Kalata yachiwiri ya Petulo 2:1-22
2 Koma pagulu ya Aizirayeli, wanthu anango adakhala aneneri wabodza. Molingana na vimwevi pagulu yanu padzakhalembo apfunzisi wabodza. Wanthu mwawa adzayambise mwachintsintsi tumagulu todzonga twampatuko ndipo adzalambe Ambuya wawo yemwe adawagula. Ndawa yochita vimwevi, iwo adzadzongewe mwakankulumize maninge.
2 Kuingizira pamwapo, azinji adzatengere khalidwe yochitisa manyazi ya apfunzisi wabodza mwawo ndipo wanthu ambadzayankhule monyoza njira ya chonadi ndawa ya apfunzisi mwawo.
3 Komasoti mwadyera ambadzaphatisire basa mawu yalibe chilungamo na cholinga chakuti akujerereni. Koma chilango chomwe Mulungu adakonza kalekale kuti adzawapase, chikubwera mwakankulumize ndipo iwo adzadzongewedi.
4 Ndipo Mulungu alibe kulekerera angelo omwe adachimwa wale osawalanga. Koma adawaponya mu Tatalasi, adawamanga mumdima wopasa mantha pakudikhira kuti adzawaweruze.
5 Mulungu alibe kulekerera dziko yakalekale ire osaipasa chilango, koma adasunga Nowa, yemwe ambalalikira va chilungamo cha Mulungu. Adamupulumusa pabodzi na wanthu anango okwana 7, pomwe adabweresa chigumula padziko ya wanthu osagopa Mulungu.
6 Adadzonga pomwe thaundi ya Sodomu na Gomora poishoka na moto. Adachita vimwevi kuti ikhale chenjezo kwa wanthu osagopa Mulungu ya vomwe vidzawachitikire kutsogolo.
7 Koma adapulumusa Loti yemwe wenze munthu wolungama. Loti ambashupika maninge muntima ndawa ya khalidwe yopasa manyazi yomwe wanthu omwe ambabveralini malamulo angachita.
8 (Munthu wolungama moyu angashupika muntima ntsiku na ntsiku ndawa ya vomwe angawona na kubva panthawe yomwe wenze pagulu ya wanthu oipa. Iye ambashupika muntima ndawa ya vochita vawo vosabvera malamulo.)
9 Vimwevi vikuwonesa kuti Yahova* adziwa kupulumusa wanthu odzipereka kwa iye akambayesewa. Koma wanthu alibe chilungamo awasunga kuti adzawadzonge pa ntsiku yopereka chiweruzo,
10 makamaka wanthu omwe afagafaga wanthu anango na cholinga chakuti awaipise pakugonana nawo komasoti omwe anyoza olamulira.
Wanthu mwawa agopalini chinthu ndipo angingimira maganizo yawo. Iwo achitalini mantha kuyankhula vinthu vonyoza wanthu omwe Mulungu wawapasa ulemerero.
11 Koma angelo, podiya kuti ni wamphanvu maninge, anenalini vinthu voipa va apfunzisi wabodza mwawo na mawu yonyoza, ndawa angelo mwawo alemekeza Yahova.*
12 Ndipo wanthu mwawa, molingana na nyama ziribe nzeru zomwe zindochita vinthu mwachibadwa komasoti zibadwa kuti zidzaphatiwe na kudzongewa, ayankhula monyoza vinthu vomwe akuvidziwalini. Wanthu mwawa adzadzongewe ndawa ya vochita vawo voipa,
13 ndipo ankugumana na mabvuto ninge malipiro ya vochita vawo voipa.
Iwo akomedzewa kuchita vinthu vomwe afuna, olo akambavichita masikati. Wanthu mwawa ali ninge madondolozi na shuju yothunduwira pagulu yanu, ndipo akondwa monyanyira akambakupfunzisani vinthu vabodza pakudya namwe pabodzi.
14 Afunisisa maninge kuchita chigololo komasoti akangira kupewa chimo, ndipo achitisa wanthu wachikhulupiriro chosalimba kuti atengeke. Ntima wa wanthu mwawo ni wopfunzisiwa dyera ndipo ni wana otembererewa.
15 Asokeresewa ndawa adasiya njira yabwino. Atewera njira ya Balamu mwana wa Beori, yemwe adachita vinthu voipa ndawa yofunisisa kutambira malipiro,
16 koma adatsuuliwa ndawa yokangira kuchita vinthu vabwino. Bulu yemwe ayankhulalini, adayankhula ninge munthu nkukangisa vochita vofuntha va mneneri muyo.
17 Mwaya ni michera yalibe madzi komasoti pfulere yotengeka na mphepo yankuntho, ndipo adawasungira mdima wopasa mantha.
18 Ayankhula mawu yodzikwiza yalibe phindu. Ndipo aphatisira basa vilakolako va thupi na khalidwe yopasa manyazi pakuchitisa wanthu omwe andothawa manjemanje kwa wanthu ochita voipa kuti atengeke.
19 Podiya kuti ankuwapolomisa ufulu, anichiro mwawo ni akapolo wa khalidwe yoipa. Ndawa aliyese yemwe wagonjesewa na munzake, akhala kapolo wa muyo yemwe wamugonjesa.
20 Shuwadi, peno adapulumuka ku vopsyipiza va dziko iyi ndawa yodziwa bwinobwino Ambuya na Mpulumusi wathu Yesu Khrisitu, koma nkuyambira pomwe kuchita vinthu vomwe ambachita kalekale mpaka kugonjesewa navo, makhalidwe yawo yakhala yoipa maninge kuposha poyamba.
21 Vidakakhala bwino adakaleka kudziwa bwinobwino njira yachilungamo, kusiyana na kuidziwa bwinobwino basi patsogolo pake nkupatuka pa malamulo yochena yomwe adatambira.
22 Mwambi chaiye ule wakwanirisiwa pa iwo. Mwambi muyo unena kuti: “Mbwaya yabwerera kumasanzi yake, ndipo nkhumba yomwe yenze idasambikiwa yayenda kukakunkhulika pomwe m’matika.”
