Kalata yachiwiri yoyenda kwa Timoteyo 2:1-26
2 Manje iwepo mwana wangu, pitiriza kugumana mphanvu na kukoma ntima kukulu kwa Yesu Khrisitu.
2 Vinthu vomwe udavibva kwa inepano na kwa mboni zizinji, uvipfunzise kwa wanthu wokhulupirika ndipo nawombo adzakhale woyenerera kupfunzisa anango.
3 Ninge nsocha wabwino wa Yesu Khrisitu, khala wokonzeka kugumana na mabvuto.
4 Nsocha achitambolini vamalonda vomwe wanthu anango achita, pakufuna kukondweresa yemwe adamunemba usocha.
5 Olo pampikisano, munthu atambiralini malipiro peno ankutewedzalini malamulo ya mpikisano.
6 Mulimi wakhama afunika kukhala woyambirira kudya vipaso va mbewu zake.
7 Nthawe zose umbaganizire vomwe ninkukuuza ivi ndipo Ambuya adzakuthandize kubvesa* vinthu vose.
8 Kumbukira kuti, mobverana na ntontholo wabwino womwe ninkulalikira, Yesu Khrisitu adamukisiwa ndipo wenze mbadwa ya Davide.
9 Ndawa ya ntontholo moyu, ninkubonera ndipo nafungiriwa mudjeri ninge chigananga. Koma olo nteno, mawu ya Mulungu yamangikalini.
10 Ndipomwapa ninkupitiriza kupirira vinthu vose ndawa ya wanthu wosankhiwa, kuti nawombo apulumusiwe kupitira mwa Yesu Khrisitu komasoti atambire ulemerero wosamala.
11 Mawu aya ni yazedi, yakuti: Shuwadi, peno tidafa naye pabodzi, tidzakhale pomwe na moyo pabodzi na iye.
12 Tikapitiriza kupirira, tidzatongembo naye ninge mafumu. Tikamulamba, iyembo adzatilambe,
13 koma tikakhala wosakhulupirika, iye adzapitirize kukhala wokhulupirika, ndawa angadzilambelini.
14 Umbawakumbuse vimwevi nthawe zose. Umbawalangize pamaso pa Mulungu, kuti osati ambagegedzane pa mawu. Kuchita vimwevi kulibe phindu olo pang’ono ndawa kudzonga chikhulupiriro cha wobvesera.
15 Chita chirichose chomwe ungakwanise kuti uwonese kuti ndiwe wobvumizika pamaso pa Mulungu, munthu wosachita manyazi na basa yomwe waiphata komasoti wopfunzisa na kufotokoza bwino mawu ya chonadi.
16 Koma umbapewe nkhani zopeka zomwe ziipisa vinthu vochena ndawa zichitisa kuti wanthu azinji osati ambagope Mulungu,
17 ndipo mawu yawo yafalikira ninge chilonda chonyeka. Anango pa wanthu mwawo ni Hemenayo na Fileto.
18 Wanthu mwawa ankusokoneza chonadi, pakunena kuti wakufa adamuka kale ndipo ankudzonga chikhulupiriro cha anango.
19 Olo kuti viriteno, fundasau yolimba ya Mulungu idakalipo, ndipo inachidindo cha mawu yakuti: “Yahova* adziwa wanthu wake,” na yakuti: “Aliyese wochemera padzina ya Yahova* aleke kuchita vinthu viribe chilungamo.”
20 Munyumba ikulu sikuti mundokhala vinthu* va golide na va siliva basi, koma mukhala pomwe vamiti na va dongo. Vinthu vinango vikhala va basa yolemekezeka, koma vinthu vinango vikhala va basa yonyozeka.
21 Ndipomwapa peno munthu ankupewa vinthu va basa yonyozeka, adzakhale chinthu* cha basa yolemekezeka, chochena, chofunika kwa munikachiro, na chokonzeka kuphata basa iriyose yabwino.
22 Ndipomwapa thawa vilakolako va ulumbwana, koma tewedza chilungamo, chikhulupiriro, chikondi na ntendere pabodzi na wanthu wochemera pa Ambuya na ntima wochena.
23 Komasoti, umbapewe kutsutsana pa vinthu vopusa na viribe nzeru ndawa viyambisa kugegedzana.
24 Kapolo wa Ambuya afunikalini kugegedzana na wanthu. Koma afunika kukhala wodekha kwa wose, woyenerera kupfunzisa, wouphata ntima anango akamuphonyera
25 komasoti wokwanisa kupfunzisa mopfasa wanthu wotsutsa kuti panango Mulungu angawabvumize kulapa* nkudziwa chonadi bwinobwino.
26 Komasoti panango nzeru zingawabwerere nkupulumuka munsampha wa Ndyerekezi, ndawa wawaphata wamoyo pakufuna kuti ambachite vomwe iye afuna.
Mawu ya m’nyantsi
^ Panango kuti: “kuzindikira.”
^ Onani vakumapeto A5.
^ Onani vakumapeto A5.
^ Panango kuti: “vombo.”
^ Panango kuti: “chombo.”
^ Panango kuti: “kuchinja maganizo.”
