Kalata yachiwiri yoyenda kwa Timoteyo 3:1-17
3 Koma dziwa kuti ntsiku zomalizira zidzakhale nthawe yapadera na yoshupa.
2 Wanthu adzakhale wodzikonda, wokonda kobiri, wodziwonesera, wodzikwiza, wonyoza, wosabvera azibereki, wosatembeja, wosakhulupirika,
3 wosakonda azibale wawo, wosafuna kubverana na anango, onamizira anzawo, osadziletsa, wogopsya, wosakonda vabwino,
4 wochitira anzawo voipa, omwe akubvalini va anzawo, odzikwiza ndawa yomeka, okonda vokondweresa m’malo mokonda Mulungu,
5 komasoti owoneka ninge odzipereka kwa Mulungu koma alamba kuti mphanvu ya kudzipereka muko iwachinje. Wanthu mwawa umbawapewe.
6 Anango pa wanthu mwawa achita vinthu mobisa ndipo angenerera m’mabanja nkuchitisa azimayi anango kuti akhale akapolo wawo. Amayi mwawa akhala wofoka ndawa ya machimo yawo komasoti wotengeka na vilakolako vosiyanasiyana.
7 Nthawe zose apfunzira, koma akwanisalini kudziwa bwinobwino chonadi.
8 Molingana na Yane na Yambure, omwe adatsutsa Mose, wanthu mwawambo ankupitiriza kutsutsa chonadi. Iwo anamaganizo yosokonezeka maninge, ndipo ankuyenereralini chikhulupiriro chimwechi.
9 Koma angayendelini patali, ndawa kupusa* kwawo kuwonekera bwino kwa wanthu wose, ninge momwe vidakhalira kwa wanthu awiri wale.
10 Koma iwepo wayesesa kutewedza vomwe nipfunzisa, moyo wangu, cholinga changu, chikhulupiriro changu, kudekha kwangu, chikondi changu na kupirira kwangu.
11 Unkudziwa pomwe momwe nidadzudzikira komasoti masautso yomwe nidagumana nayo ku Antiokeya, ku Ikoniyo na ku Lusitara. Koma olo nteno nidapirira ndipo Ambuya adanipulumusa ku vose vimwevi.
12 Pale wose omwe afuna kukhala na moyo wodzipereka kwa Mulungu mobverana na Yesu Khrisitu, nawombo adzadzudziwe.
13 Koma wanthu woipa na omwe alibe chilungamo, adzapitirize kuipa. Iwo ambadzasokerese anango komasoti ambadzasokeresewe.
14 Koma iwepo pitiriza kutewedza vomwe udapfunzira na vomwe udakhulupirira patsogolo potsimikizira kuti ni vazedi, ndawa unkudziwa omwe adakupfunzisa.
15 Kuyambira pewenze kacheche, wadziwa malemba yochena yomwe yangakupase nzeru zokuthandiza kuti udzapulumuke ndawa yokhulupirira Yesu Khrisitu.
16 Malemba yose yadauziriwa na Mulungu, ndipo ni yothandiza pakupfunzisa, kutsuula, kukonza* vinthu na kulangiza mwachilungamo,
17 kuti munthu wa Mulungu akhale woyenerera maninge na wokonzeka mokwanira kuphata basa iriyose yabwino.
