhulupirira adzamunyang’anisise mwachidwi, ndawa mudakhulupirira umboni womwe tidapereka kwa imwepo.
11 Ndipomwapa, tikupemphererani nthawe zose kuti Mulungu wathu akuwoneni kuti ndimwe woyenereradi kuchemerewa na iye. Mulungu achite mokwana vinthu vose vabwino vomwe akufuna kuchita na mphanvu zake, ndipo achitise kuti basa zanu zachikhulupiriro zikhale zophindulisa.
12 Tikupemphererani kuti dzina ya Ambuya wathu Yesu ilemekezeke mwa imwepo komasoti kuti imwepo mulemekezeke mwa iye, mobverana na kukoma ntima kukulu kwa Mulungu wathu na kwa Ambuya Yesu Khrisitu.
Mawu ya m’nyantsi
^ Wochemerewa pomwe kuti Sila.
