Kalata yachiwiri yoyenda kwa Timoteyo 4:1-22
4 Pamaso pa Mulungu na Yesu Khrisitu, yemwe adzaweruze wamoyo na wakufa, akadzawonekera komasoti akadzabwera mu Ufumu wake, ninkukulamula mwamphanvu kuti:
2 Lalikira mawu. Umbalalikire modzipereka, pa nthawe yabwino na pa nthawe yoshupa. Tsuula, tsutsa, dandaulira ndipo umbachite vimwevi na luso ya kupfunzisa komasoti modekha maninge.
3 Ndawa idzafike nthawe yomwe wanthu adzafunelini pomwe kupfunzisiwa chaivo,* koma mobverana na vomwe afunisisa, adzagumane apfunzisi wakuti ambawauze vomwe vingawakomedze.*
4 Iwo adzasiye kubvesera chonadi nkumbabvesera nkhani zonama.
5 Koma iwepo pitiriza kukhala woganiza bwino pa vinthu vose, umbapirire mabvuto, umbaphate basa ya mlaliki* komasoti umbakwanirise mbali zose za utumiki wako.
6 Nili ninge ntsembe yachakumwa yomwe inkuthiriwa pa guwa ya ntsembe,* ndipo nthawe yakuti nimasuke yasala pang’ono.
7 Namenya nkhondo yabwino. Nathamanga pa mpikisano moyu mpakana kumapeto. Napitiriza kukhala na chikhulupiriro.
8 Manjeuno anisungira chisote chachifumu cha olungama. Ambuya, woweruza wachilungamo, adzanipase malipiro mwaya pa ntsiku mwiyo. Sikuti adzapase ine nekha, koma adzapase pomwe wose omwe akhala ankudikhirira kuti iye adzawonekere.
9 Uyesese kuti ubwere manjemanje.
10 Kuno Dema wanisiya ndawa yokonda vinthu vamudziko iyi ndipo wayenda ku Tesalonika. Keresike wayenda ku Galatiya ndipo Tito wayenda ku Dalimatiya.
11 Luka yekha ndiye wakhala. Ubwere pomwe na Maliko ndawa anithandiza pa utumiki wangu.
12 Koma Tukiko namutuma kuti ayende ku Efeso.
13 Pakubwera unibweresereko chovala changu chothuma chomwe nidachisiya ku Torowa kwa Karipo komasoti mipukutu, makamaka yachikumba yale.
14 Alekizanda wophula vinthu va nkuwa* ule, adanichitira voipa maninge. Yahova* adzamubwezere mobverana na basa zake.
15 Iwembo uchenjere naye, ndawa adatsutsa ntontholo wathu mwamphanvu.
16 Panthawe yoyamba pomwe ningadziteteza pa mulandu wangu palibe yemwe adakhalako ku mbali yangu, mwakuti wose adanisiya. Koma olo nteno, osati akhale na mulandu.
17 Koma Ambuya adaimirira pafupi na inepano nkunipasa mphanvu. Adachita vimwevi kuti kupitira mwa inepano, basa yolalikira iphatike mokwanira, nakuti makhaindi yose ya wanthu yabve ntontholo moyu. Komasoti nidapulumusiwa m’kamwa mwa mphondolo.
18 Ambuya adzanipulumuse ku choipa chirichose ndipo adzanisunge kuti nikakhale mu Ufumu wake wakudzulu. Iye apasiwe ulemerero mpakana kalekale. Ame.
19 Uniperekere moni kwa Akula na Purisika komasoti banja ya Onesiforo.
20 Erasito adasala ku Korinto, koma Terofimo nidamusiya akudwala ku Mileto.
21 Uyesese kuti ufike kuno nthawe yozizira ikanati kuyamba.
Ebulo, Pude, Lino, Kalaudiya komasoti abale wose akupereka moni.
22 Ambuya akhale nawe ndawa ya khalidwe yako yabwino yomwe uwonesa. Kukoma ntima kwake kukulu kukhale namwe.
Mawu ya m’nyantsi
^ Panango kuti: “vothandiza.”
^ Panango kuti: “angakondwe navo.”
^ Panango kuti: “pitiriza kulalikira ntontholo wabwino.”
^ Onani matanthauzo ya mawu yanango.
^ Panango kuti: “kobre.”
^ Onani vakumapeto A5.
