Kwa Aefeso 2:1-22
2 Kuingizira pamwapo, Mulungu adachitisa kuti mukhale wamoyo olo kuti mwenze wakufa ndawa ya vophonya vanu komasoti machimo yanu.
2 Panthawe inango mungachita vimwevi mobverana na nthawe* za m’dziko iyi, pakubvera wotonga wa mphuwe yemwe atonga vochita va wanthu. Mphuwe mweyi, panango kuti kaganizidwe kamwaka, manje kankuphata basa mwa wana osabvera.
3 Inde, panthawe inango pomwe timbakhala nawo pabodzi, timbachita vinthu mobverana na vilakolako va thupi yathu. Tingachita vofuna va thupi na maganizo yathu, ndipo mwachibadwa tenze wana woyenerera kutambira ukali wa Mulungu molingana na anango wose.
4 Koma pakuti Mulungu ni wachifundo chikulu, komasoti ndawa ya chikondi chake chikulu chomwe adatiwonesa,
5 adachitisa kuti tikhale wamoyo pabodzi na Khrisitu, olo kuti tenze wakufa ndawa ya machimo yathu ndipo imwepo mwapulumusiwa ndawa ya kukoma ntima kukulu.
6 Kuingizira pamwapo, Mulungu adachitisa kuti tikhale na moyo ndipo adatipasa malo yakuti tikakhale kudzulu ndawa adatibveranisa na Yesu Khrisitu.
7 Adachita vimwevi kuti munthawe* zomwe zinkubwera, iye adzatiwonese chuma chapadzulu cha kukoma ntima kwake kukulu. Mulungu adzachite vimwevi pakutiwonesa chifundo ndawa ndise opfunzira wa Yesu Khrisitu.
8 Imwepo omwe munachikhulupiriro, mwapulumusiwa ndawa ya kukoma ntima kukulu kumoku. Sikuti vimwevi vachitika ndawa ya khama yanu, koma ni mphaso ya Mulungu.
9 Neye, sikuti vidachitika ndawa ya basa, kuti munthu aleke kukhala na chifukwa chodzichitisa kuti adzikwize.
10 Ndise basa ya manja ya Mulungu. Iye ndiye adatilenga ndipo ndise obverana na Yesu Khrisitu kuti tiphate basa zabwino, zomwe Mulungu adakonzeratu kuti timbazichite.
11 Ndipomwapa mumbakumbukire kuti nthawe inango, imwepo omwe mwenze wanthu wamakhaindi yanango, wanthu wochitiwa mdulidwe ambakunenani kuti ndimwe wanthu wosachitiwa mdulidwe. Mdulidwe moyu uchitika pathupi na manja ya wanthu.
12 Panthawe mwaire, imwepo mumbamudziwalini Khrisitu, mwenze kutali na mtundu wa Aizirayeli komasoti mwenzelini m’mapangano ya polomisi. Mwenze mulibe chidikhiro ndipo Mulungu mumbamudziwalini mu dziko iyi.
13 Koma manje mobverana na Yesu Khrisitu, imwepo omwe panthawe inango mwenze kutali, mwabwera pafupi ndawa ya magazi ya Khrisitu.
14 Ndawa iye yemwe adaphatanidza magulu yawiri yale nkukhala gulu ibodzi nkugwesa chipupa chomwe chiwasiyanisa chomwe chenze pakati pawo, watibweresera ntendere.
15 Na thupi yake, adamalisa chinthu choyambisa chizondo, chomwe ni Chilamulo chomwe chenze na malamulo komasoti chenze na malangizo. Adachitisa kuti magulu yawiri yomwe ni yobverana na iye, yakhale munthu m’bodzi wanyowani komasoti kuti akhazikise ntendere.
16 Komasoti kuti kupitira mwa muti wodzudzikirapo,* abveranise magulu yawiri ya wanthu mwawo kwa Mulungu ndipo wanthu mwawo akhale thupi ibodzi, ndawa wenze adapheratu chizondo mwicho kupitira mu impfa yake.
17 Ndipomwapa iye adabwera ndipo adalengeza ntontholo wabwino wa ntendere kwa imwepo omwe mwenze kutali. Adalengeza pomwe ntendere kwa omwe enze pafupi,
18 ndawa kupitira mwa iye, magulu yose yawiri mwaya yangakwanise kufika kwa Ababa mosashupa pakuphatisa basa mzimu ubodzi.
19 Ndipomwapa, ndimwelini pomwe wanthu osadziwika panango alendo, koma molingana na wochena mwawo imwembo ndimwe nzika ndipo ndimwe wa m’banja ya Mulungu.
20 Mwamangiwa pa fundasau ya atumi na aneneri ndipo Yesu Khrisitu ni mwala wapakhona wa fundasau mwiyo.
21 Mobverana na iye, nyumba yose, pakuti ni yolumatidzika bwino, ikukula nkukhala kachisi wochena wa Yahova.*
22 Mobverana na iye, imwembo pabodzi na wanthu anango munkumangiwa pabodzi kuti mukhale malo yakuti Mulungu akhalemo mwa mzimu.
Mawu ya m’nyantsi
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Onani vakumapeto A5.
