Kalata yachiwiri yoyenda kwa Atesalonika 2:1-17
2 Koma olo nteno abale, pa nkhani yonena va kukhalapo kwa Ambuya wathu Yesu Khrisitu komasoti kusonkhanisiwa kwathu kwa iye, tinkukukumbirani kuti
2 ayi kubvuma kuti munthu aliyese achinje maganizo yanu yomwe ni yabwino. Ayi kusokonezeka peno munthu munango anganene kuti ntsiku ya Yahova* yafika, podi achinena kuti mawu mwaya yachokera kwa Mulungu, panango kunena kuti adachita kuwerenga mu kalata yomwe wanthu anango akunena kuti isepano ndise tidanemba.
3 Ayi kubvuma kuti aliyese akusokereseni* mwa njira iliyose ndawa ntsiku mwiyo ikanati yafika, mpatuko ufunika kuyamba wachitika ndipo munthu wosabvera malamulo, yemwe ni mwana wofunika kudzongewa, afunika kuwonekera.
4 Iye atsutsa komasoti kudzikwiza padzulu pa aliyese wotomolewa kuti mulungu panango chilichose chomwe chitumikiriwa, mwakuti akhala pasi mukachisi wa Mulungu nkumbadziwonesa pachena kuti iye ni mulungu.
5 Ko munkukumbukiralini kuti penenze namwe pabodzi nimbakuuzani vimwevi?
6 Ndipo imwepo munkudziwa chomwe chikuchitisa kuti manjeuno osati awonekere, kuti adzawonekere pa nthawe yake chaiyo.
7 Shuwadi, kuipa kwa munthu moyu, komwe ni kwachintsintsi, kwayamba kale kuphata basa. Koma kuipa kumuku kupitirize kukhala chintsintsi mpakana yemwe ankumukangisa adzachoke.
8 Patsogolo pake, wosabvera malamulo muyo adzawonekere pachena. Ambuya Yesu adzamalise wosabvera malamulo muyo na mawu yamphanvu yochoka nkamwa mwake* ndipo adzamudzongeretu pa nthawe yomwe kukhalapo kwa Yesu muyo kudzawonekere.
9 Koma kukhalapo kwa wosabvera malamulo muyo kunkukwanisika na mphanvu za Satana. Iye ankuchita basa iliyose yamphanvu, vizindikiro vabodza, vodabwisa
10 komasoti ankuphatisa basa njira iliyose ilibe chilungamo kuti apusise womwe ankuyenda kukadzongewa. Vimwevi vidzakhale chilango kwa iwo ndawa alibe kutambira na kukonda chonadi kuti adzapulumuke.
11 Ndipomwapa Mulungu wabvuma kuti iwo apusisiwe na vipfunziso vabodza na cholinga chakuti ambakhulupirire bodza,
12 kuti wose mwawo adzaweruziwe ndawa alibe kukhulupirira chonadi koma ambakondwa na vinthu vilibe chilungamo.
13 Koma olo nteno, tifunika kumbatembeja Mulungu nthawe zose ndawa ya imwepo abale womwe Yahova* akukondani, ndawa Mulungu adakusankhulani kuchokera pakuyamba kuti mudzapulumuke. Adachita vimwevi pakukuchenesani na mzimu wake komasoti ndawa mudakhulupirira chonadi.
14 Adakuchemerani kuti mupulumusiwe pakuphatisa basa ntontholo wabwino womwe tinkulengeza, kuti mudzagumane ulemerero wa Ambuya wathu Yesu Khrisitu.
15 Ndipomwapa abale, khalani olimba ndipo phatisisani mwamphanvu miyambo yomwe mudapfunzisiwa, peno pakuphatisa basa mawu yapakamwa panango m’makalata yochokera kwa isepano.
16 Komasoti Ambuya wathu Yesu Khrisitu na Mulungu Ababa wathu, womwe adatikonda ndipo akangiralini kutilimbikisa komasoti adatipasa chidikhiro chabwino, ndawa ya kukoma ntima kukulu,
17 alimbikise mitima yanu na kukulimbikisani kuti nthawe zose mumbachite na kuyankhula vinthu vabwino.
Mawu ya m’nyantsi
^ Onani matanthauzo ya mawu yanango.
^ Panango kuti: “akusokonezeni.”
^ Mawu yake chaiyo niyakuti “ mzimu wa mkamwa mwake.”
^ Onani matanthauzo ya mawu yanango.
