Kalata yachiwiri ya Petulo 3:1-18
3 Abale wapamoyo, iyi ni kalata yachiwiri yomwe nikukunemberani, ndipo molingana na yoyamba ire, nikukulimbikisani kuti mumbaphatise basa bwino mphanvu zanu zoganiza pakukukumbusani vomwe mudziwa kale.
2 Nikuchita vimwevi kuti mukumbukire mawu yomwe aneneri ochena adanena kalekale komasoti lamulo yomwe Ambuya na Mpulumusi wathu adapereka kupitira mwa atumi.
3 Choyamba dziwani kuti mu ntsiku zomalizira kudzakhale wanthu omwe ambadzayankhule vinthu vonyoza. Pakutewera vinthu vomwe afunisisa,
4 ambadzanene kuti: “Ko kukhalapo kwake kopolomisiwa kule kuli kuponi? Onani, palibe chomwe chachinja kundochokera ntsiku yomwe azibereki wathu adamwalira. Vinthu vose vinkupitiriza kuchitika ndendende kundoyambira pomwe vinthu vidalengewa.”
5 Wanthu mwawa anyalanyaza mwadala mpfundo yakuti, kalekale penze kudzulu na dziko yapasi yomwe idabula m’madzi na kuimirira padzulu pa madzi mwayo ndawa ya mawu ya Mulungu.
6 Ndipo kupitira mu vinthu vimwevi, dziko ya pa nthawe mwiyo idadzongewa pomwe idamira m’madzi ya chigumula.
7 Koma na mawu ya Mulungu mwayo, kudzulu na dziko yapasi vomwe viripo manjeuno, avisungira moto ndipo ankupitiriza kuvisunga mpaka pa ntsiku yomwe adzaweruze komasoti kudzonga wanthu osagopa Mulungu.
8 Koma abale wapamoyo, pitirizani kuzindikira mpfundo yakuti, kwa Yahova* ntsiku ibodzi iri ninge magole 1000, ndipo magole 1000 yali ninge ntsiku ibodzi.
9 Yahova* ankuchebwalini kukwanirisa vomwe adapolomisa ninge momwe wanthu anango awonera kuti akuchebwa. Koma akudekha namwe ndawa afunalini kuti munthu aliyese adzadzongewe, koma ankufuna kuti wanthu wose alape.
10 Koma ntsiku ya Yahova* idzafike ninge mbava, pomwe kudzulu kudzachoke na zungo ikulu. Ndipo vinthu vomwe vikonza kudzulu na dziko yapasi vidzapse maninge nkusungunuka, mwakuti dziko yapasi na basa zake zidzawonekere pachena.
11 Pakuti vinthu vimwevi vidzasungunuke tene, ganizirani va khaindi ya wanthu omwe mufunika kukhala. Mufunika kukhala wanthu wa khalidwe yochena ndipo mumbachite basa zowonesa kuti ndimwe odzipereka kwa Mulungu.
12 Mumbachite vimwevi pomwe munkudikhira komasoti kukumbukira* nthawe zose kubwera kwa ntsiku ya Yahova.* Pa ntsiku mweyi kudzulu kudzapse na moto nkudzongekeratu ndipo vinthu vomwe vikonza kudzulu na dziko yapasi vidzapse maninge nkusungunuka.
13 Koma pali kudzulu kunyowani na dziko yapasi inyowani vomwe isepano tikudikhira mobverana na polomisi yake, ndipo mumo mudzakhale chilungamo.
14 Ndipomwapa abale wapamoyo, pakuti mukudikhira vinthu vimwevi, yesesani kuchita vose vomwe mungakwanise kuti Mulungu adzakugumaneni muli ochena, mulibe chophonya komasoti muli mu ntendere.
15 Kuingizira pamwapo, mumbawone kuti kudekha kwa Ambuya wathu ni chipulumuso, ninge momwe m’bale wathu wapamoyo Paulo adakunemberani mobverana na nzeru zomwe adapasiwa.
16 Iye adafotokoza vimwevi ninge momwe achitira m’makalata yake yose. Koma m’makalata yake mwayo muli vinthu vinango voshupa kuvibvesa, vomwe wanthu osapfunzisika komasoti wachikhulupiriro chosalimba aphonyesa. Achita vimwevi ninge momwe achitirambo na Malemba yose, vomwe vidzachitise kuti adzadzongewe.
17 Ndipomwapa imwepo abale wapamoyo, pakuti mwadziwiratu vinthu vimwevi, chenjerani kuti wanthu osabvera malamulo mwawo ayi kuti akusokereseni na vochita vawo voipa nkuchitisa kuti mugwe ndawa yokangira kukhala olimba.*
18 Ayi kuchita teno, koma mumbachite vinthu vomwe vingakuthandizeni kuti mupitirize kutambira kukoma ntima kukulu kwa Ambuya na Mpulumusi wathu Yesu Khrisitu, komasoti kuti mumudziwe bwino maninge. Kwa iye kukhale ulemerero, kuyambira manjeuno mpakana kalekale. Ame.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Panango kuti: “kufunisisa.”
^ Onani vakumapeto A5.
^ Panango kuti: “odjimbikira.”
