Kalata yachiwiri ya Yohani 1:1-14
1 Ine ninge munthu wachikulire,* ninkunembera m’bale wapamoyo Gayo, yemwe nimukonda maninge.
2 M’bale wangu wapamoyo, ninkupemphera kuti vinthu vose vipitirize kukufambira bwino komasoti kuti ukhale wathanzi ninge momwe viriri manjeuno.
3 Nidakondwa maninge abale padabwera nkuniuza va chonadi chomwe uli nacho, pomwe unkupitiriza kufamba mu chonadi.
4 Palibe chomwe chinikondweresa maninge* kuposha kubva kuti wana wangu akupitiriza kufamba mu chonadi.
5 M’bale wangu wapamoyo, unkuwonesa kuti ndiwe wokhulupirika pa chirichose chomwe unkuchitira abale, olo kwa wale omwe uwadziwalini.
6 Abale mwawa afotokozera mpingo vachikondi chako. Wanthu watene akambachoka, umbayesese kuwathandiza munjira yomwe Mulungu angakondwe nayo,
7 ndawa adayenda kukalalikira va dzina ya Mulungu, ndipo ambadikhiralini kutambira chirichose kuchokera kwa wanthu wa makhaindi yanango.
8 Ndipomwapa, ni udindo wathu kuwatambira bwino wanthu mwawa, kuti akhale anyabasa anzathu pakulengeza chonadi.
9 Mpingo wanu nidaunembera kalata, koma Diotirefe yemwe akonda kukhala woyamba pagulu yanu, alemekezalini chirichose chomwe tanena.
10 Ndipomwapa nikadzabwera, nidzaulule vomwe ankuchita pakufalisa mabodza yonena va isepano. Ndipo ndawa yakuti akhutiralini na vinthu vimwevi, alamba kutambira abale mwaulemu. Ndipo wanthu omwe afuna kuwatambira, ayesesa kuwalambiza na kuwachosa mu mpingo.
11 M’bale wangu wapamoyo, ayi kumbatewedzera wanthu wochita voipa, koma umbatewedzere wanthu omwe achita vabwino. Omwe achita vabwino achita vinthu mobverana na maganizo ya Mulungu. Koma yemwe achita voipa adziwalini Mulungu.
12 Wanthu wose akhala ankumuchitira umboni Demetiriyo. Komasoti vochita vake vobverana na chonadi vimuchitira umboni. Isembo tinkumuchitira umboni, ndipo ukudziwa kuti umboni womwe tipereka ni chaiwo.
13 Nenze na vizinji vakuti nikuuze, koma nikufunalini kuti nipitirize kukunembera vimwevi na chonembera komasoti tinta.
14 Koma ninkuganiza kuti tiwonane manjemanje ndipo tidzayankhulane maso na maso.
Ntendere ukhale nawe.
Abale kuno akukupasa moni. Iwembo uniperekere moni kwa abale kumuko, aliyese payekhapayekha.
Mawu ya m’nyantsi
^ Panango kuti: “ninge munthu nkulu.”
^ Ma Baibolo yanango yanena kuti, “palibe chinthu chinichitisa kutembeja.”
