Kalata yachiwiri ya Petulo 1:1-21
1 Ndine Simoni Petulo, kapolo komasoti ntumi wa Yesu Khrisitu. Ninkunembera wanthu omwe agumana chikhulupiriro chofunika maninge cholingana na chathu kupitira mu chilungamo cha Mulungu wathu na cha Mpulumusi wathu Yesu Khrisitu.
2 Kukoma ntima kukulu kwa Mulungu na ntendere wake viingizirike kwa imwepo. Kuti vimwevi vikwanisike, mufunika kumudziwa bwino Mulungu komasoti Yesu Ambuya wathu.
3 Pakuphatisa basa mphanvu yake, Mulungu watipasa fovolo vose vofunika kuti tikhale na moyo komasoti kuti tikhale odzipereka kwa iye. Vimwevi vakwanisika ndawa yodziwa bwino Mulungu yemwe adatichemera kupitira mu ulemerero na ubwino wake.
4 Kupitira mu vinthu vimwevi, iye watipolomisa vinthu vofunika na vikulu maninge, kuti mobverana na mapolomisi mwaya mukhale na ulemerero womwe Mulungu ali nawo. Wachita vimwevi ndawa tidasiya kuchita makhalidwe yoipa ya mudziko iyi yomwe yayamba ndawa yofunisisa vinthu voipa.
5 Ndipomwapa, yesesani mwakhama kuti pa chikhulupiriro chanu muingizirepo makhalidwe yabwino, pa makhalidwe yanu yabwino muingizirepo kudziwa vinthu,
6 pa kudziwa vinthu kudziletsa, pa kudziletsa kupirira, pa kupirira kudzipereka kwa Mulungu,
7 pa kudzipereka kwa Mulungu kukonda abale, pa kukonda abale, chikondi.
8 Mukambachita vinthu vimwevi na kuwonesa maninge makhalidwe mwaya, mudzaphatisire basa vinthu vomwe munkuvidziwa bwino pankhani ya Ambuya wathu Yesu Khrisitu ndipo vidzakuthandizeni kuti osati mumbandokhala panango kukangira kubala vipaso.
9 Munthu yemwe alibe makhalidwe mwaya ni wosawona,* wafunga maso yake kuti osati awone kugwerewera ndipo wayebwa kuti adachenesewa ku machimo yomwe ambayachita kalekale.
10 Ndipomwapa abale, chitani vose vomwe mungakwanise kuti mupitirize kukhala okhulupirika, na cholinga chakuti mupitirize kukhala pagulu ya wanthu omwe Mulungu adawachemera na kuwasankhula. Mukapitiriza kuchita vimwevi, mudzakangirelini olo pang’ono.
11 Ndipo mudzadalisiwe maninge mwakuti mudzangene mwaulemerero mu Ufumu wosapera wa Ambuya na Mpulumusi wathu Yesu Khrisitu.
12 Ndawa ya vimwevi, nikufuna kuti nimbakukumbuseni vinthu vimwevi nthawe zose, podiya kuti munkuvidziwa kale ndipo ndimwe olimba mu chonadi chomwe mudapfunzira.
13 Ndipomwapa ninkuwona kuti viribwino kuti nimbakugunduzeni pokukumbusani vimwevi pomwe nidakali na thupi yangu iyi, yomwe iri ninge msasa.*
14 Ninkuwona teno ndawa nikudziwa kuti nasala pang’ono kubula mu msasa wangu uyu, mobverana na momwe Ambuya wathu Yesu Khrisitu adaniuzira.
15 Nthawe zose nimbayesese kukukumbusani kuti nikadzachoka mumbadzakwanise kukumbukira mwekha vinthu vimwevi.
16 Pomwe timbakudziwisani va mphanvu za Ambuya wathu Yesu Khrisitu komasoti vofotokoza kukhalapo kwake, tiribe kutengera nkhani zabodza zomwe wanthu azikonza mochenjera. Koma tidakuuzani vinthu vofotokoza ulemerero wake vomwe tidachita kuwona na maso yathu.
17 Ndawa Khrisitu adatambira ulemu na ulemerero kuchokera kwa Mulungu Ababa wathu, pomwe mawu yadabveka kwa iye kuchokera mu ulemerero ukulu kuti: “Uyu ni Mwana wangu wapamoyo, yemwe anikondweresa maninge.”
18 Tidabva mawu mwaya kuchokera kudzulu pomwe tenze naye pabodzi mu phiri yochena.
19 Ndipomwapa tiribe kukaikira olo pang’ono kuti mawu mwayo yonena vakutsogolo yadzakwanirisiwe ndipo munkuchita bwino kuyaganizira maninge. Mawu mwaya yambagake m’mitima yanu ninge kandyero yemwe ankugaka mumdima. Pitirizani kuchita vimwevi mpakana kumadandakucha, nthanda* ikabula.
20 Imwepo mukudziwa mpfundo yofunika yakuti, palibe mawu yonena vakutsogolo ya m’Malemba yomwe yachokera m’maganizo ya munthu.
21 Ndawa mawu yofotokoza vakutsogolo yalibe kuchokera kwa wanthu, koma wanthu mwawo adayankhula mawu yochokera kwa Mulungu motsogolerewa* na mzimu uchena.
Mawu ya m’nyantsi
^ Panango kuti: “lombe; wang’ala.”
^ Mawu mwaya yankutanthauza malo yomwe munthu akhala pakundodikhira. Ndipo Petulo adayaphatisa basa mophiphirisa pakunena va thupi yake.
^ “Nthanda” ni nyenyezi yomalizira kubula yomwe iwonekera dzuwa ikandosala pang’ono kubula.
^ Panango kuti: “kutengewa; kugwinyiwa.”
