Kalata yachiwiri yoyenda kwa Timoteyo 1:1-18
1 Ine Paulo ntumi wa Yesu Khrisitu mwakufuna kwa Mulungu, mobverana na polomisi ya moyo womwe tidzaugumane ndawa yotewera Yesu Khrisitu,
2 ninkunembera iwepo Timoteyo mwana wangu wapamoyo kuti:
Kukoma ntima kukulu, chifundo na ntendere vochokera kwa Ababa wathu Mulungu, na kwa Yesu Khrisitu Ambuya wathu, vikhale nawe.
3 Ninkutembeja Mulungu yemwe ninkumuchitira utumiki wopatulika ninge momwe azibereki wangu wakalekale adachitira. Nikuuchita na chikumbuntima chochena ndipo niyebwalini kukutomola m’mapemphero yangu yogwigwirira, usiku na masikati.
4 Nikakumbukira misozi yako nifunisisa kukuwona kuti nidzakondwe maninge.
5 Ndawa ninkukumbukira chikhulupiriro chako chaicho, chomwe adayamba kukhala nacho ni ambuya wako wachikazi a Loisi komasoti amayi wako a Yunike, ndipo ninkukhulupirira kuti iwembo uli nacho.
6 Ndawa ya vimwevi, ninkukukumbusa kuti mphaso ya Mulungu yomwe ulinayo, yomwe udaitambira pomwe nidaikha manja pa iwepo, uikolezere ninge moto.
7 Ndawa Mulungu alibe kutipasa mzimu wamantha, koma wamphanvu, wachikondi na wakuti timbaganize bwino.
8 Ndipomwapa, ayi kuchita manyazi na basa yolalikira va Ambuya wathu, panango kuchita manyazi ndawa ya inepano yemwe nidamangiwa ndipo nili mu djeri ndawa ya iye. Koma khala wokonzeka kubonera ndawa ya ntontholo wabwino ndipo umbathembe mphanvu ya Mulungu.
9 Iye adatipulumusa komasoti adatichemera kuti tikhale ochena, osati ndawa ya basa zathu, koma ndawa ya cholinga chake na kukoma ntima kwake kukulu. Mulungu adatiwonesa kalekale kukoma ntima kumoku ndawa ya Yesu Khrisitu.
10 Koma manjeuno vimwevi vatsimikizirika ndawa ya kuwonekera kwa Mpulumusi wathu Yesu Khrisitu, yemwe wamalisa mphanvu za impfa. Komasoti pakuphatisa basa ntontholo wabwino, watidziwisa momwe tingagumanire moyo womwe ungadzongekelini.
11 Ndipo nidasankhuliwa kuti nikhale mlaliki, ntumi na mpfunzisi wa ntontholo wabwino moyu.
12 Ndipomwapa ninkubonera tene, koma ninkuchitalini manyazi. Ninkudziwa yemwe ninkumukhulupirira, ndipo ninkukaikiralini kuti adzateteze vose vomwe namupasa mpakana ntsiku yachiweruzo.
13 Pitiriza kuphatisisa chitsanzo cha mawu chaiyo* yomwe udayabva kwa inepano pomwe unkuwonesa chikhulupiriro na chikondi vomwe tikhala navo ndawa yobverana na Yesu Khrisitu.
14 Usunge chuma chapadera chomwe udapasiwa ichi. Uchisunge mothandiziwa na mzimu uchena womwe tili nawo.
15 Iwepo unkudziwa kuti wanthu wose mu chigawo cha Ásia anisiya. Anango pa wanthu mwawa ni Fugelo na Heremogene.
16 Ambuya achitire chifundo banja ya Onesiforo, ndawa ambabwera kawirikawiri kudzanilimbikisa, ndipo alibe kuchita manyazi na matcheni yangu.
17 Mwakuti pomwe wenze ku Roma, adanifagafaga mwakhama mpakana adanigumana.
18 Ambuya Yahova* adzamuchitire chifundo pa ntsiku yachiweruzo. Iwepo unkudziwa bwino va utumiki wose womwe adachita ku Efeso.
