Kwa Aefeso 1:1-23
1 Ine Paulo, mobverana na vomwe Mulungu afuna, ndine ntumi wa Yesu Khrisitu ndipo ninkunembera wochena omwe ali ku Efeso, omwe ni wopfunzira wa Yesu Khrisitu wokhulupirika kuti:
2 Mulungu Ababa wathu komasoti Ambuya Yesu Khrisitu akupaseni kukoma ntima kukulu na ntendere.
3 Atamandike Mulungu yemwe ni Ababa wa Ambuya wathu Yesu Khrisitu, ndawa watipasa daliso ya mzimu uchena m’malo yakudzulu mobverana na Khrisitu.
4 Iye adatisankhula kuti tikhale wobverana na Khrisitu dziko ikanati kukonzewa na cholinga chakuti tiwonese chikondi komasoti kuti tikhale wochena nkukhala pomwe tiribe chilema pamaso pa Mulungu.
5 Ndawa adatisankhula kuti adzatitenge nkukhala wana wake kupitira mwa Yesu Khrisitu, mobverana na vomwe vidamukondweresa komasoti vomwe adafuna.
6 Adachita vimwevi kuti iye atamandike ndawa ya kukoma ntima kukulu kwa ulemerero komwe adatiwonesa kupitira kwa mwana wake wapamoyo.
7 Kupitira mwa mwana wake moyu, tidamasuliwa na malipiro ya magazi yake, inde, takhululukiriwa machimo yathu, mobverana na kukoma ntima kwake kukulu.
8 Iye adachitisa kuti kukoma ntima kumuku kukhale kukulu kwa isepano potithandiza kuti tikhale wanzeru komasoti obvesa vinthu,
9 pakutiululira chintsintsi chake chopatulika chofotokoza va chifuniro chake. Chintsintsi mwicho ni chobverana na vomwe vimukondweresa komasoti vomwe afuna,
10 vakuti akhazikise dongosolo yake panthawe yomwe adaikhiratu. Dongosolo mwiyo ni kuunganidza vinthu vose pabodzi kuti vikhale vobverana na Khrisitu, vinthu va kudzulu na vinthu va padziko yapasi. Inde, vinthu vose vidzaunganidziwe kwa Khrisitu,
11 yemwe ndawa yobverana naye tidasankhuliwa kuti tidzatambire vomwe tidasungiriwa, ndawa adatisankhula kale mwa kufuna kwake, iye yemwe achita vinthu vose mobverana na vomwe iye afuna.
12 Adachita vimwevi kuti isepano omwe ndise woyambirira kukhala na chidikhiro mwa Khrisitu titamande Mulungu ndawa iye ni nkulu.
13 Imwembo mudakhala na chidikhiro mwa iye pamudabva mawu ya chonadi, yomwe ni ntontholo wabwino wonena va chipulumuso chanu. Pamudakhulupirira, Mulungu adaphatisa basa mzimu uchena womwe adapolomisa kuti akuikheni chidindo ndipo adaphatisa basa Khrisitu kuti achite vimwevi.
14 Mzimu wochena muyo uli ninge chinthu chotsimikizira kuti tidzatambire vomwe Mulungu watipolomisa. Mulungu adachita vimwevi na cholinga chakuti apereke malipiro kuti wanthu wake amasuliwe. Vimwevi vidzachitise kuti atamandiwe komasoti kutambira ulemerero.
15 Ndipomwapa inembo, kuyambira pomwe nidabva va chikhulupiriro chomwe muli nacho mwa Ambuya Yesu komasoti chikondi chomwe muchiwonesa kwa wochena wose,
16 niribe kuleka kutembeja Mulungu ndawa ya imwepo. Ninkupitiriza kukupemphererani,
17 kuti Mulungu wa Ababa wathu Yesu Khrisitu, Ababa wa ulemerero, akupaseni nzeru kuti mubvese vomwe Iye ankuulula pomwe munkupfunzira kuti mumudziwe chaivo.
18 Mulungu wafungula mitima yanu na cholinga chakuti muwone komasoti mudziwe chidikhiro chomwe wakupasani na vinthu vabwino maninge vomwe wapolomisa kwa wochena,
19 nakuti mudziwe pomwe kukula kwa mphanvu zake zapadzulu zomwe watiwonesa kwa isepano atumiki wake. Mphanvu zake zikulu mwizo zikuwonekera mu basa zake,
20 pomwe adaziphatisa basa pomukisa Khrisitu kwa akufa nkumukhazika kudjanja yake yamakulu m’malo yakudzulu.
21 Adamuikha padzulu kuposha boma iriyose, ulamuliro uliwose, wanthu wose wamphanvu, ambuya wose, na aliyese yemwe ali na dzina ya ulemu, osati munthawe ino* yokha, komasoti munthawe yomwe inkubwera.
22 Mulungu adaikha pomwe vinthu vose pasi pa mapazi yake, ndipo adamuikha kuti akhale msolo wa vinthu vose vomwe ni vobverana na mpingo
23 womwe ni thupi yake ndipo ni wodzadza na Khrisitu yemwe adzadza vinthu vose mokwana.
Mawu ya m’nyantsi
^ Onani matanthauzo ya mawu yanango.
