Kalata yachiwiri yoyenda kwa Atesalonika 3:1-18
3 Pakumalizira abale, pitirizani kutipempherera kuti mawu ya Yahova* yapitirize kufalikira mwakankulumize komasoti kulemekezewa ninge momwe yankuchitira kumuko kwanu.
2 Mumbatipempherere pomwe kuti tipulumusiwe kwa wanthu woipa maninge, ndawa ni wanthulini wose omwe anachikhulupiriro.
3 Koma Ambuya ni wokhulupirika ndipo adzakulimbiseni na kukutetezani kwa woipa muyo.
4 Komasoti ninge wanthu wotewera Ambuya, tinkukhulupirira kuti imwepo munkutewedza malangizo yomwe tidakupasani ndipo mupitirize kuyatewedza.
5 Ambuya apitirize kutsogolera mitima yanu kuti mumbakonde Mulungu komasoti kuti mumbapirire ndawa ya Khrisitu.
6 Manje abale, tikukupasani malangizo mudzina ya Ambuya Yesu Khrisitu, kuti mumbapewe m’bale aliyese yemwe ankuchita vinthu vosokonezeka komasoti yemwe ankuchita vinthu vosabverana na malangizo yomwe tidakupasani.
7 Ndipo imwepo munkudziwa vomwe munkufunika kuchita potitewedzera, ndawa tiribe kuchita vinthu vosokonezeka petenze kumuko kwanu,
8 panango kudya chakudya cha aliyese fovolo.* Koma, tidaphata basa mwakhama komasoti na mphanvu zathu zose usiku na masikati kuti aliyese wa imwepo osati atilipirire kanthu kalikose pakufuna kutithandiza.
9 Sikuti tidachita vimwevi ndawa yakuti tenze tiribe mphanvu yokukumbirani kuti mutithandize, koma timbafuna kuti tikupaseni chitsanzo chakuti mumbatewedzere.
10 Ndipo petenze namwe, tidakupasani lamulo yakuti: “Peno munthu akufunalini kuphata basa, ayi kuti adye.”
11 Ndawa tinkubva kuti anango kumuko ankuchita vinthu vosokonezeka, alekeratu kuphata basa, ndipo akungenerera nkhani za anango.
12 Wanthu wateno tinkuwalamula na kuwagwigwirira mwa Ambuya Yesu kuti ambaphate basa mwakhama, osati kumbangenerera nkhani za anango ndipo ambadye chakudya chomwe iwo achita kuchichosera kaluma.
13 Koma imwepo abale, ayi kusiya kuchita vabwino.
14 Koma peno munango ankubveralini mawu yathu yomwe yali mukalata mweyi, muikheni chizindikiro ndipo muleke kuchita naye vinthu pabodzi kuti achite manyazi.
15 Koma olo nteno, ayi kumbamuwona ninge mzondi, koma pitirizani kumulangiza ninge m’bale.
16 Manje Ambuya wa ntendere akupaseni ntendere nthawe zose munjira iriyose. Ambuya akhale namwe mose imwepo.
17 Tambirani moni wangu, womwe inepano Paulo nanemba na djanja yangu. Nthawe zose ninemba tene m’makalata yangu yose, kuti mudziwe kuti ndine nanemba. Ninemba teneretu.
18 Kukoma ntima kukulu kwa Ambuya wathu Yesu Khrisitu kukhale namwe mose imwepo.
